Ruma 6:2 - Manobo Western Bukidnon

² Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

Ruma 6:2 Cross References

Lucas 20:16

Iyan is: ebeyaan din haazà is menge etew ne ebpenhimetayan din, ne ebpeelimahan din haazà is perasan din te selakew en maan he menge etew.” Ne hein nezineg dutun te menge etew he ebpemineg ki Jesus ne utew zan neseeng ne ke sikandan te, “Kenà heeyan ed-ul-ulahan te Megbevayà!”

Ruma 5:11

Ne kenà duen dà taman su utew zekelà is kelipey ta tenged te g̵ag̵ew kenita te Megbevayà he impeehè din pinaag̵i te Nengazen tew he si Jesu Kristu, ne pinaag̵i zaan kandin nehimu ki en he emig̵u te Megbevayà.

Ruma 6:15

Ne kunaan buwa te zuma ke tenged te kenè en kinahanglan he tumana te pa is kesug̵uan, wey tenged te ingkeg̵ag̵ew ki te Megbevayà, ne egkehimu he ebpeniguduwan te pa is ked-ulaula ta te mezaat, iyan, kenà iyan haazà egkehimu.

Ruma 7:4

Ne iring din ded daan, menge suled, heini is nehitavù kenitew su zutun te kebpatey ni Kristu he elili kenitew, ne mibpatey ki zaan, ne tenged kayi kenè en egkehimu he ibpetuman kenita te minatey en is menge sug̵ù he imbilinbilin ni Moises. Ne umba nehimu heini su wey kiw mesakup ni Kristu he nevanhew en ne wey tew metuman is egkesuatan te Megbevayà.

Ruma 7:6

Ne hein nemeketuu kiw ki Jesus, nelibri kiw te Megbevayà ne wazè en kinahanglan he iyan tew pa edserig̵an is kedtuman te kesug̵uan, su zutun te kebpatey ni Jesus minatey kiw zaan ne nevelukasan kiw te kegkeuripen kenitew te salà. Ne g̵untaan beg̵u en is paag̵i te ked-ul-ulaha tew te egkesuatan te Megbevayà su pinaag̵i heini te kedtavang te Wag̵as he Mulin-ulin, ne kenè en pinaag̵i te zaan he paag̵i he iyan is kenitew he kedtumana te insurat he kesug̵uan.

Gelasya 2:19

Siak, nesavut ku en he kenà a egkeveg̵ayan te untung he wazè din pidtemanan pinaag̵i te kedtumana ku te kesug̵uan, ne tenged dutun mid-engkezan ku is kedsarig ku te kedtumana ku te kesug̵uan su wey ku iyan metuman is menge sug̵ù te Megbevayà.

Gelasya 6:14

Siak mulà, iyan ku zà ibpezalig is Nengazen tew he si Jesu Kristu he mibpehimatey he elili kenitew. Ne tenged te kebpehimatey zin, wazè e en meuripen te menge kelibutanen he kebayà, ne wazè en kayi g̵ehem te kebayàbayà kediey.

Kulusas 2:20

Na, menge suled, geina te iring te minatey ki en duma ki Kristu, wey kenè ki en maan egkeveyveyaan te menge kenà hustu he tuluuwen, kinahanglan he kenè kew en maan mebpemineg te menge sug̵ù te menge etew he menge kuntada te Megbevayà. Menge sug̵ù heini te menge etew zà duen. Egkag̵i zan he zuen menge egkeenen he kenà ibpekaan kenitew te Megbevayà, ne minsan is kegezami wey is kegewezi zà kayi ne wazè din kun itug̵ut kenitew. Kenè niw, menge suled, pemineg̵a is iring dutun su wazà pulus te idawey zan su emun egkeenen tew is egkeenen ne egkeawà heini.

Kulusas 3:3

Umba egkeg̵iyen ku heini su sikita is tumutuu, minatey ki en duma ki Kristu ne is tutuu he untung ta pinaag̵i kandin, wazè pa heini ipezayag te Megbevayà.

1 Pedro 1:14

Geina te menge anak ki te Megbevayà, kinahanglan he edtumanen ta is menge sug̵ù din; kenè ta iyan ebpezumdumahan is mezaat he kebayè ta he edtumanen ta layun dengan hein wazè te pa metueni is tutuu he tuluuwen.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Juan 3:9

Is minsan hentei he nehimu en he anak te Megbevayà, kenè en sikandin egkesuat he ed-ulaula te mezaat su midsempù en man te Megbevayà. Geina te iyan Amey zin is Megbevayà kenà egkehimu he layun sikandin ed-ulaula te mezaat.