Ruma 3:9 - Manobo Western Bukidnon

⁹ Ne sikami is menge Hudiyu, kunaan niw vuwa ke utew key zeyzey, kenà is menge etew he kenà menge Hudiyu, iyan, kenà heini venar. Daan ku en impesavut keniyu he is tivuuk he menusiyà, Hudiyu se kenà Hudiyu, ne pudu ebpemekeulaula te mezaat.

Ruma 3:9 Cross References

Lucas 7:39

Ne naahà heini zutun te Perisiyu he mid-umbita ki Jesus, ne neisip din is, “Angin ke tutuu he ebpeneuven heini te Megbevayà ne kenà ebpekeeles kandin is meremerik he ulaula kayi te vahi ne wazè din pezem itug̵ut he meg̵ewezi is lawa zin kayi te vahi.”

Ruma 1:18

Is Megbevayà diyà te langit, impeehè din en he utew zin igkepauk is langun he menge mezaat he ulaula te menge etew wey is kenè dan kedtahud kandin. Su pinaag̵i te kelelalung dan egkesanggen is kebpesevuta te tutuu he tuluuwen.

Ruma 11:32

Su is Megbevayà, ne impeehè din he mesinupaken wey zait he edsilutan is minsan hentei he menusiyà. Impeehè din heini su wey, pinaag̵i kayi, mehimu zaan he egkehizuwan din sikandan is langun.

Ruma 11:7

Ne g̵eina te iyan haazà, egkesavut ta he is menge kevuwazan ni Israyil, ebpurungan dan pezem ebpenahaa is kegkehimu kandan he metazeng, iyan, wazà mebpulus heini ziyà te kandan. Ne minsan pa zutun, duen kenà utew mezakel he menge zuma zan he nepilì te Megbevayà ne heini mulà, midhimu en sikandan he metazeng. Ne is kezekelan, migkubalan is gehinawa zan, ne kenà ed-utengan te Lalag te Megbevayà.

Ruma 2:1

Netuenan ta he utew metazeng is idsiluti te Megbevayà te menge etew he ed-ulaula te menge mezaat he iring kayi, iyan, sikew is egkag̵i he utew mezaat heini is menge ulaula kayi te menge etew, wazè nu zaan kebpekeg̵awas su edsudien nu is mezaat he ulaula te zuma, iyan, mezaat daan is ed-ul-ulahan nu. Ne tenged kayi zutun te kedsudia nu kandin, nesudì nu zaan is kenikew he ulaula.

Ruma 3:1

Ne emun iyan haazà, henduen be te wazà pulus te kegkehudiyu zey ne wazà daan pulus te tulumanen dey te kedsirkunsidar.

Ruma 3:19

Ne netuenan ta he is ibpesavut kenita kayi te Lalag te Megbevayà, ne ibpesavut daan diyà te menge etew he nesakup te kesug̵uan he iyan key is menge Hudiyu. Ne pinaag̵i kayi egketuenan ta he wazà minsan hentei he etew he ebpekekag̵i he kenà sikandin dait he edsilutan su nekesupak te Megbevayà is tivuuk he menusiyà.

Ruma 3:5

Ne zuen menge pilusupu he etew he egkag̵i te, “Emun ed-ulaula ki te mezaat, meupiya zaan haazà su emun egkeisip te menge etew is menge ulaula ta he mezaat, wey is menge ulaula te Megbevayà, siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà, ne utew haazà meupiya. Ne emun,” ke sikandan, “nehimu is meupiya tenged te mezaat he mid-ulaula ta, kenà metazeng is kedsiluti kenita te Megbevayà tenged te mid-ulaula ta he mezaat.” Ne pilusupu is menge lalag he iring kayi.

Ruma 6:15

Ne kunaan buwa te zuma ke tenged te kenè en kinahanglan he tumana te pa is kesug̵uan, wey tenged te ingkeg̵ag̵ew ki te Megbevayà, ne egkehimu he ebpeniguduwan te pa is ked-ulaula ta te mezaat, iyan, kenà iyan haazà egkehimu.

Ruma 7:14

Netuenan tew he meupiya is kesug̵uan su imbeg̵ey te Wag̵as he Mulin-ulin. Iyan, siak, geina te edtumanen ku is menge mezaat he suat te lawa ku ne nehimu a he iring te uripen te menge mezaat he kebayà.

1 Kurintu 10:19

Iyan ibpesavut ku kayi is: baal zà te etew is ledawan he ed-ezapen te menge etew ne ke zuen egkeenen he ibpemuhat dutun, ne egkeenen dà duen su kenà tutuu he ed-ezapen haazà is ledawan.

1 Kurintu 14:15

Tenged kayi egkesuatan ku he mekeampù a he ed-ulinan te Wag̵as he Mulin-ulin, iyan, egkesuatan ku zaan he mesavut te menge zuma ku ke hengkey is egkeg̵iyen ku. Ne emun egkanta a, egkesuatan ku he ed-ulinan a is egkanta te Wag̵as he Mulin-ulin, iyan, kinahanglan daan he egkesavut haazà is egkentahan ku.

1 Kurintu 4:7

Kunaan niw vuwa ke lavew kew te menge zuma he tumutuu ki Kristu. Is dekelà he kedsavut niw, ne kunaan niw vuwa ke zaan heini ziyan te keniyu ne wazà iveg̵ey keniyu te Megbevayà! Su emun netuenan niw he imbeg̵ey zà heini keniyu, maan is idantal niw?

Gelasya 3:10

Iyan, is minsan hentei mulà he edsarig te kedtumana te kesug̵uan he imbilinbilin ni Moises, nesug̵at en te rawak te Megbevayà su zuen insurat he Lalag te Megvevayà he edhenduen te, “Is minsan hentei he kenà din egkepurung egketuman is minsan hengkey he sug̵ù he insurat dutun te kesug̵uan, ne nesug̵at en sikandin te rawak te Megbevayà.”

Gelasya 3:22

Iyan, impesavut kenitew te insurat he Lalag te Megbevayà he sikitew is tivuuk he menusiyà, sakup kiw en pudu te mezaat he kebayè tew. Ne tenged kayi, wey zà edtumana te Megbevayà is menge penaad din kenita ke edsarig kiw kandin. Wey kiw zà egkeveg̵ayi te untung he wazà pidtemanan ke zuen tew kedtuu.

Pilipus 1:18

Iyan, nasì ku igkelipey heini is menge vaal zan su ke hustu is tuyù dan wey minsan ke mezaat, maambe en, asal mevantug dan si Kristu.