Ruma 2:8 - Manobo Western Bukidnon

⁸ Iyan, duen daan duma he menge etew he iyan dan ed-isipen is kandan he egkesuatan ne kenè dan edtuuwan is tutuu he tuluuwen, kekenà, iyan dan edtumanen is kenà hustu. Ne kenà deisek dà is pauk te Megbevayà he ibpeehè din kandan, kekenà, utew meveg̵at is idsilut din kandan.

Ruma 2:8 Cross References

Ruma 1:18

Is Megbevayà diyà te langit, impeehè din en he utew zin igkepauk is langun he menge mezaat he ulaula te menge etew wey is kenè dan kedtahud kandin. Su pinaag̵i te kelelalung dan egkesanggen is kebpesevuta te tutuu he tuluuwen.

Ruma 10:16

Iyan, dutun te kebpesevuta te Meupiya he Tudtulanen, mezelag dà is Hudiyu he edtuu su zuen menge lalag dengan ni Esaias diyà te Megbevayà he edhenduen te, “He Nengazen, henduen be te wazà edtuu te impesavut dey,” ke sikandin.

Ruma 15:18

Asal iyan dà igkepenudtul ku is nehimu ni Kristu pinaag̵i kediey. Su pinaag̵i kedì duen menge etew he kenà menge Hudiyu he edtumanen dan en is menge sug̵ù te Megbevayà. Nehimu heini pinaag̵i te impepenudtul kedì, pinaag̵i te impeulaula kedì,

Ruma 6:17

Dengan iring te nengeuripen kew te mezaat he kebayà, iyan, guntaan utew zekelà is kebpeselemati ku te Megbevayà su mibpurungan niw te edtuman is tutuu he tuluuwen he impenurù keniyu.

Ruma 9:22

Ne iring din ded daan is mid-ulaula te Megbevayà su zutun te ibpelepew zin en is rerangit din wey is mekeg̵eg̵ehem he silut din, mid-isip din he edtigkeren din dè pà is pauk din dutun te menge etew he kinahanglan he edsilutan din.

1 Kurintu 11:16

Ne ke zuen minsan hentei he kenè din edewaten is kedì he sambag kayi ne iyan tavak ku is: wazà duma he vetasan he ibpenurù dey. Ne is menge zuma he tumutuu ziyà te minsan hendei he inged, ed-ul-ulahan dan daan heini ke edsimba zan.

2 Kurintu 12:20

Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan. Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula. Su kela ke zuen ebpekigkuntada ziyan te menge zuma zin, kela ke zuen egkesina, duen petuluy egkepauk, wey leg̵ezen, kela ke zuen diyan ebpenemperasà wey edsulà te zuma zin, kela ke zuen bereituk. Kela ke zuen diyan te keniyu gelbuwen, wey kela ke wazè niw kebpekid-uyun te menge tumutuu.

Gelasya 5:20

is ked-ezapa te kenà hustu he ed-ezapen, wey is kegemita te g̵ehem he ibeg̵ey ni Setanas. Ebpekigkuntada is menge etew; ebpekidtebek dan; egkesina zan; egkengepauk dan; iyan dà ed-isipen dan is kandan dà he egkesuatan. Ne ed-engkezan dan is kebpekidsevaha zan te menge zuma zan.

Pilipus 1:17

Iyan, is menge zuma, kenà meupiya is tuyù dan te kebentug̵a zan ki Kristu. Egkesuatan dan he melevawi e zan ne kunaan dan ke pinaag̵i kayi egkeumanan is menge samuk ku zini te pirisuwan.

Pilipus 2:3

Kinahanglan he kenà kew mebpekidlawan ne kenè kew mebpelavew, kekenà, isipa te minsan hentei keniyu he minus is pid-etawan din kenà te zuma zin.

2 Tiselunika 1:8

Dutun, edsilutan din sikandan is wazà medtetenged te Megbevayà wey wazà mebpemineg te Meupiya he Tudtulanen te keag̵i te Nengazen tew he si Jesus.

Tito 3:9

Iyan, likayi nu is winalì he kebpekidlewanà te menge etew. Likayi nu zaan is ked-istudyu te menge g̵ug̵ud te menge ngazan te menge kepuun te etew he iyan baal zan. Ne elin nu zaan likayi is kebpekid-eg̵et dan mehitenged te kedtumana te kesug̵uan he imbilinbilin ni Moises. Wazà pulus te langun kayi su ebpekezezaat.

Hibriyuhanen 10:27

Is etew he iyan heini ulaula zin, ne iyan egkepengkusan din is mekelimlimezang he hukum kandin wey is utew meinit he hapuy he iyan idsilut te Megbevayà dutun te langun he edsukul kandin.

Hibriyuhanen 11:8

Ne si Abraham daan, duen kandin he kedtuu. Su neketuu sikandin te Lalag te Megbevayà he ewai zin is inged din ne medhendiyà te selakew en he tanà he impenaad te Megbevayà he ibeg̵ey ziyà te kandin wey ziyà te menge kevuwazan din. Ne zutun mid-ewaan din is kandin he inged minsan pa te wazè din hanew zutun te tanà he impenaad kandin.

Hibriyuhanen 5:9

Ne hein nepasad din en is langun he impetuman kandin te Megbevayà, nehimu sikandin he Menluluwas te langun he ebpemineg kandin su wey meveg̵ayi sikandan te untung he wazè din pidtemanan.

Santiago 3:14

Iyan, emun egkesina sikandin wey mepelevawen, kinahanglan he kenè din izantal is ketau zin wey is meupiya he ulaula zin su tarù is ketau he iring dutun ne ebpekesupak te tutuu he tuluuwen.

Santiago 3:16

Ke zuen menge etew he egkesina wey mepelevawen, utew zan egkesemuki ne ed-ul-ulahan dan is minsan hengkey he mezaat.

1 Pedro 3:1

Sikiyu zaan is menge vahi, kinahanglan he pesakup kew te esawa niw ne zutun minsan ke kenè dan edtuu te Lalag te Megbevayà kela ke ebpeketuu zan ded ke egkeehè dan is menge ulaula niw he memeupiya. Su iyan heini egkehimu he wali niw kandan.

1 Pedro 4:17

Iyan heini, menge suled, timpu he pinaag̵i te merasey he egkeulaula ebpuunan te Megbevayà is kedsusiya zin te menge ulaula te menusiyà. Edhunaan din edsusiya is menge sakup din. Ne emun iyan kiw zin is menge tumutuu edhunaan din, utew pa merasey is egketemanan te menge etew he kenà ebpemineg te Meupiya he Tudtulanen he impesavut kandan te Megbevayà.

Impezayag 14:10

ne ibpeinum kandin is binu te pauk te Megbevayà, he ke và dà egkeg̵iya, silut kandin te Megbevayà, ne heini is mepait he vinu, midtag̵ey en te Megbevayà diyà te tasa he iyan sikan is meinit he pauk din. Ne haazà is menge etew, edresayen sikandan diyà te meregreg he esupri ziyà te Impirnu. Ne egkeahà haazà dutun te nati he kerehidu wey te menge velinsug̵uen te Megbevayà.

Impezayag 16:19

Ne kes dekelà he inged he Bebilunya, neg̵evà te tetelu he vahin ne nengerundus is langun he menge inged diyà te minsan hendei he g̵inhedian. Ne wazà dutun melipati te Megbevayà is inged he Bebilunya he impeinum din te menge meg̵inged dutun is binu he ziyà te tasa zin, he ke và dà egkeg̵iya, impeg̵ezaman din kandan is utew mekelimlimezang he pauk din.