Ruma 13:12 - Manobo Western Bukidnon

¹² Su zini te kelibutan, iring te utew merusirem tenged te mezaat he ulaula, iyan, meg̵aan en egketapus is kezukileman su meg̵aan en egkepawà, he ke và dà egkeg̵iya, meg̵aan en edlikù si Kristu. Ne tenged kayi, ed-engkezan tew en is menge mezaat he ulaula he zait te kezukileman ne idsun-ud tew is limbutung he iyan is kerayag, he ke và dà egkeg̵iya, ed-ul-ulahan tew is meupiya he ulaula.

Ruma 13:12 Cross References

Ruma 13:14

Ne idsun-ud ta is Nengazen tew he si Jesu Kristu, he ke và dà egkeg̵iya, ed-ul-ulahan ta is ulaula zin. Ne kenè te en maan ed-isipen is kedtumana te menge mezaat he kebayà te lawa ta.

1 Kurintu 10:11

Umba neulaula heini is langun su wey metueni te langun he kenà iyan haazà ulaula he egkesuatan te Megbevayà. Ne insurat daan heini su wey ikepenurù kenitew he edsilutan te Megbevayà is ed-ulaula te iring kayi. Su sikitew, meg̵aan tew en egkeumahi is kegketuman te langun he nengetagnà dengan.

1 Kurintu 7:29

Su ibpesavut ku keniyu, menge suled, he mevavè dà utew is timpu tew ne tenged kayi, puun guntaan is etew he zuen esawa zin, ne kinahanglan he tumana zin is ebpeveelan kandin te Nengazen he iring te wazè din esawa.

2 Kurintu 10:4

Su is menge ketezengan, he ke và dà gumaan, he idsukul zey te mezaat, ne kenà ebpuun te etew, kekenà, mekeg̵eg̵ehem utew su ziyà ebpuun te Megbevayà. Ne heini is menge ketezengan, kenà egkesukulan te minsan hengkey he tarù he ketezengan he igkuntada te Megbavayà minsan ke utew melig-en.

2 Kurintu 6:7

ibpenurù dey is tutuu he Lalag te Megbevayà ne edtevangan key te g̵ehem te Megbevayà. Pinaag̵i kayi te langun egketuusan he menge sulug̵uen key te Megbevayà. Iyan kelasag dey wey lembitan dey is metazeng he ulaula.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Ipisu 5:11

Is menge etew he kemulu pa ziyà te kerusireman, kenè kew medtampu kandan te ed-ulaula te menge vaal he wazè din pulus, kekenà, ipeehè niw he mezaat is menge vaal zan.

Ipisu 5:8

Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà.

Hibriyuhanen 10:25

Kenè tew ed-engkezan is kedtig̵um tew te ked-azap te Megbevayà; kenè tew ed-iringan is duma he menge tumutuu he mid-engkezan dan en is kedsimba, kekenà, edtig̵um kiw su wey kiw mekepesemsembag̵à. Utew heini kinahanglan, lavew en emun egketuusan ta he meg̵aan en is kedlikù te Nengazen tew he si Jesus.

Hibriyuhanen 12:1

Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Santiago 1:21

Engkezi niw en is minsan hengkey he meremerik he ulaula wey is kelelalung. Pesakup kew te Megbevayà; hemeni niw is lalag din he impesavut en keniyu su iyan ebpekelibri keniyu te silut.

Santiago 5:8

Ne sikitew zaan, kinahanglan he ed-entusen tew is kebpeketag̵ad tew. Edheg̵eten tew is kedsarig tew su meg̵aan en is andew te kedlikù te Nengazen.

1 Pedro 2:1

Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

1 Pedro 4:7

Kenè en utew egkeug̵et is ketepusan te kelibutan. Ne tenged dutun, kinahanglan he hustu is ked-isip-isip niw. Kinahanglan daan he purungi niw is menge ulaula niw su wey mehustu is ked-ampù niw ziyà te Megbevayà.

2 Pedro 3:11

Ne g̵eina te zuen andew keuzemà he zutun egkehanew is langun te iring kayi, kinahanglan he ebpurungan tew is kedsunud tew te Megbevayà para wazà igkesewayi kenitew.

2 Pedro 3:9

Kunaan te zuma ke edlanganlangan is Nengazen su maan is kenè din edtumanen is pesarig din he edlikù sikandin. Kenà sikandin edlanganlangan, kekenà, utew sikandin mepelevayen keniyu su kenè din egkesuatan he zuen minsan sevaha he kenà egkelibri te silut. Egkesuatan din he meiniyug̵i te langun is menge ulaula zan he mezaat.

1 Juan 2:18

Menge anak ku, meg̵aan en egketapus heini is timpu. Nezineg niw en he keuzemà duen edlepew he egeraran te Kuntada ni Kristu. Guntaan duen en mezakel he menge kuntada ni Kristu ne tenged dutun netuenan ta he meg̵aan en iyan egketapus heini is timpu.

Impezayag 1:3

Edtuvazan te Megbevayà is ebasa kayi te libru wey edtuvazan din daan is ebpemineg te kebesaha kayi ne edtuman te insug̵ù kayi. Su utew en meg̵aan is kegketuman te langun kayi te netagnà.

Impezayag 22:10

Ne impelaus din haazà is lalag din te, “Kenè nu ieles heini is impezayag kenikew he menge lalag kayi te libru su meg̵aan en egkengetuman heini is langun.