Pilipus 4:17 - Manobo Western Bukidnon

¹⁷ Kenè ku iyan igkekeg̵iya kayi su wey a layun mekezawat te ibeg̵ey niw, kekenà, egkesuatan ku he zekelà is suhul keniyu te Megbevayà.

Pilipus 4:17 Cross References

Juan 15:16

Kenè kew iyan nekepilì kediey, kekenà, iyan a nekepilì keniyu. Intezù ku sikiyu wey kew mekepemeg̵as te menge meupiya he ulaula ne wey kenà daan mahanew is beg̵as niw. Ne is minsan hengkey he ebuyuen niw ziyà te Amey ku he Megbevayà tenged te kedtuu niw kediey, ibeg̵ey zin keniyu.

Juan 15:8

Emun ebpenigudu kew ebpemeg̵as, he ke và dà egkeg̵iya, ke layun meupiya is menge vaal niw, egkezelig̵an te menge etew is Amey ku he Megbevayà ne egketuenan he tutuu kew iyan he menge sumusundan ku.

Ruma 15:28

Ne emun egketapus en heini is baal ku igkehated ku en heini is selapì he idtavang kandan, ne zutun edhipanew ad maan pehendiyà te Ispanya ne edtuluy a ziyan te keniyu.

2 Kurintu 11:16

Edsublien ku te egkag̵i he kinahanglan he kenà isipa te minsan hentei keniyu he tulebung a tenged te menge lalag ku keniyu. Iyan, minsan ke ed-isipen niw he tulebung a, entusa niw te ebpemineg su wey a mekezantal te kenà utew egkeug̵et.

2 Kurintu 9:5

Ne tenged kayi neisip ku he kinahanglan he ed-insaan ku heini is tetelu he menge suled tew ke egkehimu he edhuna zan kediey pehendiyan su wey kew zan metevangi te kedteg̵enaha he zaan te idtavang he impenaad niw. Ne zutun egkehimu he egketeg̵ane en haazà dutun te kebpekeuma ku ne egketuenan te langun he umba ebeg̵ey kew, kenà tenged te ebpeg̵esen kew, kekenà, tenged te ebpuun diyà te keputian te atey niw is kebeg̵ey niw.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Pilipus 4:11

Kenà iyan igkeg̵iya ku kayi is tenged te zuen kurang ku te menge egkinehenglanen ku, su minsan ke kenà utew meupiya is kebpekesavuk ku, impenurù kedì te Megbevayà he kinahanglan he mebmeupiya g̵ihapun is gehinawa ku.

1 Tiselunika 2:5

Netuenan niw he kes menge lalag dey, kenà kedigdig dà. Kenà ibpenapì kes mid-ulaula zey ziyan. Is Megbevayà, iyan ebpeketistig̵us kayi.

1 Timoteo 3:3

Kenà sikandin lelenguten; kenà sikandin ebpemeg̵espeg̵es, kekenà, metulanged sikandin. Edlikayan din is samuk ne kenà susuaten te selapì.

1 Timoteo 6:10

Su ke zuen etew he susuaten te selapì ne egkehimu he egkeulaula kandin is minsan hengkey he mezaat. Pinaag̵i kayi neiniyug̵an te zuma is tuluuwen tew ne tenged kayi nehimu he utew mezakel is menge keseengan dan.

Tito 1:7

Ne g̵eina te insarig kandin te Megbevayà is kedumala te menge tumutuu, kinahanglan he wazà supak din. Kenà sikandin mebmandarmandar zà; kenà sikandin eengeren. Kinahanglan he kenà sikandin lelenguten, kenà sikandin ebpemeg̵espeg̵es ne kenà iyan dekelà diyà te g̵ehinawa zin is selapì.

Tito 3:14

Ipenurù nu ziyà te menge zuma nu he tumutuu ziyan he kinahanglan he iyan dekelà diyà te g̵ehinawa zan is ked-ulaula zan te meupiya wey zan metevangi is menge edlised. Kenà meupiya ke zuen tumutuu he peg̵ulen su wazà pulus dutun.

Hibriyuhanen 6:10

Su kenà egkehimu he kenà metazeng is kedsusiya keniyu te Megbevayà; su kenà egkehimu he egkelipatan din is langun he meupiya he mid-ulaula niw tenged te mahal sikandin diyà te g̵ehinawa niw su midtevangan niw is menge zuma tew he tumutuu ne minsan guntaan wazè niw engkezi is kedtevangi niw kandan.

1 Pedro 5:2

Ne iyan idhangyù ku keniyu is: purungi niw elimahi is menge tumutuu he insarig keniyu te Megbevayà. Iring sikandan te menge kerehidu zin. Iyan kew edumala kandan, kenà iring te ebpeg̵esen kew, kekenà, kinahanglan he ebpuun te meliwanag he g̵ehinawa niw su iyan haazà egkesuatan te Megbevayà. Kinahanglan he kenà iyan dà id-elimahi niw kandan is tenged te edsuhulan kew zan, kekenà, tenged te egkesuat kew he edtavang kandan.

2 Pedro 2:15

Nengetazin en is isip dan su midsuwey zan en te tutuu he ibayà. Iyan ibayà he ed-ikulen dan is mezaat he paag̵i zengan ni Belaam he anak ni Busur. Iyan dekelà diyà te g̵ehinawa ni Belaam is selapì he idsuhul kandin ke mezaat is ed-ul-ulahan din.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.

Hudas 1:11

Kehizu zan! Mid-iringan dan is mid-ulaula zengan ni Kain. Mid-iringan dan is paag̵i ni Belaam he utew sayep su minsan netuenan dan he mezaat is ed-ul-ulahan dan, ed-ul-ulahan dan gihapun su susuaten sikandan te selapì. Iring te midsukul si Kuri te Mebevayà, midsukul zan daan ne edsilutan sikandan iring te midsilutan daan si Kuri.