Pilipus 2:11 - Manobo Western Bukidnon

¹¹ ne ebpekekag̵i zan he iyan si Jesu Kristu Nengazen te minsan hengkey. Ne pinaag̵i kayi egkevantug dan daan is Amey tew he Megbevayà.

Pilipus 2:11 Cross References

Mateo 10:32

Sikan is egkag̵i ziyà te menge etew he iyan a egalen din, ed-engkenen ku zaan sikandin diyà te etuvangan te Amey ku he ziyà te langit.

Lucas 2:11

Su kayi te kezukileman in-anak diyà te Bitlihim he iyan inged ni Hadì David dengan, is Nengazen he iyan kes mibpilì te Megbevayà he ibpahadì. Iyan sikandin edlibri keniyu te silut te Megbevayà.

Juan 12:42

Ne minsan pa zutun mezakel is nemeketuu ki Jesus he menge punuan he menge Hudiyu, iyan, wazè dan keg̵iya he neketuu zan kandin su nahandek dan te menge Perisiyu su kela ke ewaa is ketenged dan te kedseled te menge simbahan.

Juan 13:13

Iyan niw id-umew kedì is Menunudlù wey Egalen, ne hustu en heeyan su iyan a iyan egalen niw.

Juan 13:14

Ne siak is menunudlù wey egalen niw, emun engayan a he ebpenlùlù te menge paa niw te menge sakup ku, kinahanglan he ebpelùlùluey kew te menge paa te uman sevaha keniyu.

Juan 14:13

Ke zuen ebuyuen niw kediey tenged te kedtuu niw kediey, ebeelan ku su wey mevantug is Amey ku tenged kediey.

Juan 14:23

Ne midtavak si Jesus te, “Ke zuen etew he mahal a ziyà te g̵ehinawa zin, edtumanen din is menge sug̵ù ku, ne zutun mahal sikandin diyà te g̵ehinawa te Amey ku. Ne siak wey is Amey ku, edhendiyè key te kandin ne ziyà key ed-ubpà te kandin.

Juan 17:1

Ne hein nekepasad si Jesus dutun he egkag̵i, midlingahà diyà te langit ne ke sikandin te, “Amà, iyan en heini sikan is netagnà he timpu. Ipeehè nu en is dekelà he bentug̵an ku te Anak nu wey ku zaan ikepaahà is kezekelà te kenikew he bentug̵an.

Juan 20:28

Ne zutun midtavak si Tomas te, “Iyan ka Nengazen ku, iyan ka Megbevayè ku!”

Juan 5:23

su egkesuatan din he edtehuzen a te langun he menge etew iring te kedtehuza zan kandin. Ne is minsan hentei he kenè e zin edtehuzen, is kenè din kedtahud kediey, iyan daan kenè din kedtahud te Amey ku he Megbevayà he midsug̵ù kedì.

Juan 9:22

Umba iyan haazà tavak dutun te menge g̵inikanan din su nahandek dan te menge punuan he Hudiyu su neuyun en he zaan is menge punuan he ke zuen egkag̵i he iyan si Jesus sikan is mibpilì te Megbevayà he ibpahadì, ne haazà is egkag̵i, kenè dan en ibpeseled te menge simbahan dan.

Nengeulaula 10:36

Netuenan niw en is Meupiya he Tudtulanen he impesavut te Megbevayà kenami te menge kevuwazan ni Israyil su pinaag̵i ki Jesu Kristu he iyan Nengazen te langun he menge etew, impesavut din he egkeawà is pauk te Megbevayà kenitew.

Nengeulaula 2:36

Na,” ke si Pedro, “kinahanglan he edsevuten tew te langun he menge kevuwazan ni Israyil he si Jesus, sikan is inransang niw te krus, midhimu en te Megbevayà he Nengazen wey hadì tew te langun.”

Ruma 14:11

Su zuen insurat he Lalag te Megbevayà, ne zutun migkag̵i is Nengazen te, “Iyan a wazè din kemetayen he Megbevayà ne tenged kayi tutuu iyan he edluhuzan a te tivuuk he menusiyà, ne ebpekeazap kediey is langun.”

Ruma 14:9

Su umba mibpehimatey si Kristu wey nevanhew sikandin su wey mekevayàbayà sikandin te menge tumutuu kandin he uuyag pa wey minatey en.

Ruma 15:9

Ne elin daan ketezengan ke maan is neulaula heini su wey sikiyu is kenà menge Hudiyu, mehizuwi kew zaan te Megbevayà ne tenged kayi ebpekezalig kew zaan kandin. Su zuen insurat he lalag ni Kristu ziyà te Megbevayà he edhenduen te, “Siak wey is menge etew he kenà menge Hudiyu, utew zekelà is kebpeselemati zey kenikew ne egkentahan ku is kedalig kenikew.”

1 Kurintu 12:3

Ne tenged kayi ibpesavut ku zaan keniyu he ke zuen etew he ed-ulinan te Wag̵as he Mulin-ulin, kenà egkehimu he egkeg̵iyen din he zait he edrewaken si Jesus, ne iring din ded daan kenà egkehimu he egkeg̵iyen din he Nengazen din si Jesus emun kenà pinaag̵i te ked-ulini kandin te Wag̵as he Mulin-ulin.

1 Kurintu 15:47

Ne haazà is nehuna he etew he si Adan, linimbag sikandin ne is limbag̵an din ne iyan is tanà, iyan, haazà is etew he ed-ilis kandin he iyan si Kristu, ne ebpuun sikandin mulà diyà te langit.

1 Kurintu 8:6

Ne minsan pa zutun, sikitew, netuenan tew mulà he sebsevaha zà is kenitew he Megbevayà he iyan Amey tew he nenlimbag te minsan hengkey. Iyan sikandin edlingahaan tew te minsan hengkey he timpu. Ne sebsevaha zà daan is Nengazen tew he iyan si Jesu Kristu. Pinaag̵i kandin nelimbag is minsan hengkey, ne pinaag̵i zaan kandin mibeg̵ayan kiw en te veg̵u en he untung.

1 Pedro 1:21

Pinaag̵i kandin neketuu kiw te Megbevayà. Mibanhew sikandin te Megbevayà ne midhimu zin sikandin he utew lavew. Ne tenged kayi iyan edserig̵an tew g̵untaan is Megbevayà ne ebpekeperateng kiw he edhimuwen kiw zin daan he utew lavew.

1 Juan 4:15

Ne ke zuen minsan hentei he egkag̵i he edtuuwan din he Anak te Megbevayà si Jesus, diyà ed-ubpà te kandin is Megbevayà ne nekidsevaha sikandin te Megbevayà.

1 Juan 4:2

Is minsan hentei he mulin-ulin he egkag̵i he mibpeetew si Jesus is mibpilì te Megbevayà he ibpahadì, ne ziyà ebpuun haazà is mulin-ulin te Megbevayà. Pinaag̵i kayi egketuusan niw is mulin-ulin he ebpuun te Megbevayà.

2 Juan 1:7

Mezakel is nemenlepew he ebpenurù te tarù dini te kelibutan. Egkeg̵iyen dan he si Jesus is mibpilì te Megbevayà he ibpahadì, wazà sikandin mehimu he etew. Is minsan hentei he iyan haazà egkeg̵iyen dan, teruen sikandin wey kuntada ni Kristu.

Impezayag 3:5

Is minsan hentei he ebpekezaag ki Setanas, edsun-uzan sikandin te meputì ne kenè ku ebpenasen is ngazan din diyà te libru he zutun isurat is menge ngazan te ebeg̵ayan te untung he wazà pidtemanan. Ne ziyà te etuvangan te Amey ku he Megbevayà wey is menge velinsug̵uen din, ed-engkenen ku sikandin he g̵aked ku.