Pilipus 1:21 - Manobo Western Bukidnon

²¹ Ne tenged te egkesuatan ku he mezalig si Kristu, egkesuatan ku he mebmelug̵ayad pa is ked-ubpaubpè ku zini te kelibutan su wey mevantug ku pa si Kristu, iyan, ke ebpatey a ne lavew pa he ibmeupiya ku.

Pilipus 1:21 Cross References

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

1 Kurintu 3:22

Sikami si Pablo wey si Epulus wey si Pedro zaan, iyan key nehimu te Megbevayà he menge sulug̵uen niw su wey kew mezeyzey. Ne minsan is tivuuk he kelibutan wey is egkeulaula keuzemà, wey is egkeulaula g̵untaan wey minsan is untung niw wey kebpatey niw, imbeg̵ey zaan heini is langun te Megbevayà wey kew mezeyzey.

2 Kurintu 5:1

Is lawa ta, ne iring te valey he egkeubpaan ta. Ne netuenan ta he ke egkerundus heini is baley, duen baley he egkeubpaan ta ziyà te langit he iyan is beg̵u he lawa he ibeg̵ey te Megbevayà. Kandin he vaal heini ne wazè din pidtemanan.

2 Kurintu 5:6

Tenged dutun, layun meheg̵et is kedsarig dey te Nengazen. Netuenan ta he te kemulu ki pa kayi te kelibutanen he lawa, kenè ki pa ziyà te ed-ubpaan te Nengazen.

2 Kurintu 5:8

Layun mezesen is kedsarig ta te Nengazen ne egkesuatan ta pezem he meewai ta heini is kelibutanen he lawa su wey ki mekeulì diyà te Nengazen.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Gelasya 6:14

Siak mulà, iyan ku zà ibpezalig is Nengazen tew he si Jesu Kristu he mibpehimatey he elili kenitew. Ne tenged te kebpehimatey zin, wazè e en meuripen te menge kelibutanen he kebayà, ne wazè en kayi g̵ehem te kebayàbayà kediey.

Pilipus 1:20

Ne utew ku egkesuati, wey idsarig ku ziyà te Megbevayà he layun ku metuman is ebpeveelan din kedì su wey a kenà meeled te minsan keenu he timpu lavew en guntaan. Egkesuatan ku he mezalig si Kristu tenged kedì pinaag̵i te kebpaawaa kedì kayi te pirisuwan ne emun kenà, ne mezalig si Kristu pinaag̵i te kebpatey ku.

Pilipus 1:22

Kenè ku egketuenan ke hendei zapit is meupiya he ebpilien ku, su egkesuatan ku he metapus en is ked-ubpaubpè ku zini te kelibutan wey a mekepekidume en ki Kristu su meupiya pa utew haazà. Iyan, ke zuen pa ebpeveelan kedì he ebpulus, meupiya zaan.

Pilipus 2:21

Is duma, ne iyan dà egkeisip dan is kandan dà he egkesuatan, ne kenà iyan is egkesuatan ni Jesu Kristu.

Kulusas 3:4

Umba, menge suled, emun edlikù dini si Kristu he iyan puunà te veg̵u he untung ta, ibpeg̵awag̵awa is kekempet din ne ibpeg̵awag̵awa zaan dutun is kekempet te kenita he veg̵u he untung su zutun duma ki kandin.

Impezayag 14:13

Ne zutun nezineg ku is egkag̵i ziyà te langit te, “Isurat nu heini: Utew mulà meupiya is egkengeulaula te menge etew he ebpatey ke menge tumutuu sikandan te Nengazen.” “Benar iyan,” egkag̵i is Wag̵as he Mulin-ulin. “Utew zan en egkengelipey su wazè en igkehag̵ù dan ne ebpekehimeley sikandan. Ne zutun edsuhulan sikandan tenged te menge meupiya he menge vaal zan.”