Pilimun 1:16 - Manobo Western Bukidnon

¹⁶ Ne g̵untaan kenà sikandin uripen nu zà duen, kekenà, utew pa mahal kenà is uripen su suled nu en daan tenged te kedtuu zin ki Kristu. Utew sikandin mahal zini te g̵ehinawa ku ne mahal pa zaan diyan te kenikew, kenà tenged dà te uripen nu, kekenà, tenged daan te suled nu en tenged te Nengazen.

Pilimun 1:16 Cross References

Mateo 23:8

Kenè niw itug̵ut he iyan id-umew keniyu is ‘menunudlù’ su teltelesuled kew is langun ne sebsevaha zà is menunudlù niw he iyan a.

Nengeulaula 9:17

Ne zutun migenat si Eneniyas ne midhendutun te valey ne hein nekeseled midepenetan din si Seulu te egkag̵i te, “Sikew Seulu, is suled ku, midsug̵ù a zini te Nengazen he si Jesus he mibpaahà kenikew ziyà te imbayè nu. Impehendini e zin su wey mepuwasi en is ked-ehè nu, wey ka meulini te Wag̵as he Mulin-ulin.”

1 Kurintu 7:22

Minsan ke uripen ka zutun te kedhimuwa kenikew he tumutuu te Nengazen, iyan ked-ahaa zin kenikew is kenè ka uripen. Ne iring din ded daan, minsan pa ke kenè ki uripen, emun tumutuu ki te Nengazen ne uripen ki g̵ihapun ni Kristu.

Kulusas 3:22

Ne sikiyu is sulug̵uen, layun niw pemineg̵a is sug̵ù te egalen niw te minsan keenu he timpu, ne kenà dutun dà te timpu he ebentayan kew zin. Ne kenè niw iyan dà ibpemineg̵a kandin su wey meupiya is isip din keniyu, kekenà, kinahanglan he iyan ketezengan ke maan is ebpurungan niw is baal niw su g̵eina te zekelà is kedtahud niw te Nengazen tew.

1 Timoteo 6:2

Ke tumutuu ki Kristu is egalen, kinahanglan he kenà maawà is kedtahud kandin te sulug̵uen din he tumutuu tenged te telesuled dan pinaag̵i ki Kristu. Kinahanglan he tuwas pa he meupiya is baal te sulug̵uen din tenged te tumutuu wey minahal te Megbevayà sikan is egketevangan dan pinaag̵i te vaal zan. Iyan heini ipenurù nu wey ipesavut nu ziyà te menge tumutuu.

Hibriyuhanen 3:1

Ne tenged kayi, menge suled ku te kedtuu, mid-umbita kew zaan te Megbevayà wey kew mekeubpà keuzemà diyà te langit. Purungi niw isipa si Jesus. Iyan sikandin kes midsug̵ù te Megbevayà dini te kelibutan wey sikandin mehimu he lavew he memumuhat he edtavang kenitew kayi te kebpesakup tew te Megbevayà.

1 Juan 5:1

Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì. Ne emun ebmahalen din diyà te g̵ehinawa zin is Amey tew he Megbevayà ebmahalen din daan is menge zuma zin he anak te Megbevayà.