Nengeulaula 2:4 - Manobo Western Bukidnon

⁴ Ne mibpurungan ulini te Wag̵as he Mulin-ulin is kada sevaha kandan, ne netekewtekew zan pintezi te menge kineg̵iyan he kenè dan egketuenan sumalà is gehem he imbeg̵ey kandan te Wag̵as he Mulin-ulin.

Nengeulaula 2:4 Cross References

Mateo 10:19

Ne emun ed-uwiten kew zan diyà te hukmanan, kenè niw ikeseeng ke hengkey is egkeg̵iyen niw wey ke hengkey is paag̵i te kegkag̵i niw, su wey niw en egketuenan ke ziyè kew en te etuvangan dan su zutun ibeg̵ey keniyu is hustu he egkeg̵iyen niw.

Marcos 16:17

Ne sikan is etew he edtuu kediey, duen menge singyal he egkehimu zan. Pinaag̵i te keg̵ehem te ngazan ku igkepeg̵uwè dan is menge mezaat he mulin-ulin he ebpenlalung te menge etew. Ne ebpekekag̵i sikandan te kineg̵iyan he kenè dan egketuenan.

Lucas 1:15

su utew zekelà is pid-etawan din sumalà is ked-isipa kandin te Nengazen. Kenà sikandin ed-inum te vinu wey minsan hengkey he ebpekelangut. Ne puun dà dutun te kenè pa sikandin id-anak egkepurung sikandin egkeulini te Wag̵as he Mulin-ulin.

Lucas 1:41

Ne hein nezineg ni Elisabet haazà is kebpenelehuzan ni Maria ne midredsà medleg̵uwat haazà is batà diyà te g̵etek ni Elisabet. Ne zutun nepurung si Elisabet meulini te Wag̵as he Mulin-ulin.

Lucas 1:67

Ne zutun nepurung meulini is amey zin he si Zacarias te Wag̵as he Mulin-ulin ne migkag̵i zin haazà is impinted kandin ne ke sikandin te,

Lucas 12:12

Su is Wag̵as he Mulin-ulin, iyan ebpenurù keniyu zutun he timpu; ne egketag̵ù diyà te g̵ehinawa niw is ibpekag̵i zin keniyu.”

Lucas 21:15

Su iyan e en metau te idtavak niw te menge insè dan. Ne ibeg̵ey ku zutun keniyu is ketau te ked-isip-isip wey kew meketavak. Ne zutun haazà is menge kuntada niw, kenè dan ebpeketavak te ketezengan niw ne kenè dan daan ebpekepeg̵intarù te tutuu he egkeg̵iyen niw.

Lucas 4:1

Ne hein nebewtismuwan en si Jesus, mid-awà sikandin dutun te wahig he Hurdan. Nepurung sikandin meulini te Wag̵as he Mulin-ulin ne mid-uwit sikandin te Wag̵as he Mulin-ulin pehendiyà te tanà he wazà duen ed-ubpà he etew.

Juan 14:26

Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Juan 20:22

Ne te nekag̵i zin heini midhiyupan din sikandan ne ke sikandin te, “Berakat he meulini kew te Wag̵as he Mulin-ulin.

Nengeulaula 1:5

Te timpu pa ni Juan, wahig is imbewtismu zin te menge etew. Iyan, mekepira zà guntaan iyan kebewtismuwi keniyu is: edlumunan is kada sevaha keniyu te Wag̵as he Mulin-ulin.”

Nengeulaula 1:8

Iyan,” ke si Jesus, “ebeg̵ayan kew zin te g̵ehem emun egkelumunan kew en te Wag̵as he Mulin-ulin, ne is tudtul te keag̵i ku, idsangyew niw zini te Hiruselim wey id-eneb niw zini te prubinsya he Hudiya wey ziyà daan te prubinsya he Semarya wey minsan hendei zini te egketemanan te kelibutan.”

Nengeulaula 10:46

Su is menge Hudiyu zutun, nezineg dan haazà is menge kenà Hudiyu he ebpendalig te Megbevayà wey netekewtekew zan pintezi te menge kineg̵iyan he wazè dan dutun hanew ke hengkey haazà is egkeg̵iyen dan.

Nengeulaula 10:47

Ne zutun migkag̵i si Pedro te, “Heini is menge etew he kenà menge Hudiyu, mibeg̵ayan daan sikandan te Wag̵as he Mulin-ulin iring te sikitew is menge Hudiyu. Ne tenged kayi kenà egkehimu he kenà sikandan egkebewtismuwan.”

Nengeulaula 11:15

Ne ke si Pedro te, “Hein edweliyan ku en sikandan, dutundutun mibulusan sikandan ne mid-ulinan sikandan te Wag̵as he Mulin-ulin iring kenitew te menge Hudiyu zutun te aney kiw en ulini.

Nengeulaula 11:24

Ne si Bernabe, meupiya is ulaula zin, ne meheg̵et is ked-ulini kandin te Wag̵as he Mulin-ulin ne meheg̵et daan is kedtuu zin te Megbevayà, ne mezakel zutun is nemeketuu te Nengazen tew he si Jesus.

Nengeulaula 13:52

Ne is menge sumusundan ni Jesus he netag̵ak diyà te inged he Entiyukya, mid-ulinan te Wag̵as he Mulin-ulin ne utew zekelà is kelipey zan.

Nengeulaula 13:9

Ne si Seulu he egngezanan daan ki Pablo, nepurung sikandin ulini te Wag̵as he Mulin-ulin. Midtengtengan din haazà is selemengkiru

Nengeulaula 15:8

Ne is Megbevayà, impeehè din kenitew is kedewata zin te kenà menge Hudiyu su imbeg̵ey zin kandan is Wag̵as he Mulin-ulin iring te kebeg̵aya zin dini te kenitew. Nesayud sikandin te minsan gehinawa tew te menusiyà.

Nengeulaula 19:6

Ne zutun mibpendepenetan ni Pablo te velad din is menge purù dan, ne mid-ulinan sikandan te Wag̵as he Mulin-ulin ne netekewtekew zan mekekag̵i te menge kineg̵iyan he kenè dan egkesavut. Ne midtudtul zan is impesavut kandan te Megbevayà.

Nengeulaula 2:11

Duen daan menge tigKrita wey menge tig-Erabya. Ne minsan pa te kenà ebpeked-iiring is kineg̵iyan tew, is kada sevaha kenitew, nesavut din is egkeg̵iyen su kandin he keugelingen he kineg̵iyan is egkeg̵amit kayi te menge tigGeliliya. Ne impesavut dan kenitew is utew meupiya he egkein-inuwan he vaal te Megbevayà,” ke sikandan.

Nengeulaula 2:3

Ne zutun nengeehè dan is henduen be te menge regreg te hapuy he nekedsisiveysivey he nemekeuntud te kada sevaha kandan.

Nengeulaula 4:31

Ne hein nekeampù dan, ne neg̵ezam dan he egkehuyung haazà is baley he netig̵uman dan. Ne mibpurungan ulini te Wag̵as he Mulin-ulin is kada sevaha kandan, ne wazè dan ikehandek is kedsengyawa zan te Lalag te Megbevayà.

Nengeulaula 4:8

Ne zutun midtavak si Pedro is nepurung ulini te Wag̵as he Mulin-ulin, ke sikandin te, “Sikiyu is menge punuan wey ebmeg̵urangen dey,

Nengeulaula 6:3

Umba, menge suled,” ke sikandan, “meupiya ke ebpilì kew te pitu he menge zuma niw he telehuzen. Kinahanglan he iyan ebpilien is menge maama he memetau he netuenan niw he nepurung sikandan ulini te Wag̵as he Mulin-ulin. Ne ibeg̵ey zey ziyà te kandan is keg̵ehem te kebahinbahin.

Nengeulaula 6:5

Ne hein nezineg haazà te menge tumutuu, nengesuat dan dutun te sambag te menge epustul. Ne mibpilì dan si Esteban. Ne si Esteban, utew mezesen is kedtuu zin wey nepurung sikandin ulini te Wag̵as he Mulin-ulin. Ne elin dutun te nepilì dan si Felipe, si Pukuru, si Nikenur, si Timen, si Perminas, wey si Nikulas he tig-Entiyukya. Ne haazà si Nikulas, kenà Hudiyu, iyan, neketuu zengan te tinuuwan te menge Hudiyu.

Nengeulaula 6:8

Ne si Esteban, midtuvazan sikandin te Megbevayà ne zekelà is gehem din. Mezakel is menge egkein-inuwan wey menge singyal he ingkepeehè din diyà te menge etew.

Nengeulaula 7:55

Ne si Esteban, nepurung sikandin ulini te Wag̵as he Mulin-ulin ne midlingahà diyà te langit ne neehè din is mekeg̵eg̵ehem he anlag te Megbevayà. Ne elin dutun neehè din si Jesus he ziyà edhithitindeg te zapit te egkekewanan te Megbevayà.

Nengeulaula 8:17

Ne midepenetan sikandan ni Pedro wey ni Juan ne puun dutun mid-ulinan sikandan te Wag̵as he Mulin-ulin.

Nengeulaula 9:17

Ne zutun migenat si Eneniyas ne midhendutun te valey ne hein nekeseled midepenetan din si Seulu te egkag̵i te, “Sikew Seulu, is suled ku, midsug̵ù a zini te Nengazen he si Jesus he mibpaahà kenikew ziyà te imbayè nu. Impehendini e zin su wey mepuwasi en is ked-ehè nu, wey ka meulini te Wag̵as he Mulin-ulin.”

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

1 Kurintu 12:10

Ne ziyè pa te sevaha, ibeg̵ey zaan te Wag̵as he Mulin-ulin is gehem wey mekehimu sikandin te menge egkengein-inuwan; ne ziyà te zuma pa ibeg̵ey is ketau te kedseysaya te impesavut kandin te Megbevayà; ne te zuma pa ibeg̵ey kandin is kegketueni te ed-ulin, ke ebpuun be te Megbevayà is ed-ulin wey ke mezaat he mulin-ulin ve haazà. Ne zuen daan menge etew he ebeg̵ayan te Megbevayà te ketau te kegkag̵i te kineg̵iyan he kenè dan egketuenan. Ne zuen daan menge etew he ibeg̵ey kandan is ketau te kedluwas duen te egkeg̵iyen kayi.

1 Kurintu 13:1

Minsan ke ebeg̵ayan a te ketau te kegkag̵i te menge kineg̵iyan dini te kelibutan wey minsan is kineg̵iyan te menge velinsug̵uen diyà te langit, ne kenè ku ebmahalen is menge zuma ku, wazà pulus din su iring dà haazà is kegkag̵i ku te zag̵ing te ag̵ung etawa kulingtangan.

1 Kurintu 13:8

Haazà is ketau te kedseysey te impesavut te Megbevayà, ne zuen timpu he egkeawà. Ne haazà is ketau te kegkag̵i te selakew he kineg̵iyan, ne egkeawà daan, ne iring din ded daan haazà is kegkesavut te menge mezalem he penurù su egkeawà daan. Iyan, is kebmahala te zuma he etew he ibeg̵ey te Megbevayà, ne kenà egkeawà su wazè din pidtemanan.

1 Kurintu 14:18

Ebpeselematan ku te Megbevayà is kebpekekag̵i ku te kineg̵iyan he wazà duen egketau. Mezakel is kediey he kegemita kayi te ketau kenà is keniyu.

1 Kurintu 14:5

Egkesuatan ku pezem he ikeveg̵ey keniyu te langun is ketau te kegkag̵i te kineg̵iyan he kenè niw egketuenan, iyan, utew pezem deyzey ke igkeveg̵ey keniyu is ketau te kedseysey te ibpesavut te Megbevayà. Su zekelà is pulus te kedseysey te ibpesavut te Megbevayà, kenà te kegkag̵i te kineg̵iyan he kenà egketuenan, asal, duen ded daan pulus kayi ke zuen ebpekeluwas su zutun ebpeketavang te langun he menge tumutuu haazà is egkeg̵iyen.

Ipisu 3:19

Berakat he mesavut niw is gag̵ew zin keniyu, minsan pa te kenà heini egkepurung egkesavut te minsan hentei. Egkesuatan ku heini su wey metuman diyan te keniyu is wazè din kurang he kegkeulini keniyu te Megbevayà.

Ipisu 5:18

Kenè kew mebpelelangut te vinu su ebpekezezaat heini keniyu, kekenà, kinahanglan he egkepurung kew egkeulini te Wag̵as he Mulin-ulin.

Ipisu 6:18

Pekezesen kew ampù te minsan hengkey he timpu sumalà is ked-uwita keniyu te Wag̵as he Mulin-ulin. Buyù kew te tavang te Megbevayà ne layun kew andam ne peniguduwi niw layun te ked-ampù is langun he menge tumutuu.

1 Pedro 1:12

Impezayag kandan te Megbevayà he kenà kandan he ibmeupiya haazà is netagnè dan dutun, kekenà, kenitew g̵untaan. Ne g̵untaan impesavut en keniyu is tutuu mehitenged dutun te netagnè dan. Duen menge etew he midsug̵ù te Megbevayà su wey zan metudtul keniyu is Meupiya he Tudtulanen. Mid-ulinan sikandan te Wag̵as he Mulin-ulin he midsug̵ù te Megbevayà. Ne heini is impesavut dan keniyu, minsan is menge velinsug̵uen te Megbevayà ziyà te langit, egkesuatan dan he mesavut dan heini.

2 Pedro 1:21

Su heini is penurù, wazà diyà dà mebpuun te isip te etew zà duen, kekenà, impinted te Megbevayà. Mid-ulinan te Wag̵as he Mulin-ulin is ebpemeneuven dengan, ne is menge lalag dan, iyan impekag̵i kandan te Megbevayà.