Nengeulaula 13:1 - Manobo Western Bukidnon

¹ Ne zuen menge tumutuu ziyà te inged he Entiyukya he menge menunudlù wey ebpemeneuven te Megbevayà. Dutun si Bernabe, si Simeon he migeraran daan te Meitem. Dutun daan si Lucio he tigSirini wey si Menain he ziyè en medekelà te turug̵an su impeelukuy ki Gubirnedur Hirudis hein batè pa. Ne zutun daan si Seulu.

Nengeulaula 13:1 Cross References

Mateo 27:32

Ne ziyà te zalan he ibayè dan nesinug̵ung dan is etew he tigSirini he egngezanan ki Simon. Ne mibpeg̵es dan haazà ipetiang duen te krus he edtiangen ni Jesus.

Lucas 3:1

Ne zutun te ikesepulù wey lelima he tuig te kedhadì ni Hadì Tibiryu ziyà te inged he Ruma duen impesavut te Megbevayà diyà te ki Juan he anak ni Zacarias. Ne ziyà si Juan te tanà he wazà duen ed-ubpà he menge etew. Ne zutun he timpu iyan gubirnedur ziyà te prubinsya he Hudiya si Punsyu Pilatu. Ne ziyà te prubinsya he Geliliya iyan gubirnedur si Hirudis. Ne si Felipe, is hazi ni Hirudis, iyan gubirnedur ziyà te menge prubinsya he Iturya wey Terekuniti. Ne si Lisanyas, iyan gubirnedur diyà te prubinsya he Ebilinya. Ne si Anas wey si Keyipas, ne iyan menge lavew he memumuhat diyà te inged he Hiruselim.

Nengeulaula 11:30

Ne mid-ulaula zan heini ne midsug̵ù dan si Bernabe wey si Seulu he iyan ibpahated te selapì diyà te menge ebmeg̵urangen te menge tumutuu ziyà te Hiruselim.

Nengeulaula 12:25

Ne mid-ulì si Bernabe wey si Seulu is ebpuun diyà te inged he Hiruselim hein neipus dan is mibpeveelan kandan, ne miduma zan daan si Juan, sikan is ed-umawen ki Marcos.

Nengeulaula 13:9

Ne si Seulu he egngezanan daan ki Pablo, nepurung sikandin ulini te Wag̵as he Mulin-ulin. Midtengtengan din haazà is selemengkiru

Nengeulaula 15:32

Ne si Hudas wey si Silas, ebpeneuven sikandan te Megbevayà, ne neug̵et is kebpekidlalag dan te menge tumutuu su midsembag̵an dan su wey meheg̵et is kezesen te kedtuu zan.

Nengeulaula 15:35

Ne neug̵et maan dutun is ked-ubpà ni Pablo wey ni Bernabe ziyà te Entiyukya. Sikandan wey is mezakel he menge zuma zan, impenurù dan wey impesavut dan is Lalag te Nengazen.

Nengeulaula 19:6

Ne zutun mibpendepenetan ni Pablo te velad din is menge purù dan, ne mid-ulinan sikandan te Wag̵as he Mulin-ulin ne netekewtekew zan mekekag̵i te menge kineg̵iyan he kenè dan egkesavut. Ne midtudtul zan is impesavut kandan te Megbevayà.

Nengeulaula 21:9

Duen heepat he menge anak din he rag̵a he ebpeneuven te Megbevayà.

Nengeulaula 4:36

Ne zuen duma zan he tigSipru he Hudiyu zaan he kevuwazan duen te tipehuna he si Levi. Iyan ngazan din si Jose ne migeraran te menge epustul ki Bernabe he ke và dà egkeg̵iya, ebpekeveg̵ey te kezesen te kedtuu.

Nengeulaula 9:1

Igkikinehendekè pa zutun si Seulu te menge sumusundan te Nengazen he si Jesus su ebpenhimetayan din sikandan.

Ruma 16:21

Is duma ku te edsangyew te Lalag te Megbevayà, si Timoteo, ebpengemusta keniyu ne henduen ded daan si Lucio, si Jason wey si Susipatru, is menge zuma ku he Hudiyu.

1 Kurintu 11:4

Ne tenged kayi, ke edtig̵um kew ziyà te simbahan ke zuen maama he ed-ampù wey ke edseysayen din be is impesavut kandin te Megbevayà, kinahanglan he puwasa zin is kalù din ke egkekalù sikandin su emun kenè din ebpuwasen haazà ne henduen be te kenà iyan si Kristu is ebayàbayà kandin.

1 Kurintu 13:2

Ne penenglitan ke ebeg̵ayan a te ketau te kedseysey te impesavut kedì te Megbevayà, ne egkesavut ku is minsan hengkey he kenà egkesavut te zuma wey is minsan hengkey he mezalem, ne minsan ke utew mezesen is kedtuu ku ne egkehimu he egkepengelinteuwan ku he mekehalin is buntud ne segugunà edhalin, iyan, ke kenà mahal zini te g̵ehinawa ku is menge zuma ku, ne wazè ku g̵ihapun pulus.

1 Kurintu 13:8

Haazà is ketau te kedseysey te impesavut te Megbevayà, ne zuen timpu he egkeawà. Ne haazà is ketau te kegkag̵i te selakew he kineg̵iyan, ne egkeawà daan, ne iring din ded daan haazà is kegkesavut te menge mezalem he penurù su egkeawà daan. Iyan, is kebmahala te zuma he etew he ibeg̵ey te Megbevayà, ne kenà egkeawà su wazè din pidtemanan.

1 Kurintu 14:29

Ne iring din ded daan haazà is menge etew he edseysey te impesavut kandan te Megbevayà su egkehimu he zezuwa zà ne emun kenà ne tetelu is egkag̵i. Ne kinahanglan he ebpemineg is langun ne ed-isipen dan ke hustu ve wey ke kenà haazà is egkeg̵iyen.

1 Kurintu 14:32

Su is etew he ebpeneuven te Megbevayà, egkehimu zin te ed-eg̵en is gehinawa zin su wey kenà sikandin mekeredsà dutun te egkag̵i he iring din he ebpeneuven daan te Megbevayà.

1 Kurintu 9:6

Ne egkehimu ve he iyan key zà ki Bernabe wazè din ketenged te kebuyù te igkeuyag dey ziyà te ebpekezawat te menge penurù dey?

Gelasya 2:13

Ne iring din ded daan dutun is mid-ulaula te zuma he menge tumutuu he Hudiyu su midlikey zan daan, ne minsan si Bernabe, ne neuwit daan dutun.

Gelasya 2:9

Ne si Santiago, si Pedro, wey si Juan, haazà is menge egalen dutun, hein nesavut dan he insarig kediey te Megbevayà heini is baal ku, mibpekigkumusta zan kenami ki Bernabe he tuus te teltelezuma key pudu is edtuman te ebpeveelan te Megbevayà. Neuyunan dey he iyan key ebpenudtul ziyà te menge etew he kenà Hudiyu ne iyan dan ebpenudtul ziyà te menge Hudiyu.

Ipisu 4:11

Iyan menge ketau he imbeg̵ey zin kenitew is: is duma, midhimu zin he epustul; ne is duma, midhimu zin sikandan he peneuva te Megbevayà; ne is duma, ne imbeg̵ey zin kandan is ketau wey zan ikesangyew is Meupiya he Tudtulanen; ne is duma pa, ne imbeg̵ey zin kandan is ketau wey zan meuwit wey mepenurù is menge tumutuu.

Pilipus 4:22

Ne is langun he menge zuma ku he tumutuu kayi te inged, lavew en is menge suled tew he zini ed-ubpà te valey te hadì, ebpengemusta zan daan keniyu.

1 Tiselunika 5:20

Kenè niw pesegdana is menge lalag te mid-ulinan,