Nengeulaula 10:11 - Manobo Western Bukidnon

¹¹ Neehè din is langit he nepuwasan ne zuen midteyuntun he iring te layag he utew meluag. Midhiketan is heepat he kilid din ne midteyuntun.

Nengeulaula 10:11 Cross References

Mateo 8:11

Ne kenè niw lipati heini is egkeg̵iyen ku he mezakel he etew he kenà menge Hudiyu he ziyà ebpemuun te meziyù, diyà te zapit te edsilaan wey ziyà te zapit te edsenlepan, ne ebpekidtug̵en dan keuzemà ki Abraham wey ki Isaak wey ki Hakub diyà te ginhedian te Megbevayà.

Juan 1:51

Ne mid-uman si Jesus megkag̵i kandin te, “Benar is egkeg̵iyen ku kenikew he egkeehè niw keuzemà is langit he egkepuwasan ne siak is Kakey te Menusiyà, duen egkengeehè niw he menge velinsug̵uen te Megbevayà he ebpememenahik wey ebpemenaug diyà te etuvangan ku.”

Juan 11:52

Ne kenà tenged te menge Hudiyu zà su netagnè din daan he pinaag̵i te kebpatey ni Jesus egkesevaha is langun he menge etew he egkehimu he menge anak te Megbevayà minsan hendei he inged.

Juan 12:32

Ne siak, emun ibayew ad pinaag̵i te tukud he ibpehitindeg, duen ibpekekabig ku te langun he menge etew.”

Nengeulaula 10:12

Ne zutun te seled is langun he menge kelasi te keranapranap, iring te menge langgam wey menge uled wey menge tagbis.

Nengeulaula 11:5

Ke sikandin te, “Diyà a te inged he Hupi is ed-ampù ne zuen impaahà kediey te Megbevayà. Neehè ku is midteyuntun he ebpuun te langit he iring te zekelà he layag he midhiketan is heepat he kilid din ne neketanà diyà te uvey ku.

Nengeulaula 7:56

Ne ke si Esteban te, “Ahaa niw man! Egkeehè ku en is langit he nepuwasan ne zutun is Kakey te Menusiyà he edhithitindeg te zapit te egkekewanan te Megbevayà.”

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

Ruma 9:4

Su menge kevuwazan daan sikandan ni Israyil; mid-anak-anak sikandan dengan te Megbevayà. Ne impeehè din kandan is mekeg̵eg̵ehem he anlag din, ne zuen menge midtukud din he paag̵i te kedtuvazi zin kandan, ne imbeg̵ey zin kandan is kesug̵uan, ne impenurù din kandan is paag̵i te ked-ezapa kandin. Ne mezakel pa is meupiya he penaad din kandan.

Gelasya 2:15

Ne impelaus ku haazà is lalag ku te, “Sikita is etew he in-anak he Hudiyu, ne kenè ki iring te menge etew he kenà Hudiyu he egngezanan ta he ‘menge mesinupaken’.

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Ipisu 1:10

edhimuwen din heini zutun te hustu he timpu. Su mid-isip te Megbevayà he zutun edhimuwen din he sebsevaha zà si Kristu he ebayàbayà te minsan hengkey he linimbag diyà te langit wey zini te tanà.

Ipisu 3:6

Ibpesavut ku keniyu heini is in-eles dengan he sikiyu is kenà menge Hudiyu, pinaag̵i te kedtuuwi niw te Meupiya he Tudtulanen, edtuvazan kew zaan te Megbevayà te langun he meupiya he idtuvad din te menge Hudiyu. Ne idragkes kew zaan dutun te lawa ni Kristu. Ne egkezawat niw is menge penaad te Megbevayà tenged te kebpekidsevaha niw ki Jesu Kristu.

Kulusas 3:11

Ne tenged kayi, sikita is midhimu zin he veg̵u he etew, wazè ta zapit ibpelavi te etew he Hudiyu wey te etew he kenà Hudiyu su neked-iiring diyà te Megbevayà is nesirkunsidar wey is wazà mesirkunsidar; neked-iiring daan diyà te kandin is neketunghà wey is wazà meketunghà, is sulug̵uen wey is egalen. Dini te kenitew te menge veg̵u he etew, iyan dà lavew si Kristu ne midlumunan ni Kristu is kada sevaha kenitew.

Impezayag 11:19

Ne ziyà te langit mibpuwasan is simbahan he Valey te Megbevayà ne naahà dutun te seled is kavan he midteg̵uan duen te insurat he menge pesarig te Megbevayà. Ne zutun neserasab is kilat, ne zuen utew memezag̵ing, ne mibpemeransì, ne midlinug, ne mibpenggiyew te utew zezekelà.

Impezayag 19:11

Ne zutun neehè ku is langit he nepuwasan ne zuen dutun kudà he meputì ne egkeserig̵an wey metinumanen is ed-untud dutun. Metazeng is kedhukum din ne metazeng daan is kebpekidtebek din te menge kuntada zin.

Impezayag 4:1

Ne zutun selakew en maan is impaahà kediey te Nengazen. Neehè ku is gemawan diyà te langit he nepuwasan. Ne zuen dutun egkag̵i ziyà te kediey ne haazà is egkag̵i ne iyan ded sikan is nezineg ku hein aney he henduen is kezag̵ing din te vudyung he edag̵ing. Ne ke sikandin te, “Hendini ka te zivavew ne ibpeehè ku kenikew is kinahanglan he egkeulaula keuzemà.”