Mateo 8:4 - Manobo Western Bukidnon

⁴ Ne migkeg̵iyan ni Jesus te, “Pemineg ka, Mama, kenè nu tudtula ziyà te minsan hentei, kekenà, pehendiyè ka g̵untaan te memumuhat he midhimu te Megbevayà wey zin maahà he neulian ka; ne tumana nu sikan is pemuhat he insug̵ù dengan ni Moises te it-iten, su wey metueni te langun he neulian ka iyan.”

Mateo 8:4 Cross References

Mateo 10:18

Ebpeg̵esen kew zan he mekeetuvang te menge gubirnedur wey menge hadì tenged te kedtuu niw kedì wey niw ikewali is Meupiya he Tudtulanen diyà te kandan wey ziyà daan te menge etew he kenà menge Hudiyu.

Mateo 16:20

Ne zutun mibpeketelteleenan ni Jesus is menge sumusundan din he kenè dan tudtula ziyà te minsan hentei he iyan sikandin sikan is mibpilì te Megbevayà he ibpahadì.

Mateo 17:9

Ne zutun te edtupang dan, mibeleuzan sikandan ni Jesus te, “Heini is neehè niw, kenè niw tudtula ziyà te minsan hentei taman te kenè e pa is Kakey te Menusiyà egkevanhew.”

Mateo 3:15

Ne midtavak si Jesus, ke sikandin te, “Kenà, su kinahanglan he ebeelan ta is iring kayi wey ta meveeli is langun he egkesuatan te Megbevayà.” Ne zutun human mebpezumazuma si Juan, ne mibewtismuwan din si Jesus.

Mateo 5:17

Kenè niw isipa he iyan inhendini ku te kelibutan is id-awè ku kes kesug̵uan he imbeg̵ey kenitew pinaag̵i ki Moises wey kes menge penurù dengan he imbeg̵ey pinaag̵i te menge ebpeneuven te Megbevayà. Umba nekehendini a su wey mepurungi te edtuman.

Mateo 6:1

“Kinahanglan he kenà iyan idsimbaha niw te Megbevayà su wey mezalig kew te menge etew. Su emun iyan heini ulaula niw, kenè kew edsuhulan keuzemà te Megbevayà he Amey tew ziyà te langit.

Mateo 9:30

Ne neulian is menge mata zan. Ne zutundutun nepuwasan is ked-ehè dan. Ne zutun migkeg̵iyan sikandan ni Jesus he kenè dan penudtula.

Marcos 13:9

Ne sikiyu, kinahanglan he purungi niw endama is gehinawa niw, su edekepen kew te menge etew ne ed-uwiten kew zan diyà te hukmanan ne ebug̵elen kew ziyà te menge simbahan dan. Ebpekeetuvang kew te menge gubirnedur wey menge hadì tenged te kedtuu niw kediey wey niw ikewali is Meupiya he Tudtulanen diyà te kandan.

Marcos 3:12

Ne zutun midawey ni Jesus haazà is menge mezaat he mulin-ulin ne migkeg̵iyan din sikandan he kenè dan ipesavut he Anak sikandin te Megbevayà.

Marcos 5:43

Ne mibeleuzan sikandan ni Jesus he kenè dan penudtula ke hengkey is neulaula. Ne migkeg̵iyan din daan sikandan he ipekaan dan haazà is anak dan.

Marcos 6:11

Ne ke zuen inged he kenè kew zuen igalewg̵alew wey kenè dan ebpemineg̵en is ibpesavut niw, ne tektaka niw is eliyavuk diyà te menge paa niw he iyan lag̵uy he edsilutan sikandan te Megbevayà.”

Marcos 7:36

Ne zutun migkeg̵iyan ni Jesus is menge etew zutun he kenè dan penudtula haazà is neehè dan he mibeelan din, iyan, nasì wazà meeren is tudtul zan mehitenged dutun te neehè dan.

Marcos 8:30

Ne zutun migkeg̵iyan sikandan ni Jesus he kenè dan tudtula haazà diyà te minsan hentei.

Marcos 9:9

Ne zutun te kedtupang dan, mibeleuzan sikandan ni Jesus te, “Taman te kenè e pa ebenhawen is Kakey te Menusiyà, kenè niw penudtula sikan is neulaula he neehè niw g̵eina.”

Lucas 17:14

Ne hein neehè din sikandan ne migkag̵i sikandin te, “Hendiyè kew en te menge memumuhat te Megbevayà wey zan maahà he nengeulian kew.” Ne nemenhipanew zan ne zutun te kegenat dan nengeulian segugunà sikandan.

Lucas 21:13

Iyan en heini paag̵i te kebpekepesavut niw te Meupiya he Tudtulanen.

Lucas 4:41

Ne minsan sikan is menge mezaat he mulin-ulin, impemaawè din dutun te menge etew he edlelungen dan. Nemekekulahì haazà is menge mezaat he mulin-ulin he egkag̵i te, “Iyan ka iyan sikan is Anak te Megbevayà!” Iyan, impeengked sikandan ni Jesus su wazè din itug̵ut he zuen egkeg̵iyen dan su netuenan dan he iyan sikandin kes mibpilì te Megbevayà he hadì.

Lucas 5:14

Ne zutun mibeleuzan sikandin ni Jesus te, “Kenè nu heini zè pa tudtula ziyà te minsan hentei he etew, kekenà, hendiyè ka g̵untaan te memumuhat he midhimu te Megbevayà wey zin maahà he neulian ka. Ne iveg̵ey nu kandin is ibpemuhat wey nu metuman sikan is insug̵ù dengan ni Moises su wey metueni te langun, he tutuu iyan he neulian ke en.”

Lucas 8:56

Ne utew ingkeinuinu te g̵inikanan dutun te vatà haazà is midhimu ni Jesus. Ne migkeg̵iyan sikandan ni Jesus he kenè dan tudtula haazà ziyà te minsan hentei.

Lucas 9:21

Ne zutun mibpeketelteleenan sikandan ni Jesus he kenè dan tudtula haazà diyà te minsan hentei.

Juan 5:41

Kenà ku iyan ebpengahaan is kegkezelig̵a kedì te menge etew

Juan 7:18

Su ke zuen etew he ibpenurù din is kandin dà he isip, ebpevantug dà te menge etew, iyan, is etew he ibpenurù din is kegkevantug te midsug̵ù kandin, egkeserig̵an is lalag din su kenà tarù is ibpenurù din.

Juan 8:50

Kenà a ebpevantug te minsan hentei, iyan, egkesuatan te Megbevayà he ebentug̵en a te menusiyà. Ibpeehè din he venar is menge ketezengan ku.