Mateo 21:15 - Manobo Western Bukidnon

¹⁵ Nengepauk is menge lavew he memumuhat wey menge menunudlù te kesug̵uan dutun hein neehè dan is egkengein-inuwan he mibeelan ni Jesus wey nezineg dan is menge vatà diyà te Valey te Megbevayà he ebpemenhabet egkag̵i te, “Tehuza is kevuwazan ni Hadì David!”

Mateo 21:15 Cross References

Mateo 20:24

Ne hein nezineg haazà duen te zuma zan he sepulù he sumusundan, wazè dan ikesuat is mibeelan dutun te zezuwa he telehazi.

Mateo 21:23

Midlikù si Jesus diyà te simbahan he Valey te Megbevayà ne mibpenurù din is menge etew zutun. Ne nemekeuma is menge lavew he memumuhat wey menge ebmeg̵urangen te menge Hudiyu zutun ne mid-insè dan ki Jesus te, “Heini is langun he ed-ul-ulahan nu zini te simbahan, duen nu ve ketenged te ked-ulaula kayi, wey hentei is mibeg̵ey kenikew te ketenged wey nu meulaula heini?”

Mateo 21:9

Ne mezakel he menge etew is midhuna ki Jesus, ne mezakel zaan is ebpemeninundug kandin, ne ke sikandan is ebpemengulahì te, “Edtehuzen tew is kevuwazan ni Hadì David. Delig̵a is nekeuma he midsug̵ù te Nengazen. Sikiyu is diyà te langit, tehuza niw zaan sikandin!”

Mateo 22:42

“Hengkey is isip niw? Kes mibpilì te Megbevayà he ibpahadì, hentei ki kevuwazan sikandin?” Ne midtavak dan te, “Kevuwazan sikandin ni Hadì David.”

Mateo 26:3

Ne zutun is menge punuan he memumuhat wey is ebmeg̵urangen te menge Hudiyu, midtig̵um dan diyà te turug̵an ni Keyipas he lavew he memumuhat

Mateo 26:59

Ne is menge punuan te memumuhat wey is langun he nengetig̵um he ebmeg̵urangen te menge Hudiyu, ebpen-ehè dan te salà he id-ulug dan ki Jesus su wey zan mehimetayi.

Mateo 27:1

Ne hein nepawà dutun is langun he menge punuan te menge memumuhat wey menge ebmeg̵urangen te menge Hudiyu, mid-uyunan dan ke ebmenmenuwen dan is paag̵i wey iketug̵ut kandan is kedhimetayi ki Jesus.

Mateo 27:20

Iyan, is menge punuan he memumuhat wey is menge ebmeg̵urangen, migkeg̵iyan dan is menge etew zutun he iyan dan hengyua he melibri si Berabas ne si Jesus, ibpehimetayan.

Mateo 9:27

Ne zutun te ked-awà ni Jesus dutun, midtelukun kandin is dezuwa he lakap. Ne haazà is menge lakap, mid-umew zan ki Jesus is edhangyù te, “Kehizuwi key kenikew, su iyan ka kes kevuwazan te hadì dengan he si David!”

Marcos 11:18

Ne nezineg haazà te menge punuan he memumuhat wey menge menunudlù te kesug̵uan is mibeelan ni Jesus. Nengehandek dan ki Jesus su utew nengesuat is mezakel he menge etew te kebpenurù din. Ne tenged kayi ebpen-ahaan te menge punuan is paag̵i he metug̵uti sikandan he igkepehimetayan dan si Jesus.

Lucas 20:1

Ne sevaha he andew zutun ne midlikù si Jesus diyà te zekelà he simbahan he egngezanan te Valey te Megbevayà ne mibpenurù din is menge etew, ne impesavut din kandan is Meupiya he Tudtulanen. Ne zutun mibeyaan sikandin te punuan te menge memumuhat wey menge menunudlù te kesug̵uan wey is menge ebmeg̵urangen te menge Hudiyu,

Lucas 22:2

Ne zutun, is menge punuan he memumuhat wey is menge menunudlù te kesug̵uan, ebpengahà te paag̵i te kegkehimetayi zan ki Jesus he kenà egketuenan te mezakel he menge etew su egkehandek dan te menge etew.

Lucas 22:66

Ne hein nepawà dutun, netig̵um is langun he menge ebmeg̵urangen te menge Hudiyu wey is menge punuan he menge memumuhat, wey is menge menunudlù te kesug̵uan, ne impeetuvang kandan si Jesus.

Juan 11:57

Ne insug̵ù he zaan te menge punuan he memumuhat wey menge Perisiyu he ke zuen egketau ke hendei si Jesus keg̵iya zin kandan wey zan ikepezakep.

Juan 12:19

Ne zutun migkag̵i is menge Perisiyu te, “Utew mezakel he menge etew is edsundan kandin! Wazè tew en bes egkehimu.”

Juan 4:1

Nezineg te menge Perisiyu is tudtul he mezakel is nengehimu ni Jesus he menge sumusundan wey mezakel is nengebewtismuwan ni Jesus kenà te ki Juan; asal wazà iyan si Jesus mebewtismu, kekenà, iyan is menge sumusundan din. Ne hein nezineg daan ni Jesus haazà he tudtul, mid-awà diyà te prubinsya he Hudiya ne mid-ulì diyà te prubinsya he Geliliya.

Juan 7:42

Su,” ke sikandin, “impesavut te insurat he Lalag te Megbevayà he is hadì he mibpilì te Megbevayà, ne kevuwazan te hadì dengan he si David, ne ziyè kun id-anak te inged he Bitlihim he inged daan dengan ni Hadì David.”