Mateo 2:13 - Manobo Western Bukidnon

¹³ Ne hein migenat en kes menge memimituen, mibpeteg̵einep en maan ki Jose is belinsug̵uen te Nengazen he egkag̵i te, “Enew kad, Jose. Ne uwita nu heeyan is batà wey iney zin ne pelag̵uy kew pehendiyà te Ihiptu. Ne zutun kew tag̵ad taman te kenè ku pa sikew egkeg̵iyan. Su ebpenahaan ni Hirudis heeyan is batà su edhimetayan din.”

Mateo 2:13 Cross References

Mateo 1:20

Ne zutun te kemulu zin pa ed-isipa is iring kayi, mibpeteg̵einep kandin is belinsug̵uen te Nengazen. Ne ke sikandin te, “Sikew Jose, is kevuwazan ni Hadì David, kenè ka melenew he ebpengesawa ki Maria su meg̵ingey sikandin pinaag̵i te g̵ehem te Wag̵as he Mulin-ulin.

Mateo 10:23

Ne emun ebpesipelahan kew zan diyà te sengeinged, pelag̵uy kew pehendiyà te sevaha he inged. Ne venar is egkeg̵iyen ku keniyu he te kenè niw pa egkepasad is ebpeveelan ku keniyu ziyà te langun he menge inged te nasud he Israyil ne edlikù e en is Kakey te Menusiyà.

Mateo 2:12

Ne impesavut kandan te Megbevayà pinaag̵i te teg̵einep he kenè dan en medlikù diyà te ki Hirudis. Ne tenged kayi, wazè dan en med-ikul zuen te imbayè dan dutun te ked-ulì dan.

Mateo 2:14

Ne zutun mid-enew si Jose, ne mid-uwit din haazà is batà wey si Maria, ne migenat dan dutun te mezukilem pehendiyà te Ihiptu.

Mateo 2:16

Ne hein netuenan ni Hirudis he mid-akal zà kandin kes menge memimituen, nepauk utew. Ne insug̵ù din he ibpepenhimetayan is langun he menge vatà he maama he ebpenuig̵en te zezuwa he tuig wey minus pa zutun te tivuuk he inged te Bitlihim wey is menge siringan dutun he inged. Midhimu zin heini su wey mepatey si Jesus su zezuwa en he tuig is kelug̵ayad puun te kegkeahaa te menge memimituen duen te vituen.

Mateo 2:22

Ne hein netuenan ni Jose he iyan hadì diyà te Hudiya si Ergilau he nekesunud te amey zin he si Hirudis, midlevayan dan is prubinsya he Hudiya su nahandek dan. Ne tenged te mibpeteg̵einep is Megbevayà he edsambag ki Jose, midlaus dan diyà te prubinsya he Geliliya.

Nengeulaula 10:22

Ne migkag̵i zan te, “Impehendini key ni Kepitan Cornelio. Metazeng sikandin he etew. Ed-azap sikandin te Megbevayà, ne telehuzen daan sikandin te langun he menge Hudiyu. Migkeg̵iyan sikandin te velinsug̵uen te Megbevayà te, ‘Ipaangey nu si Simon Pedro wey nu mezineg is ibpesavut din,’ ” ke sikandan.

Nengeulaula 10:7

Ne zutun mid-awà haazà is belinsug̵uen te Megbevayà. Ne segugunà midtawag ni Cornelio is dezuwa he menge sulug̵uen din wey is sundaru he sevaha zutun te menge sinerig̵an din. Ne heini he sundaru, ed-azap daan te Megbevayà.

Nengeulaula 12:11

Ne human mesavut ni Pedro he kenè bes teg̵einep dà haazà ne ke sikandin te, “Tutuu ves iyan he midsug̵ù te Nengazen is belinsug̵uen din ne midlibri e zin wey kenà a mekeizi te g̵ehem ni Hirudis. Nelibri ad guntaan te langun he mezaat he ed-ul-ulahan kedì he ebperetengen pezem te tivuuk he kehudiyuwan.”

Nengeulaula 12:7

Ne netekewtekew te zuen mibpaahà kandin he velinsug̵uen te Nengazen ne zuen daan neketayew zutun te seled te pirisuwan. Ne migewezan dutun te velinsug̵uen si Pedro ziyà te kilid ne migunggel zin ne mibpukew zin. Ke sikandin te, “Enew ka gaanggaan.” Ne zutundutun naawà is menge kedina ziyà te menge velad ni Pedro.

Nengeulaula 16:36

Ne zutun midtudtul haazà ki Pablo te ebantey te pirisuwan. Ke sikandin te, “Insug̵ù te menge upisyal he Rumanu he ibpaawà kew en ki Silas. Ne ebpekeawà kew en kun asal kinahanglan he wazà samuk.”

Nengeulaula 5:19

Ne zutun te mezukilem, netekewtekew puwasi te velinsug̵uen te Nengazen haazà is pirisuwan ne impaawè din dutun is menge epustul

Nengeulaula 7:19

Na,” ke si Esteban, “heini is hadì, mibpesipelahan din is menge kepuun tew wey mezaat is mid-ulaula zin kandan. Pinaag̵i te peg̵es impetimbag din te menge Hudiyu is menge anak dan he utew pa vatà diyà te meziyù wey mebpatey.

Impezayag 12:14

Ne haazà is bahi, mibeg̵ayan te Megbevayà te zezuwa he pakpak te zekelà he vanug su wey mekelayang wey mekeaput diyà te tanà he kenà ed-ubpaan te etew, ne zutun ed-elimahan sikandin seled te tetelu wey liwazà he tuig ne zutun kenè en egkekeizan dutun te uled.

Impezayag 12:4

Ne pinaag̵i te ikug din neg̵uyud din is iketelu he vahin te menge vituen diyà te langit ne nemeketimbag haazà diyà te tanà. Ne zutun edhithitindeg haazà is uled te etuvangan dutun te vahi he ed-anak su emun idlusad en haazà is id-anak din, ne egkeenen dutun te uled.

Impezayag 12:6

Ne haazà is bahi, nekepelag̵uy pehendiyà te tanà he kenà ed-ubpaan te etew, diyà te ed-eputan he mid-andam he zaan te Megbevayà. Ne zutun ed-elimahan te Megbevayà haazà is bahi seled te nengkelibu wey zezuwa he g̵atus wey keneman he andew he repeng te tetelu wey liwazà he tuig.