Mateo 13:3 - Manobo Western Bukidnon

³ Ne zutun mezakel is impenurù din kandan pinaag̵i te menge sempità. Ke sikandin te, “Duen etew he midhendiyà te pemuleey zin su ebpemula.

Mateo 13:3 Cross References

Mateo 13:4

Ne zutun te kebpemula zin duen benì he nengeulug diyà te zalan, ne heini migkaan te menge tagbis.

Mateo 13:53

Ne hein nepasad ni Jesus haazà is kebpenurua zin kandan kayi te menge sempità, mid-awà sikandin dutun ne

Mateo 22:1

Ne mid-uman mebpenurù si Jesus te menge etew pinaag̵i te menge sempità.

Mateo 24:32

Isipa niw is ibpenurù ku keniyu pinaag̵i te sempità he kayu he igira. Dini te kenita, emun ebpeneringsing en is subpang dutun he kayu ne ebpenlumbey en, egketuenan ta he meg̵aan en is gulavung.

Marcos 12:1

Ne impenurù en maan ni Jesus is menge sempità. Ke sikandin te, “Duen etew he zuen din tanà he mibpemulaan din te g̵awed he paras. Mid-alad din haazà, ne mibudsiyan din te meluag is dekelà he vatu su ebeelan din he keresà te wahig dutun te veg̵as te paras. Ne midlelawig te ed-ubpaan te ebantey zutun te perasan. Ne mibpeelimahan din haazà is perasan ne zutun midhendiyà te sengeg̵inhedian.

Marcos 12:12

Ne zutun, haazà is menge punuan te menge Hudiyu, nesavut dan he iyan sikandan ebpesumbingayan ni Jesus dutun te sempità he migkag̵i zin, ne ed-isipen dan en pezem edekepa si Jesus, iyan, wazè dan mehimu haazà is ed-isipen dan su nahandek dan te mezakel he menge etew. Ne zutun nepesagdan dan si Jesus ne mid-ewaan dan.

Marcos 3:23

Ne zutun, migkeg̵iyan ni Jesus haazà is menge etew he med-uvey zan diyà te kandin ne zuen menge sempità he impenurù din kandan. Ke sikandin te, “Kenà egkehimu he ebug̵awen ni Setanas is duma zin he mezaat he mulin-ulin.

Marcos 4:13

Ne mid-uman megkag̵i si Jesus te, “Egkesavut niw ve heini is sempità he migkag̵i ku? Emun kenè niw heini egkesavut kenè niw zaan egkesavut is duma he menge lalag ku he pinaag̵i te sempità.

Marcos 4:33

Pinaag̵i te mezakel he menge sempità impesavut ni Jesus is Lalag te Megbevayà diyà te kandan sumalà is netuenan din he egkesavut dan.

Lucas 12:41

Ne zutun, mid-insà si Pedro, ke sikandin te, “Heini is sempità he migkag̵i nu, iyan key zè be kenikew ebpenuruen is menge sumusundan nu, wey ke elin be is menge etew?”

Lucas 8:10

Ne midtavak si Jesus te, “Sikan is in-eles dengan mehitenged te kedhadì te Megbevayà, ibpesavut ku en keniyu te menge sumusundan ku, iyan, is menge zuma he menge etew he kenè dan edsundan kedì, ibpenurù ku kandan pinaag̵i te menge sempità su wey minsan edtengteng dan, kenè dan ebpekeahà ne minsan ebpemineg dan ne kenè dan ebpekesavut.”

Juan 16:25

Migamit ku is menge sempità te kebpenurua ku keniyu, iyan, meg̵aan en egkeuma is andew he kenè en maan menge sempitè pa is egemiten ku su zutun, melemu niw en he egkesavut is egkeg̵iyen ku. Ne zutun utew niw egkekeleduwi is egkeg̵iyen ku keniyu mehitenged te Amey ku he Megbevayà.