Lucas 7:16 - Manobo Western Bukidnon

¹⁶ Ne is langun he nemekeahà dutun, ne utew zan nengehandek ne nezalig dan is Megbevayà, ke sikandan te, “Heini en te kenitew is utew lavew he ebpeneuven te Megbevayà!” Ne ke sikandan daan te, “Mibulus en is Megbevayà su wey kiw melibri is menge nengepilì din he etew!”

Lucas 7:16 Cross References

Mateo 15:31

Ne utew nengeinuinu is menge etew zutun te nengeehè dan. Su ebpekekag̵i en sikan is emew; ne neulian en sikan is pungkul; sikan is piang, ne ebpekehipanew en; ne sikan is nengelakap, ne ebpekeehè en. Ne midalig dan dutun is Megbevayà he edsimbahan dan te menge kevuwazan ni Israyil.

Mateo 21:11

Ne midtavak is mezakel he menge etew he nemenduma ki Jesus te, “Iyan sikandin sikan is ebpeneuven te Megbevayà he si Jesus he tigNeserit diyà te Geliliya.”

Mateo 28:8

Ne zutun, migaanggaan haazà is menge vahi med-awà dutun te surung. Nengehandek dan, iyan, nepenù is gehinawa zan te kelipey. Ne ebpelelag̵uy zan su ibpenudtul zan diyà te menge sumusundan he zuma.

Mateo 9:8

Hein naahà heini te menge etew zutun, nengehandek dan ne midalig dan is Megbevayà tenged te mibeg̵ayan din is menusiyà te keg̵ehem he iring kayi.

Lucas 1:65

Ne is langun he menge siringan dan, hein nezineg dan heini, utew zan nengeinuinu. Ne is tudtul zutun te neulaula, segugunà nekeeneb diyà te langun he menge vuvungan he inged he sakup te prubinsya he Hudiya.

Lucas 1:68

“Edelig̵en tew is Nengazen he Megbevayà tew te menge kevuwazan ni Israyil su sikitew is ed-azap kandin, mibulusan kiw zin ne midlibri kiw zin te menge kuntada tew.

Lucas 19:44

Ne edèdeetan dan is menge valey niw wey kutè niw ne langun niw te menge etew, ne egkeg̵erà ne wazà edresik keniyu. Ne is menge vatu he imbevaley keniyan, wazà minsan sevaha he ebpekeuntud diyà te sevaha su egkewag̵ey is langun. Ne egkeulaula heini su wazè niw seg̵ipaa he iyan heini sikan is timpu te kegkehizu keniyu te Megbevayà.”

Lucas 2:20

Ne haazà is ed-elima te menge kerehidu, mid-ulì dan is utew nengelipey. Ne midalig dan is Megbevayà tenged te langun he nezineg dan wey neehè dan su netuman haazà is langun dutun te migkag̵i te velinsug̵uen te Megbevayà.

Lucas 24:19

Ne mid-uman med-insà si Jesus kandan te, “Maan? Hengkey is nehitavù?” Ne midtavak dan te, “Iyan is nehitavù ki Jesus he tigNeserit. Ebpeneuven sikandin te Megbevayà ne midtuuwan sikandin te langun he menge etew. Dekelà is gehem din te ebpenurù ne mekeg̵eg̵ehem daan sikandin he ebaal te menge egkengein-inuwan.

Lucas 5:26

Ne is langun he menge etew zutun ne nengeherat is mata zan, ne utew zan nengeinuinu ne midalig dan is Megbevayà, ne ke sikandan te, “Heini is neehè tew g̵untaan, ne utew egkein-inuwi!”

Lucas 5:8

Ne si Simon Pedro, hein neehè din is neulaula, nekeluhud diyà te ki Jesus is egkag̵i te, “Datù, deyzey ke ebpekeziyuan a kenikew su utew a mekesesalà.”

Lucas 7:15

Ne zutundutun mid-enew haazà is minatey ne mibpekidlalag kandan. Ne migkeg̵iyan ni Jesus haazà is iney zutun te nevanhew he kuwaa zin en haazà is anak din.

Lucas 7:39

Ne naahà heini zutun te Perisiyu he mid-umbita ki Jesus, ne neisip din is, “Angin ke tutuu he ebpeneuven heini te Megbevayà ne kenà ebpekeeles kandin is meremerik he ulaula kayi te vahi ne wazè din pezem itug̵ut he meg̵ewezi is lawa zin kayi te vahi.”

Lucas 8:37

Ne zutun, haazà is langun he menge etew he meg̵inged dutun te tanà te menge Geresinen, ne midhangyù dan ki Jesus he med-awà sikandin dutun te kandan su utew zan ingkehandek sikandin. Ne iyan dà haazà, ne mid-untud ensi Jesus te avang su egenat dan.

Lucas 9:19

Ne midtavak dan te, “Iyan ke kun si Juan Megbebewtismu he nevanhew, ne zuen daan egkag̵i te iyan ka si Elias, ne zuen pa egkag̵i te sevaha ka zuen te menge tipehuna he ebpeneuven te Megbevayà.”

Juan 1:21

Ne ke sikandan te, “Iyan ke ve kes ebpeneuven dengan he si Elias?” Ne ke si Juan te, “Kenà a zaan.” Ne ke sikandan te, “Kela ke iyan ka sikan is netagnà he mibpenaub te Megbevayà?” Ne ke si Juan te, “Kenà a zaan.”

Juan 1:25

Mid-insè dan en maan te, “Emun kenè ka iyan sikan is mibpilì te Megbevayà wey mekehadì, ne kenè ka zaan si Elias, wey kenè ka sikan is netagnà he ebpeneuven, maan is ebpemewtismu ka te menge etew?”

Juan 4:19

Ne mid-uman megkag̵i haazà is bahi te, “Ebpeneuven ke ves te Megbevayà?

Juan 6:14

Ne hein naahà te menge etew is egkein-inuwan he nehimu ni Jesus migkag̵i zan te, “Tutuu ves iyan he iyan en heini sikan is netagnà he ebpeneuven te Megbevayà he ibpehendini zin te kelibutan!”

Juan 9:17

Ne tenged dutun mid-insaan dan en maan haazà is neulian he lakap, ke sikandan te, “Sikew, hengkey is kenikew he isip mehitenged kandin su kenikew he menge mata is mibewian din?” Ne midtavak haazà is etew te, “Ebpeneuven sikandin te Megbevayà.”

Nengeulaula 5:5

Ne te kegkezineg̵a ni Eneniyas kayi he lalag, midsilutan te Megbevayà ne zutundutun nepiley sikandin ne minatey. Ne zutun mibeyaan sikandin te menge menguhed he maama ne mibukusan dan is lawa zin ne mid-uwit dan ne inleveng dan. Ne utew nengehandek is langun he nekezineg kayi te neulaula.

Nengeulaula 7:37

Ne si Moises, migkeg̵iyan din is menge kepuun tew te, ‘Keuzemà duen daan ebpeneuven te Megbevayà he ed-uwit keniyu iring kedì te ebpeneuven din. Ne heini he ebpeneuven keuzemà, duma niw zaan he Hudiyu.’

Gelasya 1:24

Ne tenged dutun midalig dan is Megbevayà tenged te neketuu a ki Jesus.