Lucas 7:12 - Manobo Western Bukidnon

¹² Ne hein ebpekeuma zan en dutun te idselang dutun te inged ne nesinug̵ung dan is menge etew he ebpuun dutun te inged he edlanting te minatey su idleveng dan. Maama haazà is minatey he iyan dà anak dutun te meritan he valu. Mezakel is menge etew zutun te inged he miduma zutun te vahi he eduma te edleveng.

Lucas 7:12 Cross References

Lucas 7:11

Ne nepiraan pa maan dutun midhendiyà si Jesus te inged he egngezanan te Nain. Ne utew mezakel is menge etew he nemenduma kandin ragkes te menge sumusundan din.

Lucas 7:13

Ne is Nengazen he si Jesus, hein neehè din haazà is bahi he edsineg̵ew ne midtavang is gehinawa zin ne migkeg̵iyan din haazà is bahi te, “Ayà, kenè ka sineg̵ew.”

Lucas 8:42

Su zuen budtung he anak din he rag̵arag̵a he menge sepulù pa wey zezuwa is penuig̵en din, ne egkezeruwan ne edluwàluwè en te g̵ehinawa. Ne miduma kandin si Jesus. Ne zutun te kedhipanew zan ebpenelektelek dan dà su egkengelipitlipit dan te utew mezakel he menge etew zutun.

Lucas 8:52

Ne zutun, is langun he menge etew he nerivurun dutun, egkengeg̵isaweg sikandan ne ebpemenineg̵ew su nengeseeng. Ne migkeg̵iyan sikandan ni Jesus te, “Kenè niw sineg̵awi su wazà mebpatey heeyan is batà, kekenà, midlipezeng dà!”

Juan 11:19

Mezakel is menge Hudiyu he midhendutun te ki Marta wey ki Maria su edlangan dan kandan tenged dutun te meemahan dan he minatey.

Nengeulaula 9:39

Ne migenat si Pedro is eduma kandan. Ne hein nekeuma si Pedro miduma zan diyà te rug̵u he ziyà te zivavew. Ne zuen dutun menge valu he vahi ne midlingutan dan si Pedro te ebpemenineg̵ew. Ne impeehè dan kandin is menge kumbalà wey zuma pa he ugelingen he mibpenahì ni Durkas hein uuyag pa.

Nengeulaula 9:41

Ne migewezan ni Pedro is belad din ne impehitindeg din. Ne zutun mid-umew ni Pedro haazà is menge zuma zin he tumutuu he ragkes dutun is menge valu he vahi ne impeehè din kandan si Tebita.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.