Lucas 6:6 - Manobo Western Bukidnon

⁶ Ne sevaha pa zutun he andew he Sebadu, midseled si Jesus duen te simbahan te menge Hudiyu ne nenurù sikandin. Ne zuen dutun etew he minatey is menge ug̵at te kewanan he velad din.

Lucas 6:6 Cross References

Mateo 4:23

Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru.

Lucas 13:10

Ne sevaha he andew he Sebadu, diyà si Jesus ebpenurù te simbahan te menge Hudiyu.

Lucas 14:3

Ne si Jesus, mid-insaan din is menge menunudlù te kesug̵uan wey is menge Perisiyu, ke sikandin te, “Sumalà is ibpenurù kenitew te insurat he kesug̵uan, ebpekesalè ki ve ke ebpemawì ki ke Andew te Kedhimeley?”

Lucas 4:16

Ne zutun midhendiyà si Jesus te Neserit, sikan is inged he zutun en sikandin medekelà. Ne zutun te andew he Sebadu he iyan Andew te Kedhimeley midseled si Jesus te simbahan su iyan betasan din. Ne midhitindeg su ebesahan din is insurat he Lalag te Megbevayà.

Lucas 4:31

Ne midlaus si Jesus pehendiyà te Kepirnaum he inged he sakup te Geliliya. Ne zutun te Andew te Kedhimeley mibpenurù din is menge etew ziyà te simbahan.

Lucas 6:1

Ne zutun te sevaha he andew he Sebadu, ingkevayà eni Jesus is pemuleey. Ne mibpengetu haazà is menge sumusundan din te menge trigu ne mibpengusu zan haazà ne mibpengaan dan is menge veg̵as dutun.

Lucas 6:5

Ne impelaus ni Jesus haazà is lalag din, ke sikandin te, “Siak is Kakey te Menusiyà, iyan a zuen keg̵ehem te egkag̵i ke hengkey is hustu he ed-ul-ulahan te etew emun Andew te Kedhimeley.”

Juan 5:3

Mezakel is egkengezeruwan he zutun dan en ebpemen-ubpàubpà te menge helungà. Menge lakap, menge piang, wey menge minatey is divaluy he lawa, ne zutun edteg̵azan dan is kegurig̵awa zutun te wahig

Juan 9:16

Ne zutun migkag̵i is duma zutun te menge Perisiyu, ke sikandan te, “Heini si Jesus, kenà iyan sikandin sug̵ù te Megbevayà su edsupaken din layun is kesug̵uan mehitenged te Andew te Kedhimeley.” Iyan, migkag̵i zaan is duma pa he menge Perisiyu te, “Emun mesinupaken he etew, kenè din egkehimu is menge egkein-inuwan he iring kayi!” Ne zutun kenè dan egkengeuyun.