Lucas 13:34 - Manobo Western Bukidnon

³⁴ Ne zutun netenuzan ni Jesus is menge ulaula te menge meg̵inged te Hiruselim ne ke sikandin te, “Igkeseeng ku sikiyu is menge meg̵inged diyà te Hiruselim su ebpemunuen niw is ebpemeneuven te Megbevayà ne is menge sulug̵uen te Megbevayà he ibpehendiyàn, ebpenulengen niw te vatu he edhimetayan niw. Utew zekelà is suat ku pezem he ed-uyemuwen ku sikiyu; ke và dà manuk, iring a te upa he edlekupan din is menge piyak din ne kenè kew ebpelekup.

Lucas 13:34 Cross References

Mateo 22:3

Midsug̵ù din is menge sulug̵uen din he ibpetukew sikan is menge etew he migkeg̵iyan he zaan he ipetelavuk dan en dutun te keemuran. Iyan, is menge etew, wazè dan itetepian haazà is menge sulug̵uen.

Mateo 22:6

Ne is duma he etew zutun, migewezan dan haazà is midsug̵ù te hadì, ne mibpemug̵el zan ne human dan himetayi.

Lucas 15:28

Ne zutun utew neepes haazà is kakey ne wazà mebpemenahik dutun te valey. Ne zutun mibpenaug haazà is amey zan he ednayùnayù is egkag̵i ziyà te kandin te, ‘Laus ke man dini, Mama.’

Lucas 19:44

Ne edèdeetan dan is menge valey niw wey kutè niw ne langun niw te menge etew, ne egkeg̵erà ne wazà edresik keniyu. Ne is menge vatu he imbevaley keniyan, wazà minsan sevaha he ebpekeuntud diyà te sevaha su egkewag̵ey is langun. Ne egkeulaula heini su wazè niw seg̵ipaa he iyan heini sikan is timpu te kegkehizu keniyu te Megbevayà.”

Lucas 23:28

Ne midlilingey si Jesus diyà te kandan ne migkag̵i te, “Sikiyu is menge vahi he tigHiruselim, kenà a iyan keniyu sineg̵awi, kekenà, iyan niw sineg̵awi is egkeulaula niw wey te menge anak niw.

Nengeulaula 7:52

Duen be minsan sevaha zà he ebpeneuven dengan he wazà resaya te menge kepuun tew? Wazà. Mibpenhimetayan dan is midsug̵ù te Megbevayà, sikan is nemeketagnà dengan te kebpekeuma te metazeng he sulug̵uen din he si Jesus. Ne sikiyu zaan guntaan su heini si Jesus, is sulug̵uen te Megbevayà, mid-ekalan niw ne mibunù niw.

Nengeulaula 7:59

Ne zutun te kedtulenga zan ki Esteban, nengumew-umew sikandin te Nengazen. Ke sikandin te, “He Jesus he Nengazen ku, dewata nu is gimukud ku.”

Nengeulaula 8:1

Ingkesuat utew ni Seulu is kedhimetayi zan ki Esteban. Ne inleveng si Esteban te menge tumutuu te Megbevayà. Utew zan ingkeseeng haazà ne midlendag̵an dan. Ne puun dutun te andew te kebpatey ni Esteban, is menge tumutuu, ebpemesipelahan en sikandan te menge punuan he menge Hudiyu ziyà te Hiruselim, ne mibpemelag̵uy zan ne nekedsusuwey zan diyà te tivuuk he prubinsya he Hudiya wey Semarya. Iyan dà wazà mekepelag̵uy is menge epustul.

Impezayag 11:8

Ne ziyà ibperey-as haazà is lawa zan te kersada ziyà te zekelà he inged he zutun iransang te krus is Nengazen dan. Ne zuen insempità he menge ngazan dutun te inged, ne iyan is Suduma wey Ihiptu.