Lucas 12:18 - Manobo Western Bukidnon

¹⁸ Ne ke sikandin te, ‘Edrundusen ku heini is menge budiga ku ne ed-uman a ebevaley te utew zekelà su wey ku zuen meteg̵ui te langun he egkerag̵un ku wey zuma pa he menge azen ku.

Lucas 12:18 Cross References

Mateo 6:26

Isipa niw is menge tagbis he ebpemenlayang. Kenè dan ebpemula; kenè dan edrag̵un; kenè dan daan ederengdeng. Ne minsan pa zutun ebpengelintau is Megbevayà he ziyà te langit te egkekaan dan. Ne iyan kew pe be is etew he lavew pa he mahal ziyà te kandin kenà is menge tagbis.

Lucas 12:17

Ne neisip dutun te etew is, ‘Hengkey is ed-ul-ulahan ku kayi te langun he uzar ku? Su kenà egkeamin kayi te menge budiga ku ne wazè en egketeg̵uan ku.’

Lucas 12:19

Ne zutun, geina te utew meupiya is kebpekesavuk ku he etew, kenà ad maan edterebahu su naazen ku en is minsan hengkey he egkinehenglanen ku taman te pira pa he tuig. Ne tenged kayi ebperenggey e zà is ebpurung egkaan, ed-inum, wey edlipeylipey,’ ke sikandin.

Lucas 12:21

Ne mid-uman megkag̵i si Jesus diyà te mezakel he menge etew, ke sikandin te, “Iring kayi te sepian he etew is minsan hentei he edtipig te zekelà he ketig̵eyunan, iyan, wazà diyà te kandin is minsan hengkey he igkesuat te Megbevayà.”

Lucas 12:24

Isipa niw is menge uwak; kenè dan ebpemula; kenè dan edrag̵un ne wazè dan daan lawig he ederengdengan dan. Ne minsan pa zutun ebpengelintau is Megbevayà te egkekaan dan. Ne iyan kew pe be is etew he lavew pa he mahal ziyà te kandin kenà is menge uwak!

Lucas 18:4

Ne neug̵et en haazà he kenà edseg̵ipaan dutun te huwis is hangyù dutun te vahi. Ne g̵eina te neug̵et en is layun kedlikùlikù dutun te vahi he edhangyù diyà te kandin, ne neisip dutun te huwis is, ‘Minsan wazè ku kehandek te Megbevayà ne wazè ku zaan kedtahud te minsan hentei etawa,

Lucas 18:6

Ne ke si Jesus te, “Isipa niw is mid-ulaula zutun te huwis he kenà pezem metazeng is kedhusey zin.

Santiago 3:15

Kenà haazà sikan is ketau he ebpuun te Megbevayà, kekenà, dini zà ebpuun te kelibutan. Kenà iyan is ketau he ibeg̵ey te Wag̵as he Mulin-ulin, kekenà, ebpuun te mezaat he mulin-ulin.

Santiago 4:13

Pemineg kew, sikiyu is egkag̵i te, “Guntaan ne emun kenà ne keeselem, edhendiyè ki te sevaha he inged. Ne zutun ki ebpetig̵ayun taman te sengetuig wey ki mekemanggad.”

Santiago 4:15

Meupiya pa ke egkag̵i ki te, “Emun idtug̵ut kenita te Nengazen he kenè ki pa ebpatey, ebeelan ta is iring dutun.”