Lucas 12:15 - Manobo Western Bukidnon

¹⁵ Ne migkag̵i si Jesus diyà te menge etew te, “Purungi niw ventayi is ulaula niw su wey wazà keleleg̵ed diyan te keniyu. Su is ibmeupiya te untung te etew, kenà ebpuun te mezakel he menge azen.”

Lucas 12:15 Cross References

Lucas 12:16

Ne zutun impezineg ni Jesus kandan is sempità. Ke sikandin te, “Duen etew he utew egketig̵ayun su zuen tanè din he utew uuzaran.

Lucas 16:14

Ne zuen dutun menge Perisiyu he iyan dekelà diyà te g̵ehinawa zan is selapì. Ne hein nezineg dan haazà is penurù ni Jesus ne midsumpalit dan sikandin.

Lucas 21:34

Ne ke si Jesus te, “Uram kew wey kew kenà kayi zà egketaman te kegkebibu wey kebpemenginum wey te kedlag̵ud niw te menge kelibutanen he menge kinahanglan niw. Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà. Ne egkeiring kew te egketelebpì he rumat.

Lucas 8:14

Ne haazà is benì he ziyà mengeulug te tanà he zug̵iyen is menge sagbet dutun, ne iyan is Lalag te Megbevayà he nezineg te menge etew, iyan, tenged te menge seeng dan wey is suat dan te selapì, wey is menge kelipey he kayi te kelibutan, egkelipatan dan is nezineg dan ne kenà ebpulus diyà te kandan is Lalag te Megbevayà.

1 Kurintu 6:10

is tekawen, is leg̵ezen, is lelenguten, is ebpen-ulug te salà diyà te zuma zin, wey is limbungan, wey is minsan hentei etawa he ed-ulaula te iring kayi, ne kenà sikandin egkehedian keuzemà te Megbevayà, kekenà, edsilutan sikandin.

Kulusas 3:5

Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.

2 Timoteo 3:2

Su zutun he timpu leg̵ezen is menge etew wey iyan mahal ziyà te g̵ehinawa zan is selapì. Ebmepelevawen wey ebmepedeligen dan. Edsulaan dan is menge zuma zan; kenè dan ebpemineg̵en is menge lukes dan; ne kenè dan ebpeselamat. Utew lalung sikandan.

Hibriyuhanen 13:5

Bantey kew su kela ke utew subra is suat niw te selapì. Kinahanglan he imeupiye en te g̵ehinawa niw is naazen niw, su migkag̵i is Megbevayà te, “Kenè ku sikiyu ed-ewaan ne kenè ku sikiyu ed-engkezan.”

2 Pedro 2:14

Egkeerig̵an dan te minsan hentei he vahi; kenà egkepenù is suat dan te mezaat he ulaula. Ebpeeyatan dan is menge etew he kenè pa ebpekesavut te hustu. Utew zan leg̵ezen, iyan, kenà egkehimu he kenà sikandan egkesilutan te Megbevayà.

2 Pedro 2:3

Tenged te suat dan te selapì, ebpenepian kew zan pinaag̵i te penurù dan he tarù. Daan en he midteg̵ana is silut kandan; andam en is Megbevayà te kedsilut kandan.