Lucas 10:2 - Manobo Western Bukidnon

² Ne migkag̵i sikandin diyà te kandan te, “Mezakel pezem is edawat te Meupiya he Tudtulanen. Iring sikandan te kamet he nelutuan en. Utew meluag is kamet, iyan, deisey kiw zà is ebpemenlegtey. Iampù niw ziyà te Nengazen he sug̵ua zin pa ziyà te kamet din is duma pa he ebpekelegtey.

Lucas 10:2 Cross References

Mateo 20:1

Ne migkag̵i si Jesus te, “Is kedhadì te Megbevayà he ziyà te langit, iring te etew he zuen din menge pinemula he g̵awed he egngezanan te paras. Ne midselemselem haazà is etew mebpengahà te etew he edsuhulan din he ibpeterebahu zin dutun te perasan din.

Marcos 13:34

Su iring a te sevaha he etew he midhipanew he wazè din teleena ke keenu ed-ulì. Is menge sulug̵uen din ne impevantey zin te menge azen din. Ne mibpemeg̵ayan din is kada sevaha kandan te ketengdanan he ed-ul-ulahan dan dutun te kedhipanew zin. Ne migkeg̵iyan din is etew he impevantey zin te g̵emawan he kenà sikandin medlipezeng.

Marcos 16:15

Ne zutun migkeg̵iyan ni Jesus sikandan te, “Penhipanew kew ziyà te tivuuk he kelibutan, ne ipesavut niw is Meupiya he Tudtulanen diyà te minsan hentei he etew he linimbag te Megbevayà.

Marcos 16:20

Ne zutun nemenhipanew is menge sumusundan te Nengazen he si Jesus ne impesavut dan is Meupiya he Tudtulanen diyà te minsan hendei. Ne is gehem te Megbevayà, mid-ug̵up kandan su nemekehimu zan te menge egkengein-inuwan su wey memeketuu is menge etew zutun te ibpesavut dan.

Lucas 9:1

Ne midtig̵um ni Jesus sikan is sepulù wey zezuwa he menge sumusundan din. Ne kada sevaha kandan, mibeg̵ayan din te g̵ehem su wey zan mevewii is egkengezeruwan wey ikepemeg̵uwè is menge mezaat he mulin-ulin.

Nengeulaula 11:19

Ne zuen menge tumutuu he nememelag̵uy tenged te menge kebpesipelahi zutun te menge edsarig ki Jesus hein mibunù si Esteban. Ne nemekedsusuwey zan pehendiyà te tanà he Pinisi wey te pulu ziyà te zag̵at he egngezanan te Sipru wey ziyè dan daan te inged he Entiyukya. Ne mibpenudtul zan is Lalag te Megbevayà, iyan, diyè dà te menge Hudiyu.

Nengeulaula 13:2

Ne zutun te ked-azap dan te Nengazen wey kedsalang dan te egkaan su ed-ampù dan, duen impesavut te Wag̵as he Mulin-ulin kandan. Ke sikandin te, “Ipeveyveyai niw kedì si Bernabe wey si Seulu su wey zan meveeli is ibpeveelan ku kandan.”

Nengeulaula 13:4

Ne haazà is dezuwa, geina te midsug̵ù sikandan te Wag̵as he Mulin-ulin, midlazas dan pehendiyà te inged he Silusya ne zutun mid-untud dan te barku su edhendiyè dan te pulu te zag̵at he egngezanan te Sipru.

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

Nengeulaula 22:21

Ne migkag̵i en maan is Nengazen te, ‘Genat ke en su edsug̵uen ku sikew ziyà te meziyù wey nu ikepesavut is lalag ku ziyà te kenà menge Hudiyu.’ ”

Nengeulaula 8:4

Ne sikan is nemekedsusuwey he menge tumutuu he nemelag̵uy, impesavut dan diyà te menge inged is Lalag te Megbevayà.

1 Kurintu 12:28

Ne is tivuuk he menge tumutuu, mibeg̵ayan te Megbevayà is kada sevaha te kenà ebpeked-iiring-iring he ebpeveelan din. Iyan aney he vaal zin is: mibpilì din is menge etew he midhimu zin he menge epustul. Ikezuwa, imbeg̵ey zin diyà te zuma is ketau te kedseysey te impesavut te Megbevayà. Iketelu, ne mibeg̵ayan din is duma he menge etew te ketau te kebpenurù te lalag din, ne mibeg̵ayan din is duma te g̵ehem te kebpekehimu te egkein-inuwan. Ne is duma pa ne mibeg̵ayan din te g̵ehem te kebewii te menge egkengezeruwan. Ne mibeg̵ayan din daan is duma te ketau te kedtevangi zan te menge zuma zan. Ne is duma pa, ne mibeg̵ayan din te ketau te ked-uwita zan te menge tumutuu. Ne is duma pa, mibeg̵ayan din te ketau te kegkag̵i te kineg̵iyan he kenè dan egkesavut.

1 Kurintu 15:10

Iyan, utew zekelà is hizu kediey te Megbevayà. Umba nehimu a he epustul su zuen pulus te kegkehizuwi zin kediey. Tenged kayi, dekelà is nehimu ku kenà te nehimu te langun he menge zuma ku he epustul, asal, kenà a iyan is nekehimu kayi, kekenà, nehimu heini is langun pinaag̵i te tavang te Megbevayà.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

Pilipus 2:21

Is duma, ne iyan dà egkeisip dan is kandan dà he egkesuatan, ne kenà iyan is egkesuatan ni Jesu Kristu.

Pilipus 2:25

Ne elin daan kayi te isip ku he kinahanglan he ibpehendiyan ku is suled tew he si Ipepruditu, kes midsug̵ù niw pehendini wey e zin metevangi. Iyan sikandin duma ku wey timbang ku kayi te ebpeveelan kedì te Megbevayà.

Pilipus 2:30

su hapit sikandin ebpatey wey zin metuman is ebpeveelan kandin ni Kristu. Inserakan din is untung din wey e zin metevangi su zutun he timpu kenà a keniyu egketevangan.

Kulusas 1:29

Siak, ebpenigudu a ebaal he edlig-enan te zekelà he zesen ni Kristu su wey metuman heini.

Kulusas 4:12

Ebpengemusta zaan keniyu si Ipapras. Duma niw zaan he tigKulusas he sulug̵uen ni Jesu Kristu. Layun kew zin id-ampù. Ed-ampù sikandin diyà te Megbevayà he mebmelig-en wey meheg̵et is kedtuu niw ne wey meheg̵et daan is kedtumana niw te egkesuatan te Megbevayà.

1 Tiselunika 2:9

Menge suled, kenè niw vuwa egkelipatan is kedhag̵ù dey ziyan te kebaal. Su hein impesavut dey keniyu is Meupiya he Tudtulanen he ebpuun te Megbevayà, mibpenigudu key zaan medhag̵ù te maandew se mezukilem wey key mekekuwa te keuyag̵an dey wey key kenà mekesamuk keniyu.

1 Tiselunika 5:12

Ne menge suled, sikan is edhag̵ù te ked-uwit dan keniyu, kes menge eg̵alen niw he mibpilì te Nengazen wey sikandan is ebpenurù keniyu, edhengyuan dey sikiyu he tehuza niw sikandan.

2 Tiselunika 3:1

Ne g̵untaan, menge suled, iampù key keniyu wey meg̵aan mekeeneb ne mezawat diyà te minsan hendei is kebpesevuta zey te Lalag te Nengazen iring te kegkezewata niw kayi ziyan te keniyu.

1 Timoteo 4:10

Tenged kayi ebpenigudu ki edhag̵ù wey metuuwi heini te langun he menge etew su nekesarig ki en te wazè din kemetayen he Megbevayà ne iyan sikandin Menluluwas te langun he menge etew, lavew en is menge tumutuu kandin.

2 Timoteo 4:5

Iyan, sikew mulà, tengkai nu is ed-ul-ulahan nu te minsan keenu he timpu. Entusa nu is kemereg̵enan. Peniguduwi nu te edsangyew is Meupiya he Tudtulanen. Purungi nu tumana is langun he ebpeveelan kenikew te Megbevayà.

Pilimun 1:1

Minahal he emig̵u zey wey timbang dey he si Pilimun. Siak si Pablo is nepirisu tenged te kedtuu ku ki Jesu Kristu wey si Timoteo he suled tew, ebpesuratan dey sikew, wey si Epiya he etevey tew tenged te kedtuu, wey si Erkipu he zuma tew he sundaru ni Kristu wey elin daan ebpesuratan dey is menge tumutuu he ziyan edsimba te valey nu.

Hibriyuhanen 3:6

Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Impezayag 2:1

Ne impelaus din is lalag din te, “Pesurati nu is belinsug̵uen te Megbevayà he ebantey te menge tumutuu he ziyà te inged he Ipisu, ne isurat nu is menge lalag ku ziyà, ke sikew te, ‘Siak si Jesus is egawed te pitu he vituen diyà te kewanan ku he velad ne iyan a zaan edhipanew kayi te teliwazà te pitu he sulù.