Lucas 1:32 - Manobo Western Bukidnon

³² Utew zekelà is pid-etawan din ne egkengezanan sikandin he Anak te utew lavew he Megbevayà. Ne edhimuwen te Nengazen he Megbevayà he edhadì heini is id-anak nu iring te kedhadì dengan te kepuun din he si David.

Lucas 1:32 Cross References

Mateo 1:1

Iyan heini kes gug̵ud te kepuun ni Jesu Kristu. Kevuwazan si Jesu Kristu ni Hadì David dengan. Ne si David, kevuwazan ni Abraham.

Mateo 12:42

Keuzemà te andew te kedhukum edsewayen kew zaan duen te singyuda zengan he ziyà ebpuun te inged he Siba su utew meziyù is midhipenawan din te kebpemineg dà te penurù ni Hadì Sulumun te utew metau. Ne g̵untaan duen ebpenurù he lavew pa kenà si Sulumun dini te keniyu ne sikiyu mulà, wazè niw zewata is penurù din.

Mateo 28:18

Ne mid-uvayan sikandan ni Jesus, ne ke sikandin te, “Imbeg̵ey kedì is ke g̵ehem te kebayàbayà diyà te langit wey zini te tanà.

Mateo 3:11

Wahig is ibewtismu ku keniyu,” ke si Juan, “he tuus te mid-iniyug̵an niw is mezaat he ulaula, iyan, duen etew he ed-ilis kediey ne iyan ibewtismu zin keniyu is Wag̵as he Mulin-ulin, ne emun kenà, ne hapuy. Lavew sikandin kedì, ne minsan is ked-uwit dà te sepatus din, kenè e pa zait he sulug̵uen din.

Marcos 14:61

Ne wazà si Jesus medtavak. Ne mid-uman megkag̵i haazà is lavew he memumuhat te, “Iyan ke ve kes mibpilì he ibpahadì he Anak te Megbevayà?”

Marcos 5:7

Ne si Jesus, migkeg̵iyan din haazà is mezaat he mulin-ulin te, “Awè ka keniyan te etew!” Ne zutun nengulahì haazà is etew he ke sikandin diyà te ki Jesus te, “Ey! Sikew is anak te utew lavew he Megbevayà, ebmenuwen a kenikew? Edhengyuen ku kenikew he peserig̵a a kenikew he kenè e pa kenikew siluti su kayi ki te etuvangan te Megbevayà!”

Lucas 1:15

su utew zekelà is pid-etawan din sumalà is ked-isipa kandin te Nengazen. Kenà sikandin ed-inum te vinu wey minsan hengkey he ebpekelangut. Ne puun dà dutun te kenè pa sikandin id-anak egkepurung sikandin egkeulini te Wag̵as he Mulin-ulin.

Lucas 1:35

Ne midtavak haazà is belinsug̵uen te, “Is Wag̵as he Mulin-ulin, iyan ebpengelintau kayi ziyan te kenikew ne edlig-enan ka te g̵ehem te Megbevayà. Ne tenged kayi, heini is id-anak nu, pudu metazeng is menge ulaula zin ne egkengezanan sikandin he Anak te Megbevayà.

Lucas 1:76

Ne zutun migkeg̵iyan ni Zacarias haazà is anak din te, “Ne sikew, anak ku, iyan ka egeraran keuzemà he ebpeneuven te utew lavew he Megbevayà. Edsug̵uen ke zin he ibpehuna zuen te Nengazen tew su wey nu mekeg̵iyi is menge etew he endami zan is kebpekeuma zin.

Lucas 3:16

Ne tenged kayi, migkag̵i si Juan diyà te kandan te langun te, “Duen ed-ilis kediey he utew lavew su minsan is kebpul-ut dà te menge sepatus din, kenè e pa zait he sulug̵uen din. Wahig is ibewtismu ku keniyu,” ke si Juan, “iyan, haazà is migkag̵i ku, ebewtismu zaan keniyu. Is edtuu, ne ebewtismuwan din te Wag̵as he Mulin-ulin. Ne is kenà edtuu, ne iyan din ibewtismu kandan is hapuy.

Lucas 6:35

Iyan penurù ku keniyu is: kenà imezaat te g̵ehinawa niw is menge kuntada niw, kekenà, meupiya is ul-ulaha niw ziyà te kandan. Ke zuen etew he ed-utang keniyu, kenè niw itag̵ù diyà te g̵ehinawa niw he kinahanglan he beyazi kew zin. Emun edtumanen niw heini, igkepeehè niw he menge anak kew te utew lavew he Megbevayà. Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin, egkehizuwan din sikandan gihapun.

Juan 12:34

Ne migkag̵i zutun is menge etew te, “Duen impenurù kenami he ebpuun te insurat he Lalag te Megbevayà he kenè en ebpatey is mibpilì te Megbevayà he ibpahadì. Ne sikew, egkag̵i ka he ibayew ziyà te tukud is Kakey te Menusiyà. Hentei heini is egkeg̵iyen nu he Kakey te Menusiyà?”

Juan 6:69

Edtuu key kenikew su netuenan dey he iyan ka sikan is mibpilì te Megbevayà he ibpahadì.”

Nengeulaula 16:17

Ne miduma kenami ki Pablo haazà is bahi he ebpengulahì te, “Heini is menge etew, menge sulug̵uen sikandan te lavew he Megbevayà. Ibpesavut dan keniyu is paag̵i wey kew melibri te idsilut din.”

Nengeulaula 2:30

Ne si David, geina te mibpenaub te Megbevayà, nesavut din ke hengkey is impenaad kandin te Megbevayà su si David, iyan penaad kandin te Megbevayà is: keuzemà duen kevuwazan din he egkehimu he hadì he iring kandin.

Nengeulaula 2:36

Na,” ke si Pedro, “kinahanglan he edsevuten tew te langun he menge kevuwazan ni Israyil he si Jesus, sikan is inransang niw te krus, midhimu en te Megbevayà he Nengazen wey hadì tew te langun.”

Nengeulaula 7:48

Ne ke si Esteban te, “Ne minsan pa zutun, is lavew he Megbevayà, kenà diyè dà ed-ubpà te valey he vineelan te etew su zuen insurat te ebpeneuven he,

Ruma 1:4

Ne is Nengazen tew he si Jesu Kristu, wag̵as sikandin he Megbevayà su anak daan sikandin te Megbevayà su impaahà heini kenitew pinaag̵i te zekelà he g̵ehem te Megbevayà he iyan imbanhew kandin.

Impezayag 3:7

Ne ke sikandin en maan te, “Pesurati nu is belinsug̵uen te Megbevayà he ebantey te menge tumutuu ziyan te inged he Piledilpya. Ne ke sikew te, ‘Siak si Jesus is egkag̵i; iyan a sikan is egkeserig̵an he mibpilì te Megbevayà. Imbeg̵ey kedì is keg̵ehem te kedhadì te g̵inhedian ku iring te kedhadì dengan ni Hadì David. Ne emun duen ebpuwasan ku wey mekeseled dutun te g̵inhedian ku, kenè en egkelekevan te minsan hentei. Ne emun duen etew he edlekevan ku, kenè en daan egkepuwasan te minsan hentei.