Kulusas 3:8 - Manobo Western Bukidnon

⁸ Ne g̵untaan, kinahanglan he ed-iniyug̵an ta is minsan hengkey he mezaat he ulaula iring te kegkepauk wey kebpekigkuntada te zuma he etew, is kebpesipala, is ked-ituk wey is meremerik he kegkag̵i.

Kulusas 3:8 Cross References

Mateo 5:22

Ne iyan kedì he penurù is: minsan sikan is egkepauk dà te zuma zin, edhukuman daan sikandin te Megbevayà. Ne sikan is edsulà te zuma zin te, ‘Wazè nu pulus he etew!’ ne egkeuwit sikandin diyà te husayen. Ne sikan is edsulaan din is duma zin he egkag̵i te, ‘Tulebung ka he wazè nu pulus,’ ne zait sikandin he egkeuwit diyà te hapuy te Impirnu.

Ruma 13:13

Ed-ul-ulahan tew is hustu su iyan heini ulaula he zait te menge etew he neteyawan te Megbevayà. Kenè ki en edtampu te ketig̵uman te ebpemelelangut ne kenè ta egkevuten is kenè ta esawa. Kenè ki ebpekid-eg̵et wey kenè ki egkesina.

1 Kurintu 3:3

su kemulu kew pa ebeyveyaan te keniyu zà he suat. Su zuen kun duma keniyu he egkesina ne zuen duma pa he ebpekidtebek, ne tenged kayi henduen be te ebeyveyaan kew pa te suat niw iring te menge etew he wazè pa medtuu ki Jesus.

2 Kurintu 12:20

Egkesamuk is gehinawa ku su kela ke zutun te kebpekeuma ku ziyan ne iyan ku egkeahà diyan te keniyu is menge ulaula he kenè ku egkesuatan. Ne emun iyan haazà ne zuen ed-ul-ulahan ku zutun he kenè niw zaan egkesuatan su kinahanglan he edsewayen ku is keniyu he ulaula. Su kela ke zuen ebpekigkuntada ziyan te menge zuma zin, kela ke zuen egkesina, duen petuluy egkepauk, wey leg̵ezen, kela ke zuen diyan ebpenemperasà wey edsulà te zuma zin, kela ke zuen bereituk. Kela ke zuen diyan te keniyu gelbuwen, wey kela ke wazè niw kebpekid-uyun te menge tumutuu.

Gelasya 5:15

Iyan, emun iyan niw zà ed-ul-ulahan is kebpepespesipelehey wey kebpeeg-eg̵età, ne egkepurung egkezeeti is upakat niw te menge tumutuu ki Kristu.

Gelasya 5:20

is ked-ezapa te kenà hustu he ed-ezapen, wey is kegemita te g̵ehem he ibeg̵ey ni Setanas. Ebpekigkuntada is menge etew; ebpekidtebek dan; egkesina zan; egkengepauk dan; iyan dà ed-isipen dan is kandan dà he egkesuatan. Ne ed-engkezan dan is kebpekidsevaha zan te menge zuma zan.

Gelasya 5:26

Kinahanglan he kenè ki ebpelavew, kenè ki zaan ebpekidtebek te menge zuma he etew, kenè ki zaan egkesina te zuma ta.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Ipisu 4:25

Umba, menge suled, engkezi niw is kedtarùtarù. Kinahanglan he tutuu is egkeg̵iyen niw ziyà te menge zuma niw. Su nesevaha kiw he pudu parti te lawa ni Kristu.

Ipisu 4:26

Emun duen igkepauk niw tigkera niw is gehinawa niw su kela ke ibpekesalè niw. Ne kinahanglan he te kenè pa edsanlep is andew iawè niw en is pauk te isip niw.

Ipisu 4:29

Kinahanglan he kenà ebpekezezaat is kebpemèbè niw, kekenà, iyan keg̵iya niw is menge lalag he ebpekeveg̵ey he tavang te kedtuu te menge zuma niw su wey zekelà is pulus diyà te ebpemineg sumalà is egkinehenglanen dan.

Ipisu 5:4

Kenè niw g̵emita is menge meremerik, mahawag, wey wazè din pulus he menge lalag, kekenà, layun dekelà is kebpeselemati niw te Megbevayà.

Kulusas 3:5

Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.

Kulusas 3:9

Kenè ki edtarùtarù su nelibri ki en te zaan he kegkeetew ta wey te menge mezaat he vaal he mid-ulaula ta zengan te kedtumana ta te menge zaan he suat ta.

1 Timoteo 1:13

Dengan, mezaat is menge lalag ku mehitenged kandin; midrasey ku is menge sumusundan din ne midsumpalit ku sikandin. Ne minsan pa zutun, nehizuwan e zin su nehimu ku is menge mezaat he vaal ku tenged te wazè ku pa metueni is tutuu he tuluuwen wey wazè ku pa sikandin tuuwi.

1 Timoteo 1:20

Duma kayi si Himinyu wey si Alejandro. Impevayàbayè ku si Setanas kandan wey ikepenurù kandan he kenè dan sumpelita is Megbevayà.

Hibriyuhanen 12:1

Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Santiago 2:7

Hentei is edsumpalit te mahal he ngazan ni Jesus he iyan teg̵ig̵aked kenitew? Iyan is menge sepian.

1 Pedro 2:1

Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

2 Pedro 2:18

Uvag mezalem is menge lalag dan, iyan, wazà pulus te egkeg̵iyen dan. Duen menge etew he ed-engkezan dan pezem is menge zaan he zuma zan he ed-ulaula te sayep, iyan, ebpenulayen sikandan dutun te menge menunudlù pinaag̵i te meremerik he kebayà te lawa zan.

Hudas 1:13

Iring daan sikandan te utew zezekelà he vag̵el ziyà te zag̵at ke zuen bagyu su iring is menge mekeeled-eled he ulaula zan te meremerik he vuràburà he ebpenlepew ziyà te veyvey. Iring sikandan te menge vituen he nekesuwey te hustu he nesevukan dan su kenè en egkeserig̵an is ibpenurù dan. Midteg̵ana te Megbevayà is utew merusirem he egkeubpaan dan te wazà pidtemanan.

Hudas 1:8

Ne iring din ded daan haazà is menge etew he ebpenurù te tarù diyan te keniyu. Edtumanen dan is meremerik he ulaula he egkeg̵iyen dan he impenurù kandan pinaag̵i te teg̵einep. Kenè dan ebpesakup te Megbevayà ne edsumpeliten dan is menge kedesenan diyà te langit.

Impezayag 16:9

Ne g̵eina te nengetutung is menge etew zutun te utew meinit, midsumpalit dan is Megbevayà su iyan sikandin ebayàbayà dutun te kedresaya kandan, iyan, wazè dan iniyug̵i is memezaat he ulaula zan ne wazè dan daan bentug̵a is Megbevayà.