Kulusas 3:3 - Manobo Western Bukidnon

³ Umba egkeg̵iyen ku heini su sikita is tumutuu, minatey ki en duma ki Kristu ne is tutuu he untung ta pinaag̵i kandin, wazè pa heini ipezayag te Megbevayà.

Kulusas 3:3 Cross References

Mateo 11:25

Ne zutun mid-ampù si Jesus he egkag̵i te, “Amey ku he Nengazen te langit wey tanà, dekelà is kebpeselemati ku kenikew su is in-eles nu wey kenà mesavut te menge uluwanen wey uvag en memetau, impesavut nu en diyà te menge etew he wazè dan menge hanew.

Juan 14:19

Kenè en egketegteg̵aad ne kenà ad maan egkeahà te menge kuntada ku he etew zini te kelibutan, iyan, sikiyu mulà, egkeehè e pa egkeuman keniyu. Kenà egkeawà is untung ku te minsan keenu, umba zuen niw en daan untung he kenà egkeawà te minsan keenu.

Juan 3:16

Utew mahal ziyà te g̵ehinawa te Megbevayà is tivuuk he menusiyà, ne tenged kayi minsan sikan is budtung he Anak din wazè din menug̵uni, kekenà, impehendini zin su wey is langun he edtuu kandin, kenà mesiluti is gimukud dan, kekenà, meveg̵ayi sikandan te untung he wazà pidtemanan.

Juan 4:14

iyan, ke zuen ed-inum te wahig he ibeg̵ey ku kandin kenè en maan sikandin egkemezahan te minsan keenu. Su is wahig he ibeg̵ey ku kandin, egkehimu ziyà te kandin he ulu te wahig he ebpekeveg̵ey kandin te untung he wazà pidtemanan.”

Juan 5:21

Is Amey ku, ebenhawen din is menge minatey ne ibeg̵ey zin kandan is untung. Ne siak is anak din, untung daan is ibeg̵ey ku ziyà te minsan hentei he ebpilien ku.

Juan 5:24

Utew venar is egkeg̵iyen ku he is minsan hentei he ebpemineg te menge lalag ku ne edtuu te Megbevayà he midsug̵ù kediey zini, iyan ebpekeangken te untung he wazà pidtemanan. Kenà sikandin keuzemà edsilutan su nekelikey en te kemetayen is gimukud din wey naangken din en is untung he wazà pidtemanan.

Juan 5:40

iyan, kenè kew edtuu kediey. Angin ke ebpeketuu kew su ebeg̵ayan kew te untung he wazà pidtemanan.

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 5:21

Ne hein aney, sikitew is menusiyà, kenà egkehimu he kenè ki ebpekesalà, ne tenged kayi ebpatey ki, iyan, guntaan pinaag̵i te ked-isipa te Megbevayà kenitew he metazeng, impeehè kenitew te Megbevayà is gag̵ew zin su wey kiw zin meveg̵ayi te untung he wazè din pidtemanan pinaag̵i ki Jesu Kristu he iyan Nengazen tew.

Ruma 6:11

Ne iring din ded daan, tentenuzi niw he g̵eina te minatey ki en he zuma ki Kristu, naawè en daan dini te kenita is kegkesemuki kenita te salè ta, ne pinaag̵i zaan ki Jesu Kristu imbeg̵ey en kenita is beg̵u en he untung, ne kinahanglan he igkezalig daan te Megbevayà heini is beg̵u en he untung ta.

Ruma 6:2

Ne kenà heini egkehimu su kenà egkehimu he ebpeniguduwan ta te ed-ulaula is mezaat su wazè en kelavet kenita te mezaat he ulaula. Su iring ki te minatey he naawè en diyà te kandin is daan he untung din.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

1 Kurintu 15:45

Su zuen insurat he Lalag te Megbevayà he edhenduen te, “Haazà is nehuna he etew he si Adan, ne mibeg̵ayan te Megbevayà is lawa zin te g̵ehinawa su wey mekeubpà dini te tanà.” Iyan, si Kristu mulà, haazà is migeraran te huziyan he Adan, iyan sikandin ebeg̵ey te untung he wazà pidtemanan su wey kiw mekeubpà diyà te langit.

1 Kurintu 2:14

Ne is etew he wazà diyà te kandin is Wag̵as he Mulin-ulin, kenè din edewaten is ibpenurù te Wag̵as he Mulin-ulin su wazà pulus kayi ziyà te kandin, ne kenè din daan egkesavut su iyan dà ebpekeseysey kayi ziyà te kandin is Wag̵as he Mulin-ulin.

2 Kurintu 5:14

Ne umba edhag̵ù key su netuenan dey he mahal key ziyà te g̵ehinawa ni Kristu. Netuenan dey he midhimetayan sikandin is sebsevaha he elili te tivuuk he menusiyà ne tenged kayi henduen be te pudu en nekeag̵i te kemetayen is tivuuk he menusiyà.

2 Kurintu 5:7

Su ibpeikul ta is ibayè ta zini te kelibutan pinaag̵i te kedsarig dà te Megbevayà su kenè te pa egkeahà is edungguan ta ziyà te langit.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Ipisu 3:9

Ne elin daan insug̵ua zin kediey su wey ku ikepesavut diyà te minsan hentei he etew ke hengkey is kedtumana zin te zaan he mid-isip din he ebeelan. Ne wazà dengan heini ipezayag su in-eles te Megbevayà he nenlimbag te minsan hengkey.

Pilipus 4:7

Ne zutun wazà samuk diyà te isip niw wey g̵ehinawa niw su pinaag̵i te kebpekidsevaha niw ki Jesu Kristu ibeg̵ey keniyu te Megbevayà is melinawen he g̵ehinawa he kenà egkesavut te minsan hentei he etew.

Kulusas 1:5

Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

Kulusas 2:20

Na, menge suled, geina te iring te minatey ki en duma ki Kristu, wey kenè ki en maan egkeveyveyaan te menge kenà hustu he tuluuwen, kinahanglan he kenè kew en maan mebpemineg te menge sug̵ù te menge etew he menge kuntada te Megbevayà. Menge sug̵ù heini te menge etew zà duen. Egkag̵i zan he zuen menge egkeenen he kenà ibpekaan kenitew te Megbevayà, ne minsan is kegezami wey is kegewezi zà kayi ne wazè din kun itug̵ut kenitew. Kenè niw, menge suled, pemineg̵a is iring dutun su wazà pulus te idawey zan su emun egkeenen tew is egkeenen ne egkeawà heini.

Kulusas 2:3

Su iyan dà sikandin ebpekeveg̵ey te minsan hengkey he tutuu he ketau wey tutuu he kedsavut.

Kulusas 3:4

Umba, menge suled, emun edlikù dini si Kristu he iyan puunà te veg̵u he untung ta, ibpeg̵awag̵awa is kekempet din ne ibpeg̵awag̵awa zaan dutun is kekempet te kenita he veg̵u he untung su zutun duma ki kandin.

Hibriyuhanen 7:25

Ne tenged kayi, egkehimu te minsan keenu he timpu he edlibriyen din te silut is minsan hentei he menge etew emun pinaag̵i kandin ed-aput sikandan diyà te Megbevayà su wazà pidtemanan te untung din, ne layun din egkehimu te edtavang sikandan diyà te etuvangan te Megbevayà.

1 Pedro 3:4

Su kinahanglan he iyan ibmekempet niw is meupiya he ulaula he ebpuun te g̵ehinawa niw he iring te menayù he kegkag̵i, wey is melinawen he ulaula su is kekempet he iring kayi, ne kenà mulà egkeawà, ne utew mahal ziyà te Megbevayà.

1 Pedro 4:2

Ne tenged kayi, puun dutun taman te kebpatey zin egkehimu he kenè din en human edtumanen is mezaat he kebayà te lawa zin, kekenà, iyan din edtumanen is egkesuatan te Megbevayà.

1 Juan 3:2

Menge minahal ku he menge emig̵u, menge anak kiw en te Megbevayà ne kenè tew pa egketuenan ke hengkey is egketemanan te kegkeenaka kenitew te Megbevayà. Iyan, netuenan tew he ke edlikù si Kristu, egkehimu zutun is kenitew he zagwey he iring te kandin he zagwey su zutun egkeehè tew human is tutuu he zagwey zin.

Impezayag 2:17

Is minsan hentei keniyu, mebpemineg te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, ebeg̵ayan ku sikandin te in-eles ku pa he egkeenen he mana he ziyà ebpuun te langit. Ne ibeg̵ey ku zaan kandin is meputì he vatu he insurat dutun is beg̵u en he ngazan. Iyan dà egkesayud te ngazan dutun is ebeg̵ayan.’ ”