Kulusas 2:4 - Manobo Western Bukidnon

⁴ Egkeg̵iyen ku heini su wey wazà mekekabig keniyu he minsan hentei pinaag̵i te menge ketezengan he henduen be te hustu, iyan, tarù.

Kulusas 2:4 Cross References

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Mateo 24:4

Ne midtavak si Jesus te, “Andam kew wey kenè kew mekesundan te teruen he etew.

Marcos 13:22

Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Nengeulaula 20:30

Ne egkeulaula keuzemà he ebpengag̵i te tarù is minsan menge zuma niw su wey zan meuwit is menge tumutuu su wey mekesundan kandan.

1 Kurintu 2:4

Ne hein midlelag̵an ku sikiyu wey impesavut ku keniyu is Lalag te Megbevayà, wazè ku iyan gemita is ketau te kegkag̵i wey is menge mekempet he lalag. Su is Wag̵as he Mulin-ulin, iyan mibpirma te egkeg̵iyen ku pinaag̵i te g̵ehem din

2 Kurintu 11:3

Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

Gelasya 2:4

Iyan, duen menge etew he kenà tutuu he menge tumutuu te tutuu he tuluuwen he midtampu kenami. Egkesuatan dan dutun he sirkunsidara si Tito. Umba midtampu zan he id-eles dan he kenè dan tutuu he tumutuu su wey zan maahà ke edtumanen tew is menge sug̵ù he imbilinbilin ni Moises. Su egkesuatan dan he meiring kiw te uripen pinaag̵i te kedtuman te kesug̵uan minsan te nelibri kiw en ni Jesu Kristu ne wazè en kinahanglan he ebenteyanan tew pa is kesug̵uan.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Ipisu 4:17

Tenged te sug̵ù a te Nengazen, ebpeketelteleenan ku sikiyu he engkezi niw en is menge mezaat he ulaula he iyan ed-ul-ulahan te menge etew he kenà edtuu te Nengazen wey wazà pulus te ed-isipen dan.

Ipisu 5:6

Su tenged kayi he menge ulaula, utew egkepeuki te Megbevayà keuzemà is menge etew he kenà ebpemineg te menge sug̵ù din. Ne tenged dutun, kenè niw itug̵ut he meketuu kew te tarù he penurù te minsan hentei he etew pinaag̵i te menge ketezengan dan he kenà tutuu.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

Kulusas 2:8

Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

2 Timoteo 2:16

Likayi nu is winalì he kebpenurù he kenà egkesuatan te Megbevayà, su pinaag̵i zutun ed-iseg is kenà kedtahud kandin te menge etew.

2 Timoteo 3:13

Iyan, is menge lalung he etew, wey is menge uvag kun tumutuu, ed-iseg mulà ebmezaat is menge ulaula zan. Edtezinen dan is isip te menge etew, iyan, egketazin daan is kandan he isip.

1 Juan 2:18

Menge anak ku, meg̵aan en egketapus heini is timpu. Nezineg niw en he keuzemà duen edlepew he egeraran te Kuntada ni Kristu. Guntaan duen en mezakel he menge kuntada ni Kristu ne tenged dutun netuenan ta he meg̵aan en iyan egketapus heini is timpu.

1 Juan 2:26

Ebpesuratan ku sikiyu wey kew med-andam su zuen menge etew he tarù is ibpetuuwan dan pezem keniyu.

1 Juan 4:1

Menge minahal ku he suled, kenè niw petuluy tuuwi is etew he egkag̵i he mid-ulinan sikandin te Wag̵as he Mulin-ulin. Gezami niw zè pa wey niw metueni ke ebpuun be te Megbevayà is ed-ulin kandin. Umba egkeg̵iyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.

2 Juan 1:7

Mezakel is nemenlepew he ebpenurù te tarù dini te kelibutan. Egkeg̵iyen dan he si Jesus is mibpilì te Megbevayà he ibpahadì, wazà sikandin mehimu he etew. Is minsan hentei he iyan haazà egkeg̵iyen dan, teruen sikandin wey kuntada ni Kristu.

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 20:3

Ne intimbag din si Setanas diyà te vitu he wazà pidtemanan te kezalem din. Ne migkendeduwan din ne midtuusan din su wey kenà mepuwasi. Umba mibeelan haazà su wey kenà meekali ni Setanas is menge etew te menge g̵inhedian dini te lumpad taman te kenè pa egketapus is nengkelibu he tuig. Ne emun egketapus haazà is nengkelibu he tuig, ibpaawè dè pa si Setanas te meg̵aan dà utew he timpu.

Impezayag 20:8

Ne egawas sikandin dutun wey zin meekali is menge etew ziyà te langun he menge g̵inhedian dini te tivuuk he kelibutan. Iyan haazà sikan is migngezanan te Gug wey Magug. Edtig̵umen sikandan ni Setanas wey zan mekepekidtebek te Megbevayà. Utew zan mezakel su henduen dan te pantad diyà te veyvey te zag̵at.