Kulusas 1:4 - Manobo Western Bukidnon

⁴ su nezineg dey is tudtul he mezesen is kedtuu niw ki Jesu Kristu wey zekelà layun is gag̵ew niw te minsan hentei he etew he g̵aked te Megbevayà.

Kulusas 1:4 Cross References

2 Kurintu 7:7

Ne kenà iyan dà ingkelipey zey is keg̵alew zey ki Tito, kekenà, elin daan is tudtul zin he utew sikandin nelipey mehitenged keniyu. Netudtul zin he egkesuatan niw utew he mekepenumbaley a ziyan. Netudtul zin daan he ebuyù kew te pesaylu zini te kediey. Ne elin daan tudtul zin is: dekelà te g̵ehinawa niw is kedtumana niw te egkesuatan ku. Ne tenged kayi utew zekelà is kelipey ku.

Gelasya 3:26

Ne g̵eina te iyan haazà, nehimu kew en pudu he menge anak te Megbevayà tenged dà te kedtuu niw ki Jesu Kristu.

Gelasya 3:28

Ne tenged dutun kinahanglan he kenè niw isipa he ibpelavi te Megbevayà is menge Hudiyu, ne emun kenà, ne iyan is kenà menge Hudiyu, su ziyà te kandin neked-iiring is langun he menge etew, uripen se kenà uripen, maama se vahi, ne sikiyu zaan, neked-iiring kew ziyà te Megbevayà su neked-iiring kew he edtuu ki Jesu Kristu.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Ipisu 1:15

Ne tenged kayi, menge suled, geina te netudtulan a he mezesen is kedtuu niw te Nengazen tew he si Jesus wey zekelà is gag̵ew niw te minsan hentei he tumutuu kandin,

Ipisu 6:18

Pekezesen kew ampù te minsan hengkey he timpu sumalà is ked-uwita keniyu te Wag̵as he Mulin-ulin. Buyù kew te tavang te Megbevayà ne layun kew andam ne peniguduwi niw layun te ked-ampù is langun he menge tumutuu.

Kulusas 1:9

Ne tenged kayi ibpenigudu zey sikiyu id-ampù puun pa zutun te andew zengan he nezineg dey is tudtul mehitenged te kedtuu niw. Layun dey id-ampù diyà te Megbevayà he veg̵ayi kew zin te kegkesayud te langun he ulaula he ebpeveelan din keniyu, he ke và dà egkeg̵iya, mehimu kew zin he mebmetau ne pinaag̵i te Wag̵as he Mulin-ulin, iveg̵ey zin keniyu is kegketuusi te meupiya wey mezaat.

1 Tiselunika 1:3

Su emun ed-ampù key te Megbevayà he Amey tew kenè dey egkelipatan is kedtuu niw, wey is kebmahala niw, wey is kebperateng niw te Nengazen tew he si Jesu Kristu. Su egketuusan is kedtuu niw kandin pinaag̵i te ulaula niw, ne pinaag̵i te kedhag̵ù niw egketuusan daan is kebmahala niw kandin diyà te g̵ehinawa niw. Ne egketuusan daan is kebperateng niw kandin pinaag̵i te kebmeinentusen niw.

1 Tiselunika 3:6

Ne iyan pa kebpekeuma ni Timoteo he ebpuun diyan te Tiselunika. Ne meupiya is tudtul zin he mezesen ded is kedtuu niw te Megbevayà wey ebmahalen niw zaan diyà te g̵ehinawa niw is menge zuma niw. Ne iyan daan tudtul zin is: utew meupiya is gehinawa niw kenami, ne ebulungen kew kenami iring te kebulunga zey zaan keniyu.

2 Tiselunika 1:3

Menge suled, kinahanglan he layun dekelà is kebpeselemati zey te Megbevayà tenged keniyu. Ne hustu heini su layun dekelà is ked-uswag te kedtuu niw wey layun daan ed-iseg is kebmahala niw te uman sevaha he menge zuma niw ziyà te g̵ehinawa niw.

Pilimun 1:5

su nezineg ku is tudtul mehitenged te mezesen he kedtuu nu te Nengazen tew he si Jesus wey mehitenged te kebmahala nu ziyà te g̵ehinawa nu te langun he menge tumutuu kandin.

Hibriyuhanen 6:10

Su kenà egkehimu he kenà metazeng is kedsusiya keniyu te Megbevayà; su kenà egkehimu he egkelipatan din is langun he meupiya he mid-ulaula niw tenged te mahal sikandin diyà te g̵ehinawa niw su midtevangan niw is menge zuma tew he tumutuu ne minsan guntaan wazè niw engkezi is kedtevangi niw kandan.

1 Juan 3:14

Netuenan tew he zengan iyan egkeperateng tew is kemetayen he wazà pidtemanan. Ne netuenan tew zaan he g̵untaan duen tew en untung he wazà pidtemanan. Umba netuenan tew heini su utew en mahal zini te g̵ehinawa tew is menge zuma tew. Is minsan hentei he kenà mahal ziyà te g̵ehinawa zin is menge zuma zin, kemulu pa sikandin ebpekeperateng te kemetayen he wazà pidtemanan.

1 Juan 3:23

Ne iyan insug̵ù din kenitew is: kinahanglan he edtuuwan tew is Anak din he si Jesu Kristu wey ebmahalen tew te kada sevaha is menge zuma tew sumalà is insug̵ù daan dengan ni Jesus.

1 Juan 4:16

Ne tenged dutun nesavut tew en he utew zekelà is gagew kenitew te Megbevayà ne umba ebpekesarig kiw. Is minsan hengkey he ed-ul-ulahan te Megbevayà, ne iyan kebpaahaa zin te g̵agew zin. Is minsan hentei he layun dekelà is gagew zin te menge zuma zin, meheg̵et is kebpekidsevaha zin te Megbevayà, ne ziyà te kandin ed-ubpà is Megbevayà.