Kulusas 1:23 - Manobo Western Bukidnon

²³ Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Kulusas 1:23 Cross References

Marcos 16:15

Ne zutun migkeg̵iyan ni Jesus sikandan te, “Penhipanew kew ziyà te tivuuk he kelibutan, ne ipesavut niw is Meupiya he Tudtulanen diyà te minsan hentei he etew he linimbag te Megbevayà.

Lucas 22:32

Iyan, in-ampù ku sikew, Simon, diyà te Megbevayà he kenà maawà is kedtuu nu kediey. Ne emun melig-en en is kedtuu nu kediey ne himuwa nu he mebmelig-en daan is kedtuu te menge zuma nu.”

Lucas 6:48

iring sikandin te etew he ebevaley te melig-en diyà te zivavew te zekelà he vatu. Memezalem is bangbang din he mibpesekan din te tukud. Ne nepasad haazà is baley ne mibagyu ne midalem is wahig ne nesug̵at haazà is baley te meseleg he wahig, iyan, wazà merundus su nevig̵eran man.

Juan 15:6

Su ke zuen etew he edsuwey kediey, ed-engkezan sikandin iring te subpang he idtimbag wey meg̵angu. Ne is menge subpang he nengeg̵angu, edtig̵umen ne idtimbag diyà te hapuy wey metutung.

Nengeulaula 1:17

Si Hudas, duma tew he epustul, su insarig daan diyà te kandin is ebpeveelan kenitew te Nengazen,” ke si Pedro.

Nengeulaula 1:25

he mehimu he epustul he id-ilis ki Hudas. Su si Hudas, mid-engkezan din kes mibpeveelan kandin ne midhendiyè en te hustu he ed-ulian din.”

Nengeulaula 1:8

Iyan,” ke si Jesus, “ebeg̵ayan kew zin te g̵ehem emun egkelumunan kew en te Wag̵as he Mulin-ulin, ne is tudtul te keag̵i ku, idsangyew niw zini te Hiruselim wey id-eneb niw zini te prubinsya he Hudiya wey ziyà daan te prubinsya he Semarya wey minsan hendei zini te egketemanan te kelibutan.”

Nengeulaula 11:23

Ne hein nekeuma si Bernabe, neehè din he utew zekelà is tuvad te Megbevayà te menge etew, ne heini, utew zin ingkelipey. Inhangyù din kandan he hemeni zan wey heg̵eta zan is kedtuu zan te Nengazen.

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

Nengeulaula 2:5

Duen menge Hudiyu ziyà te Hiruselim he ziyà ebpemuun te minsan hendei he inged dini te tungkup te kelibutan ne menge metinumanen sikandan te sug̵ù te Megbevayà.

Nengeulaula 20:24

Iyan, kenè ku en egkenug̵unan heini is untung ku zini te kelibutan su wey ku mepasad is ebpeveelan kedì te Nengazen tew he si Jesus he iyan is kedsengyawa te Meupiya he Tudtulanen te g̵ag̵ew kenitew te Megbevayà.

Nengeulaula 26:16

Enew ka. Mibpaahà a kenikew wey ku sikew mehimu he sulug̵uen ku. Tudtula nu ziyà te zuma he menge etew is kebpeehè ku kenikew g̵untaan wey tudtula nu zaan is ibpeehè ku zaan kenikew keuzemà.

Nengeulaula 4:12

Iyan dà si Jesus ebpekelibri te silut kenitew,” ke si Pedro, “su zini te tivuuk he kelibutan wazè en duma pa he ngazan he etew he ebpemeleveg he imbeg̵ey te Megbevayà.”

Ruma 10:18

Ne siguradu zuen egkag̵i he umba ves wazà meketuu is menge Hudiyu su wazè dan mezineg heini is kebpesavut, iyan, kenà egkehimu he wazè dan mezineg, su zuen insurat he Lalag te Megbevayà he edhenduen te, “Heini is lalag, ne nekeeneb is kebpenudtula kayi te tivuuk he menusiyà ne wazà taman te kedsengyawa kayi,” ke sikandin.

Ruma 15:16

wey a mehimu he sug̵ù ni Jesu Kristu ziyan te keniyu te menge etew he kenà menge Hudiyu. Henduen te memumuhat a su ke pinaag̵i kedì ebpeketuu is menge etew; egkehimu zan he iring te pemuhat ku he pinaag̵i te kedlumpiyuwi kandan te Wag̵as he Mulin-ulin edewaten te Megbevayà.

Ruma 2:7

Iyan, duen menge etew he edhemenan dan is meupiya he ulaula su iyan ed-isipen dan layun is kedelig̵a wey is kedtulusa kandan keuzemà te Megbevayà wey is kegketehuza zin kandan keuzemà. Ne untung he wazè din pidtemanan is ibeg̵ey zin kandan.

Ruma 5:5

Ne umba kenà egkehimu he kenè tew egkekuwa keuzemà is impenaad kenitew te Megbevayà su pinaag̵i te Wag̵as he Mulin-ulin he imbeg̵ey zin kenitew, egketuusan ta he ingkeg̵ag̵ew ki te Megbevayà.

1 Kurintu 15:58

Na, menge mahal ku he menge suled, geina te iyan heini, heg̵eta niw is kedsarig niw te Megbevayà su wey wazà ebpekezezaat te kedtuu niw. Peniguduwi niw tumana is ebpeveelan keniyu te Nengazen; hag̵ù kew te taman te egkehimu niw su netuenan niw he emun iyan edtumanen niw is ebpeveelan te Nengazen, kenà egkehimu he wazà pulus te vaal niw.

1 Kurintu 3:5

Isipa niw man heini. Siak si Pablo, hentei a? Ne hentei zaan si Epulus? Sulug̵uen key zà te Megbevayà. Pinaag̵i kenami midhimu zin he meketuu kew. Edtumanen dey zà is ebpeveelan din kenami. Ne iyan dà ed-ul-ulahan dey.

2 Kurintu 10:1

Duen egkag̵i he siak, si Pablo, telawen a emun diyan a te keniyu, iyan, memeg̵arang kun is menge lalag ku keniyu emun edlelag̵an ku sikiyu pinaag̵i te surat. Iyan, guntaan, kenà meg̵arang is menge lalag ku, kekenà, edhangyù a keniyu pinaag̵i te menayù he menge lalag iring te menayù wey velig̵eg̵awen si Kristu.

2 Kurintu 11:23

Netuenan ku he henduen a te ebuneg̵en kayi te menge lalag ku, iyan, kenà egkesabpeng is bèbè ku kayi te egkeg̵iyen ku. Egkeg̵iyen dan he menge sulug̵uen sikandan ni Kristu. Siak, lavew e pa he metinumanen he sulug̵uen ni Kristu. Utew memereg̵en is ebpeveelan din kediey. Lelayun ad egkepirisu ne sikandan, kenà layun. Lelayun ad ebug̵ela te menge etew he kuntada te Megbevayà, kenà te sikandan. Mezakel en is nengeeg̵iyan ku he edhimetayan a pezem, kenà te sikandan.

2 Kurintu 3:6

Su iyan sikandin ebeg̵ey kenami te ketau wey zey ikepenurù is beg̵u he paag̵i he midtukud din te kebpekidsevaha zin te menusiyà. Ne wazà heini is beg̵u he paag̵i iveg̵ey pinaag̵i te insurat he kesug̵uan, kekenà, imbeg̵ey zin heini kenitew pinaag̵i te Wag̵as he Mulin-ulin. Su emun iyan ta edserig̵an is kedtumana ta te kesug̵uan, ne kemetayen he wazà pidtemanan is ebperetengen ta. Iyan, ke ibeg̵ey kenitew is Wag̵as he Mulin-ulin ne untung he wazà pidtemanan is ebperetengen ta.

2 Kurintu 4:1

Nehizuwan key te Megbevayà ne midtezù key zin wey zey metuman is ebpeveelan din kenami mehitenged te kedsengyawa te veg̵u he paag̵i ne tenged dutun kenà egkeawà is gustu zey te kedtumana kayi.

2 Kurintu 6:1

Ne g̵eina te nehimu key en he menge timbang te Megbevayà, edhengyuan dey sikiyu he himuwa niw he mebpulus is gag̵ew zin keniyu.

Gelasya 4:11

Utew ku sikiyu igkeipeng su kela ke kenà ebpulus is langun he impenurù ku keniyu.

Gelasya 5:5

Iyan, sikami mulà, pinaag̵i te g̵ehem te Wag̵as he Mulin-ulin wey tenged te kedtuu zey kandin, iyan ebpeebuten dey is kedhimuwa kenami he metazeng te Megbevayà.

Gelasya 5:7

Mibpurungan niw zengan te ed-ikul is hustu he ibayà. Maan is idtug̵ut niw he zuen ed-eg̵en keniyu wey niw kenè en metuuwi is tutuu he tuluuwen?

Gelasya 6:9

Umba kenè ki ebpepepeg̵ul te ked-ulaula te meupiya su emun ebpeniguduwan ta heini, egkeuma is timpu keuzemà he zuen idsuhul kenita te Megbevayà he utew meupiya.

Ipisu 1:18

Id-ampù ku he iveg̵ey zin daan keniyu is kebpurung kedsavut su wey niw metueni ke hengkey is langun he meupiya he egkeperateng tew keuzemà tenged te midhimu kiw en he menge tumutuu zin, ne wey niw zaan metueni he utew mezakel zutun is menge meupiya he idtuvad din kenitew.

Ipisu 2:21

Ne pinaag̵i ki Kristu nevig̵eran is kebeeli kayi te valey ne egkehimu heini he valey te Nengazen he zutun sikandin ed-ezapa.

Ipisu 3:17

su wey, pinaag̵i te kedtuu niw, melumuni is gehinawa niw ni Jesu Kristu. Ne idhangyù ku zaan he heg̵eti zin wey lig-eni zin is kebmahala niw te minsan hentei. Umba idhangyù ku heini su wey sikiyu,

Ipisu 4:16

Su iring kiw te lawa, ne sikandin iyan ulu. Ne sikitew is lawa, ne ebpekesarig kiw kandin te ulu. Ne is minsan hengkey he parti kayi te lawa, ne ebpekesarig daan te menge zuma zin he parti. Ne emun hustu is baal zutun te kada sevaha he parti, edtulin haazà is tivuuk he lawa pinaag̵i te kebpekedtetevangà te minsan hendei he parti zin. Ne sikitew zaan, ebpekeiseg is kebpekeiring tew te ulaula ni Kristu pinaag̵i te kebpurungi te kada sevaha te zuma zin.

Kulusas 1:25

Nehimu a he sulug̵uen wey a meketavang te menge tumutuu. Ne umba mibpilì a te Megbevayà su wey ku sikiyu metevangi is menge etew he kenà Hudiyu ne wey ku ikepurung ikepenudtul is Lalag te Megbevayà.

Kulusas 2:7

Purung kew pendalid diyà te kandin; purungi niw istudyuwi is menge ulaula zin; purungi niw tuuwi sikan is tutuu he tuluuwen he impenurù keniyu. Ne kinahanglan he layun niw peselemati te Megbevayà is gag̵ew zin keniyu.

1 Tiselunika 3:3

su wey kenà meliveg is minsan hentei keniyu tenged te kebpesipelahi keniyu te menge etew. Netuenan niw en he sikitew is tumutuu, imbanglis kenitew te Megbevayà is kemeresayan.

1 Tiselunika 3:5

Ne tenged kayi hein kenè ku en egkeantus is kegkeipeng ku keniyu, midsug̵ù ku ziyan si Timoteo wey ku metueni ke nemenumenu en is kedtuu niw. Nahandek a su kela ke nepenulayan kew ni Setanas ne naawà is pulus te kedhag̵ù dey ziyan te keniyu.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

2 Tiselunika 2:16

Berakat he lipaya kew wey lig-eni kew te Nengazen tew he si Jesu Kristu wey te Amey tew he Megbevayà su wey meupiya is langun he menge vaal niw wey is langun he menge lalag niw. Mahal kiw layun diyà te g̵ehinawa zin ne pinaag̵i te g̵ag̵ew zin kenitew zuen tew igkelipey he wazè din pidtemanan wey zuen tew zaan utew meupiya he ebperetengen.

1 Timoteo 1:12

Ebpeselematan ku is Nengazen tew he si Jesu Kristu su mibeg̵ayan e zin te zesen wey ku metuman heini is ebpeveelan din kedì. Mid-isip e zin he metinumanen ne tenged kayi intezù e zin he sulug̵uen din.

1 Timoteo 2:7

Ne tenged kayi intezù e zin he epustul ne midsug̵ù e zin wey ku ipenurù heini. Kenà tarù heini is egkeg̵iyen ku, kekenà, tutuu. Midtezù e zin wey ku mepenurù is menge etew he kenà Hudiyu su wey zan meketuu te tutuu he tuluuwen.

1 Timoteo 3:16

Ne netuenan tew te langun he lavew pa te langun is imbugnà he tuluuwen he midtuuwan tew. Mibpeetew si Kristu; midtistig̵usan te Wag̵as he Mulin-ulin he metazeng sikandin; naahà sikandin te menge velinsug̵uen te Megbevayà; insangyew sikandin diyà te menge etew he kenà menge Hudiyu; duen menge tumutuu kandin dini te tivuuk he kelibutan; midtulus sikandin pehendiyà te langit.

Tito 3:7

Umba mid-ulaula zin heini su wey tenged te g̵ag̵ew zin kenita meisip ki zin he metazeng ne maangken ta is untung he wazà pidtemanan he iyan ebperetengen ta.

Hibriyuhanen 10:38

Ne haazà is menge sakup ku he nengehimu en he metazeng tenged te kedtuu zan kedì, ebeg̵ayan ku sikandan te untung he wazè din pidtemanan. Iyan, ke zuen minsan hentei kandan he edsuwey tenged te kegkehandek, utew ku igkeepes,” ke sikandin.

Hibriyuhanen 3:14

Su sikitew, emun edhemenan tew is daan he kedsarig tew ki Kristu, duen tew pudu upakat kandin.

Hibriyuhanen 3:6

Ne si Jesus mulà, Anak sikandin te Megbevayà he metinumanen is kebayàbayè din te valey. Ne iyan kiw valey zin emun edhemenan tew is kedsundan tew kandin wey is melipayen he kedteg̵azi tew te langun he impenaad kenitew ni Kristu.

Hibriyuhanen 4:14

Ne tenged kayi, menge suled, edhemenan tew is kedtuu he impenurù kenitew. Su zuen utew lavew he memumuhat he iyan datù tew he nekid-etuvang en te Megbevayà. Iyan heini si Jesus he Anak te Megbevayà.

Hibriyuhanen 6:19

Ne utew mezesen wey nelig-enan heini is kebpeebuta tew he edtumanen te Megbevayà is penaad din su iyan edserig̵an tew is Megbevayà. Ne si Jesus, ne nehimu en sikandin he zatù tew ne ziyè en sikandin te etuvangan te Megbevayà. Ne nehimu en si Jesus he lavew he memumuhat tew he wazè din pidtemanan he iring te memumuhat dengan he si Milkisidik.

1 Pedro 1:3

Utew zekelà is kebpeselemati tew te Megbevayà he iyan Amey te Nengazen tew he si Jesu Kristu. Su tenged te zekelà is hizu zin kenitew, mibeg̵ayan kiw zin te veg̵u en he untung. Ne g̵untaan ebpekeperateng kiw he egkevanhew kiw keuzemà su mibanhew zin si Jesu Kristu.

1 Pedro 1:5

Kenitew en haazà is integ̵ana zin. Tenged te nekesarig kiw kandin, nelig-enan kiw te g̵ehem te Megbevayà te kemulu kiw pa edtag̵ad te kedtulusa zin kenitew keuzemà te ketepusan he timpu.

1 Juan 2:27

Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

Impezayag 2:10

Kenè kew mahandek te meg̵aan niw en igkerasey. Si Setanas, meg̵aan din en ibpepirisu is duma keniyu su ebpenulayen kew zin. Ne seled te sepulù he andew ebpekeantus kew te kemereg̵enan. Mebmetinumanen kew te menge sug̵ù ku taman te kemetayen su ebeg̵ayan ku sikiyu te kuruna he iyan is untung he wazà pidtemanan.