Juan 8:39 - Manobo Western Bukidnon

³⁹ Ne midtavak dan te, “Iyan kepuun dey si Abraham.” Ne migkag̵i si Jesus te, “Angin ke tutuu kew he kevuwazan ni Abraham su ebeelan niw is mibeelan dengan ni Abraham.

Juan 8:39 Cross References

Mateo 3:9

Ne kenè niw iyan serig̵i is kevuwazan kew ni Abraham su wazà dutun pulus diyà te Megbevayà. Su egkeg̵iyan ku sikiyu he emun iyan egkinehenglanen te Megbevayà, egkehimu he ebeelan din heini is menge vatu he kevuwazan ni Abraham.

Mateo 5:45

Ne emun ebeelan niw heini ebpekeiring kew te Amey tew he Megbevayà he ziyà te langit. Su is Megbevayà, kenà iyan dà ebpesilaan din te andew is menge metazeng he menge etew, kekenà, elin daan is menge kenà metazeng. Ne kenà iyan dà is meupiya is ulaula zin ebeg̵ayan din te uzan, kekenà, elin daan is mezaat is ulaula zin.

Juan 8:33

Ne midtavak dutun is menge punuan te, “Iyan kepuun dey si Abraham, ne wazè key meuripen te minsan hentei; maan is migkag̵i nu he egkevelukasan key?”

Juan 8:37

Netuenan ku he menge kevuwazan kew ni Abraham; ne minsan pa zutun edhimetayan a pezem keniyu su kenà ed-ereg diyà te g̵ehinawa niw is ibpenurù ku keniyu.

Juan 8:43

Umba kenè kew ebpekesavut te egkeg̵iyen ku su kenè niw egkesuatan te edtuman is ibpenurù ku.

Juan 8:56

Sikan is kepuun niw he si Abraham, utew sikandin nelipey zengan su netuenan din he ibpehendini a te kelibutan umba nelipey sikandin su ebpeebuten e zin.”

Ruma 4:12

Ne nehimu zaan si Abraham he kepuun, he ke và dà egkeg̵iya, egkeiringan te langun he menge Hudiyu he kenè dan iyan serig̵i is kedsirkunsidara kandan, kekenà, iyan dan serig̵i is kedtuu zan he iring te kedtuu ni Abraham te wazè pa sikandin sirkunsidara.

Ruma 4:16

Umba midhimu te Megbevayà he egkezawat tew is impenaad din pinaag̵i zà te kedtuu tew su wey mehimu heini pinaag̵i te g̵ag̵ew zin, ne kenà pinaag̵i te ed-ul-ulahan tew. Ne tenged kayi kenè en ebperis he egkezawat tew te langun he menge kevuwazan ni Abraham is impenaad te Megbevayà. Ne kenà iyan dà ebpekezawat is menge Hudiyu he nesakup te kesug̵uan, kekenà, elin daan is minsan hentei he zuen din kedtuu he iring ki Abraham su nehimu si Abraham he kepuun te langun he edtuu, Hudiyu se kenà Hudiyu.

Ruma 9:7

Is langun he egngezanan he menge kevuwazan ni Abraham, kenà daan langun te sikandan ed-isipen te Megbevayà he tutuu he menge kevuwazan ni Abraham, he ke và dà egkeg̵iya, kenè dan is langun ebpekezawat te impenaad te Megbevayà. Su migkag̵i zengan is Megbevayà diyà te ki Abraham, ke sikandin te, “Pinaag̵i zà ki Isaak is tutuu he kevuwazan nu.”

Gelasya 3:29

Ne g̵eina te sakup kew ni Kristu, nehimu kew en he iring te menge kevuwazan ni Abraham ne egkezawat niw zaan is impenaad te Megbevayà ki Abraham.

Gelasya 3:7

Ne sikiyu zaan, kinahanglan he sevuta niw he iyan ded heini g̵untaan kayi te kenitew su ke zuen etew he edtuu te Lalag te Megbevayà ne nehimu en sikandin he kevuwazan ni Abraham, he ke và dà egkeg̵iya, egkezawat din is impenaad te Megbevayà diyà te ki Abraham.