Juan 8:29 - Manobo Western Bukidnon

²⁹ Ne is Amey ku he midsug̵ù kedì, duma ku zaan; kenè e zin ed-ewaan su kenà a ed-engked he edtuman te egkesuatan din.”

Juan 8:29 Cross References

Mateo 17:5

Ne te kemulu pa heini is lalag ni Pedro, neselikuvungan sikandan te ebpenganlag he g̵apun. Ne ebpuun dutun te g̵apun nezineg dan is midtik-ew megkag̵i te, “Iyan heini sikan is Anak ku he utew ku minahal; ingkesuat ku utew sikandin. Pemineg̵a niw sikandin.”

Mateo 3:15

Ne midtavak si Jesus, ke sikandin te, “Kenà, su kinahanglan he ebeelan ta is iring kayi wey ta meveeli is langun he egkesuatan te Megbevayà.” Ne zutun human mebpezumazuma si Juan, ne mibewtismuwan din si Jesus.

Mateo 3:17

Ne zutun nezineg is Megbevayà diyà te langit he egkag̵i, ke sikandin te, “Iyan heini Anak ku he utew ku minahal. Utew ku sikandin igkelipey.”

Juan 14:31

iyan, is ed-ul-ulahan ku g̵untaan, ne iyan insug̵ù kediey te Amey ku he Megbevayà. Edtumanen ku heini su wey metueni te menusiyà he mahal zini te g̵ehinawa ku is Amey ku. Ne kuwa kew en su ed-awè kiw kayi.”

Juan 15:10

Emun edtumanen niw is menge sug̵ù ku keniyu, ne kenè kew egkeawà te kebmahala ku keniyu zini te g̵ehinawa ku iring te midtuman ku is menge sug̵ù kediey te Amey ku he Megbevayà ne kenà ad daan egkeawà te kebmahala zin kedì diyà te g̵ehinawa zin.

Juan 16:32

Egkesipeg̵an en is timpu he zutun ebpekedsusuwey kew is langun; ed-ulì is kada sevaha keniyu ziyà te ed-ubpaan din ne egkeewaan a. Ne minsan pa zutun duen ku pa zuma su iyan duma ku is Amey ku he Megbevayà.

Juan 17:4

Dini te kelibutan, impeehè ku is utew zekelà he bentug̵an nu su is menge vaal he insug̵ù nu kediey, nepasad ku en.

Juan 4:34

“Iring te egkekaan ku,” ke si Jesus, “is kedtumana ku te egkesuatan te Megbevayà he midsug̵ù kediey wey is kedhimesaza ku te impeveelan din kediey su iyan ibmezesen ku.

Juan 5:30

Wazà egkehimu ku te sebsevaha ku; su is paag̵i te kedsusiya ku te nengeveelan te menusiyà, impenurù kediey te Amey ku he Megbevayà. Ne metazeng mulà is kediey he kedsusi kandan su kenè ku ebpengahaan is kediey he egkesuatan, kekenà, is egkesuatan te Amey ku he midsug̵ù kediey.

Juan 6:38

Iyan igkeg̵iya ku kayi keniyu su midhendini a he ebpuun te langit wey ku metuman is egkesuatan te Megbevayà he midsug̵ù kediey; kenè ku iyan edtumanen is kediey zà he egkesuatan.

Juan 8:16

Ne minsan ke zuen ibpezayag ku he kedhukum, egkeserig̵an mulà is kedì su kenà kediey zà he kedhukum, kekenà, hukum he ziyà ebpuun te Megbevayà he iyan midsug̵ù kediey.

2 Timoteo 4:17

Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu. Ne tenged dutun nelibri a ne wazà a mehimetayi.

2 Timoteo 4:22

Berakat he zumahi kew te Nengazen. Ikeg̵ag̵ew kew zin is langun. Iyan a si Pablo.

Hibriyuhanen 4:15

Ne heini si Jesus is lavew he memumuhat tew, nesavut din is keg̵uyè tew tenged te kememenusiyai tew su neseg̵azan din he mibpenulayan sikandin dengan ni Setanas te minsan hengkey he paag̵i iring te ebpenulayan kiw zaan, iyan, wazà mulà sikandin mepenulayi.

Hibriyuhanen 7:26

Iyan si Jesus lavew he memumuhat he egkinehenglanen tew su wazà igkesewayi te menge ulaula zin, wazè din salà, ne wazè din sayep. Ne kenà sikandin iring te menge mekesesalà he menusiyà, ne midhimu sikandin te Megbevayà he lavew te minsan hentei ziyà te langit.

1 Juan 2:1

Sikiyu is iring te menge anak ku, iyan ibpesurati ku keniyu is: wey meheg̵eti is kedtuu niw wey kew kenà mekesalà. Iyan, ke zuen ebpekesalà he minsan hentei kenitew, duen datù tew he edtavang kenitew ziyà te etuvangan te Amey tew he Megbevayà. Iyan datù tew si Jesu Kristu he utew metazeng.

1 Juan 3:22

Ibeg̵ey zin kenita is ebuyuen ta su edtumanen ta is menge sug̵ù din wey ed-ul-ulahan ta is egkesuatan din.