Juan 6:14 - Manobo Western Bukidnon

¹⁴ Ne hein naahà te menge etew is egkein-inuwan he nehimu ni Jesus migkag̵i zan te, “Tutuu ves iyan he iyan en heini sikan is netagnà he ebpeneuven te Megbevayà he ibpehendini zin te kelibutan!”

Juan 6:14 Cross References

Mateo 11:3

“Keleduwi key,” egkag̵i haazà is menge sug̵ù ni Juan diyà te ki Jesus, “ke iyan ke ve kes migkag̵i ni Juan he netagnà is kebpekeuma zin dini te kelibutan wey ke zuen pe be ebpeebuten dey.”

Mateo 21:11

Ne midtavak is mezakel he menge etew he nemenduma ki Jesus te, “Iyan sikandin sikan is ebpeneuven te Megbevayà he si Jesus he tigNeserit diyà te Geliliya.”

Lucas 24:19

Ne mid-uman med-insà si Jesus kandan te, “Maan? Hengkey is nehitavù?” Ne midtavak dan te, “Iyan is nehitavù ki Jesus he tigNeserit. Ebpeneuven sikandin te Megbevayà ne midtuuwan sikandin te langun he menge etew. Dekelà is gehem din te ebpenurù ne mekeg̵eg̵ehem daan sikandin he ebaal te menge egkengein-inuwan.

Lucas 7:16

Ne is langun he nemekeahà dutun, ne utew zan nengehandek ne nezalig dan is Megbevayà, ke sikandan te, “Heini en te kenitew is utew lavew he ebpeneuven te Megbevayà!” Ne ke sikandan daan te, “Mibulus en is Megbevayà su wey kiw melibri is menge nengepilì din he etew!”

Juan 1:21

Ne ke sikandan te, “Iyan ke ve kes ebpeneuven dengan he si Elias?” Ne ke si Juan te, “Kenà a zaan.” Ne ke sikandan te, “Kela ke iyan ka sikan is netagnà he mibpenaub te Megbevayà?” Ne ke si Juan te, “Kenà a zaan.”

Juan 11:27

Ne midtavak si Marta te, “Uya, edtuu a he iyan ka sikan is Anak te Megbevayà; iyan ka kes netagnà he hadì he ebperetengen dey he edhendini te kelibutan.”

Juan 2:11

Iyan haazà nehuna he egkein-inuwan he mibeelan ni Jesus; midhimu zin diyà te inged he Kana ziyà te prubinsya he Geliliya, ne pinaag̵i zutun impeehè din is dekelà he g̵ehem din ne midtuu kandin is menge sumusundan din.

Juan 4:19

Ne mid-uman megkag̵i haazà is bahi te, “Ebpeneuven ke ves te Megbevayà?

Juan 4:25

Ne zutun migkag̵i haazà is bahi te, “Netuenan ku he ebpekeuma keuzemà is mibpilì te Megbevayà wey mekehadì, sikan is migeraran ki Kristu. Ne emun ebpekeuma en, ibpesavut din kenitew is langun.”

Juan 4:42

ne migkeg̵iyan dan sikan is bahi te, “Nemeketuu key, kenà tenged dà te migkag̵i nu, kekenà, tenged daan te nezineg dey is menge lalag din, ne netuenan dey en he tutuu iyan he iyan sikandin sikan is Menluluwas te menusiyà.”

Juan 6:2

Ne zuen utew mezakel he menge etew he ebpemenduma kandin su nengeehè dan is menge egkein-inuwan he mibeelan din te kebewii zin te menge egkengezeruwan.

Juan 6:26

Ne midtavak si Jesus te, “Benar is egkeg̵iyen ku keniyu he, umba ebpen-ahaan a keniyu kenà tenged te tutuu is kedsavut niw te menge egkein-inuwan he nengeehè niw, kekenà, tenged te nengehantey is getek niw te supas he nekaan niw g̵evii.

Juan 6:30

Ne zutun migkeg̵iyan dan en maan te, “Hengkey is egkein-inuwan he igkepeehè nu kenami wey key meketuu kenikew?

Juan 7:40

Nezineg haazà is menge lalag ni Jesus te utew mezakel he menge etew zutun, ne migkag̵i is duma te, “Tutuu iyan he iyan heini he etew sikan is ebpeebuten tew he netagnà he ebpeneuven te Megbevayà!”

Nengeulaula 7:37

Ne si Moises, migkeg̵iyan din is menge kepuun tew te, ‘Keuzemà duen daan ebpeneuven te Megbevayà he ed-uwit keniyu iring kedì te ebpeneuven din. Ne heini he ebpeneuven keuzemà, duma niw zaan he Hudiyu.’