Juan 3:5 - Manobo Western Bukidnon

⁵ Ne ke si Jesus te, “Utew venar is egkeg̵iyen ku kenikew he wey zà ebpekeragkes is etew ziyà te menge etew he edhedian te Megbevayà ke id-anak sikandin pinaag̵i te wahig wey pinaag̵i te g̵ehem te Wag̵as he Mulin-ulin.

Juan 3:5 Cross References

Mateo 18:3

Ne ke si Jesus te, “Kenè niw lipati heini: kinahanglan he ed-ewaan niw ziyà te isip niw is kebpelavew ne iringi niw heini is batà, su nelevawan sikandin te langun. Su emun kenè niw ed-iringan heini, ne kenè kew egkehedian te Megbevayà.

Mateo 19:24

Egkeg̵iyen ku keniyu he kenè din egkehimu. Melemu pa te kemilyu is kedseled din diyà te vudsi te rag̵um kenà te sepian he etew is kebpesakup din te Megbevayà wey sikandin mehedii.”

Mateo 21:31

Ne ke si Jesus te, “Hentei zutun te zezuwa he telesuled is hustu he neketuman te sug̵ù te Amey zan?” Ne ke sikandan diyà te ki Jesus te, “Iyan haazà is kakey.” Ne ke si Jesus dutun te, “Benar iyan he edhuna keniyu is menge mezaat he etew iring te menge menunukut te vuhis wey is menge vahi he ibpenapì dan is dengeg dan su edewaten sikandan te Megbevayà wey zin mehedii kenà sikiyu.

Mateo 28:19

Umba, penhipanew kew en diyà te minsan hendei wey niw metukid te ebpesavut is langun he menge etew ziyà te langun he menge inged. Ne penurua niw he medsundan dan kedì. Pemewtismuwi niw sikandan wey metueni he nekidsevaha zan te Amey tew he Megbevayà, wey siak is Anak din, wey is Wag̵as he Mulin-ulin.

Mateo 3:11

Wahig is ibewtismu ku keniyu,” ke si Juan, “he tuus te mid-iniyug̵an niw is mezaat he ulaula, iyan, duen etew he ed-ilis kediey ne iyan ibewtismu zin keniyu is Wag̵as he Mulin-ulin, ne emun kenà, ne hapuy. Lavew sikandin kedì, ne minsan is ked-uwit dà te sepatus din, kenè e pa zait he sulug̵uen din.

Mateo 5:20

Egkeg̵iyan ku sikiyu he wey kew zà egkehedii te Megbevayà ke edtumanen niw is egkesuatan te Megbevayà ne kinahanglan daan he lavew kew pa he metinumanen kenà is menge menunudlù te kesug̵uan wey is menge Perisiyu.

Marcos 10:14

Ne hein netuenan ni Jesus haazà is mid-ulaula te menge sumusundan din, wazè din ikesuat, ne ke sikandin diyà te kandan te, “Ipehendini niw te kediey heeyan is menge vatà ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà.

Marcos 16:16

Ne sikan is edtuu kayi wey ebpebewtismu, ebeg̵ayan te untung he wazà pidtemanan. Ne sikan is kenà edtuu ne edhukuman te silut.

Marcos 9:47

Ne emun iyan igkeawà te kedsarig nu kedì is mata nu, lug̵ita nu wey itimbag su meupiya pa ke sevaha zà is mata nu ke edhedian ka te Megbevayà kenà te zezuwa is mata nu ne idtimbag ka ziyà te Impirnu.

Lucas 13:24

“Himuwa niw is taman te egkehimu niw wey kew mekeseled te melig̵et he g̵emawan he idselang dutun te valey he iyan is untung he wazà pidtemanan su egkeg̵iyen ku keniyu he mezakel is egkesuat pezem he edseled dutun, iyan, kenè dan ebpekeseled.

Lucas 13:3

Kenà heeyan iyan! Su egkeg̵iyen ku keniyu he emun kenè niw ed-iniyug̵an is menge ulaula niw he memezaat, ebpatey kew zaan is langun, iring kandan.

Lucas 13:5

Kenà daan. Egkeg̵iyen ku keniyu he emun kenè niw ed-iniyug̵an is memezaat he menge ulaula niw ne ebpatey kew zaan is langun iring kandan.”

Juan 1:13

Is paag̵i te kegkehimu zan he anak te Megbevayà, kenà iyan kes paag̵i te kegkevuwad dini te kelibutan su wazè dan dutun ianak pinaag̵i te kegkevuwad te kelibutanen he amey, kekenà, iyan amey zan is Megbevayà.

Juan 3:3

Ne midtavak si Jesus te, “Benar is egkeg̵iyen ku kenikew he wey zà ebpekeragkes is etew ziyà te menge etew he edhedian te Megbevayà ke ebpaanak sikandin ebpeuman.”

Juan 3:4

Ne mid-insà si Nikudimu ke, “Ebmenmenuwen te etew he meg̵urang en is kebpaanak kebpeuman su kenè en man sikandin ebpekelikù te g̵etek te iney zin wey iuman ianak.”

Nengeulaula 2:38

Ne midtavak si Pedro te, “Kada sevaha keniyu, iniyug̵i zin is mezaat he ulaula zin ne mebpebewtismu wey metueni he ebpekidsevaha sikandin ki Jesu Kristu. Ne human egkepesaylu is menge salè din ne is Wag̵as he Mulin-ulin, ibeg̵ey kandin te Megbevayà.

Nengeulaula 3:19

Ne g̵untaan kinahanglan he ed-iniyug̵an tew en is memezaat he ulaula. Ed-empuan tew is Nengazen ne ebpeseyluwen kiw zin te menge salè tew. Ne zutun duen timpu he ebeg̵ayan is gehinawa tew te zesen he ziyà ebpuun te kandin.

Ruma 14:17

Su is kedhedii kenita te Megbevayà, ne kenà pinaag̵i te kedtumana ta te menge sug̵ù mehitenged te menge keenen wey inumen he idawey, kekenà, pinaag̵i te kebpeketezenga kenita te Megbevayà he metazeng wey pinaag̵i te melinawen he kebpekidepitè ta te menge zuma ta, wey pinaag̵i zaan te kelipey he ibeg̵ey te Wag̵as he Mulin-ulin.

Ruma 8:2

Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan.

1 Kurintu 15:50

Iyan ibpesavut ku, menge suled, is: heini is menge lawa tew he zuen kemetayen, ne kenà egkehimu he egkeragkes keuzemà te langun he edhedian te Megbevayà su haazà is lawa he zuen din kemetayen, kenà egkehimu he ebeg̵ayan te untung he wazà pidtemanan.

1 Kurintu 2:12

Sikitew is menge tumutuu, imbeg̵ey kenitew te Megbevayà is Wag̵as he Mulin-ulin ne is ed-ulin kenitew, diyà ebpuun te Megbevayà ne kenà ebpuun diyà te etew zà duen. Umba imbeg̵ey is Wag̵as he Mulin-ulin kenitew su wey tew mesavut is langun he ibeg̵ey kenitew te Megbevayà.

1 Kurintu 6:11

Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

Gelasya 6:15

Kenà ebpulus is kebpesirkunsidar ne kenà daan ebpulus is kenà kebpesirkunsidar. Iyan dekelà is pulus din is kegkehimu kenita he veg̵u en he linimbag.

Ipisu 5:26

ne wey kiw mezawat te Megbevayà. Midhimu zin heini pinaag̵i te kedlumpiyuwi zin kenitew pinaag̵i te kebewtismu wey pinaag̵i te lalag din.

1 Pedro 1:2

Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.

1 Juan 2:29

Netuenan te en he metazeng si Kristu. Netuenan ta zaan he minsan hentei he metazeng is menge ulaula zin, nehimu en sikandin he anak te Megbevayà.

1 Juan 5:1

Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì. Ne emun ebmahalen din diyà te g̵ehinawa zin is Amey tew he Megbevayà ebmahalen din daan is menge zuma zin he anak te Megbevayà.