Juan 21:15 - Manobo Western Bukidnon

¹⁵ Ne hein nekeramag dan en dutun, migkag̵i si Jesus diyà te ki Simon Pedro te, “Sikew Simon, he anak ni Juan, mahal e ve utew ziyan te g̵ehinawa nu, lavew te g̵ehinawa te menge zuma nu kedì?” Ne midtavak si Pedro te, “Uya, netuenan nu he mahal ka zini te g̵ehinawa ku.”

Juan 21:15 Cross References

Mateo 10:37

Ke zuen etew he iyan mahal ziyà te g̵ehinawa zin is amey zin wey iney zin kenà siak, kenà dait sikandin he egngezanan he sumusundan ku. Ne ke iyan mahal ziyà te g̵ehinawa zin is anak din kenà siak, kenà daan sikandin dait he egngezanan he sumusundan ku.

Mateo 16:17

Ne migkag̵i si Jesus te, “Simon, anak ni Juan, midtuvazan ka te Megbevayà su wazè nu metueni heini pinaag̵i te etew, kekenà, impinted kenikew te Amey ku he ziyà te langit.

Mateo 18:10

Ne is menge etew he iring kayi te menge vatà, kenè niw lupig̵i is minsan sevaha kandan su venar is egkeg̵iyen ku keniyu he is menge velinsug̵uen te Megbevayà he ebantey kandan, kenà ed-awà diyà te etuvangan te Amey ku he Megbevayà he ziyà te langit.

Mateo 26:33

Ne zutun migkag̵i si Pedro ziyà te kandin te, “Minsan ke edluyahan is kedsarig kenikew kayi te langun he menge zuma ku ne kenà mulà edluyahan is kedì, minsan egkemenumenu.”

Mateo 26:35

Ne migkag̵i si Pedro te, “Minsan pa ke edhimetayan a zuma kenikew kenà a egkag̵i he wazè ku sikew mekilala!” Ne iring ded daan dutun is menge pesarig dutun te zuma he menge sumusundan ni Jesus.

Marcos 14:29

Ne zutun migkag̵i si Pedro ziyà te kandin te, “Minsan ke edluyahan is kedsarig kenikew kayi te langun he menge zuma ku ne kenà mulà edluyahan is kedì, minsan egkemenumenu.”

Lucas 12:32

Sikiyu is menge sumusundan ku, kenè kew mahandek. Minsan pa te zeisey kew zà, is Amey niw he Megbevayà, egkesuatan din he medhadì kew iring te edhadì daan sikandin.

Lucas 22:32

Iyan, in-ampù ku sikew, Simon, diyà te Megbevayà he kenà maawà is kedtuu nu kediey. Ne emun melig-en en is kedtuu nu kediey ne himuwa nu he mebmelig-en daan is kedtuu te menge zuma nu.”

Juan 1:42

Ne miduma zin si Simon ne midhendiyè dan te ki Jesus. Ne si Jesus, midtengtengan din si Simon. “Iyan ka si Simon he anak ni Juan. Egeraran ku sikew ki Sipas,” ke si Jesus. (Is gerar he Sipas ne iyan ded sikan is ngazan he Pedro. Ne is kehulug̵an kayi, ne vatu.)

Juan 13:37

Ne migkag̵i med-uman si Pedro te, “Maan is kenà a ebpekezuma kenikew g̵untaan? Kenè ku sikew ed-ewaan minsan pa ke kinahanglan he ebpehimatey a tenged kenikew!”

Juan 16:27

su utew kew mahal ziyà te g̵ehinawa te Amey ku tenged te mahal a zaan diyà te g̵ehinawa niw wey tenged daan te midtuu kew he ziyà a ebpuun te Amey ku he Megbevayà.

Juan 21:12

Ne migkag̵i si Jesus te, “Ramag kew en.” Ne wazà nekeaku kandan te menge sumusundan he ed-insà ke hentei sikandin su netuenan dan he iyan haazà kes Nengazen he si Jesus.

Juan 21:7

Ne sikan is sumusundan he mahal ziyà te g̵ehinawa ni Jesus, migkag̵i sikandin diyà te ki Pedro te, “Iyan heeyan sikan is Nengazen tew.” Ne hein netuenan ni Pedro he iyan si Jesus haazà, insun-ud din is kumbalè din he midluwas din, ne mid-umpak diyà te wahig, ne midhendiyà te veyvey.

Juan 8:42

Ne migkag̵i kandan si Jesus te, “Angin pezem ke amey niw is Megbevayà su mahal a g̵eina ziyan te g̵ehinawa niw su te kedhendini ku, diyà a ebpuun te kandin. Kenà kediey zà he suat is kedhendini ku, kekenà, midsug̵ù e zin.

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

Nengeulaula 20:29

Netuenan ku he emun ed-ewaan ku sikiyu, duen edlepew kayi te keniyu he menge menunudlù he is ibpenurù dan, ne ebpekezezaat te upakat ne edèdeetan dan iyan is upakat niw te menge tumutuu.

Ruma 14:1

Ne ke zuen duma niw he edtuu ki Kristu, iyan, kenè pa meheg̵et is kedtuu zin, dewata niw sikandin, iyan, kenè kew mebpekidlewanà kandin ke is ulaula zin tenged te kedtuu zin, ne kenà utew ebpekeiring te keniyu.

Ruma 15:1

Ne sikitew is meheg̵et is kedtuu te Megbevayà, kinahanglan he ed-entusen ta is kenè ta ked-ul-ulaha te ulaula he ibpekesalà te menge zuma ta he kenè pa meheg̵et is kedtuu zan. Ne kenè ta iyan idteg̵el is kenita he egkesuatan,

1 Kurintu 8:11

Ne tenged te nesavut ta he kenà tutuu he ed-ezapen haazà is mibpemuhatan, nezeetan heini is duma ta he midlibri te silut pinaag̵i te kebpatey ni Kristu.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Ipisu 6:24

Berakat he ikeg̵ag̵ew te Megbevayà is minsan hentei he kenà egkeawà diyà te g̵ehinawa zin is kebmahala zin te Nengazen tew he si Jesu Kristu.

Hibriyuhanen 13:20

Is Megbevayà, mibanhew zin is Nengazen tew he si Jesus. Midtig̵is is lengesa zin he iyan tuus te veg̵u wey wazà pidtemanan he paag̵i te kebpekidsevaha tew te Megbevayà. Ne tenged dutun nehimu si Jesus he mekeg̵eg̵ehem he ed-elima kenitew te menge kerehidu zin.

Hibriyuhanen 4:13

Is Megbevayà, kenà sikandin egkeelesan te minsan hengkey. Egkeehè din layun is minsan hengkey he ed-ul-ulahan ta. Ne ke minsan hengkey is ed-ul-ulahan ta, iyan sikandin edsusi.

1 Pedro 1:8

Utew mahal sikandin diyan te g̵ehinawa niw minsan wazè niw pa maahà. Ne edsarig kew kandin minsan pa te kenè niw en sikandin egkeahà guntaan. Ne utew man dekelà is kelipey niw he kenà igkeseysey

1 Pedro 2:2

Ed-iring ki zuen te vatà he kemulu pa edsusu he layun egkesuat te g̵atas. Kinahanglan he layun ki ed-inum te g̵atas he iyan is wag̵as he Lalag te Megbevayà su wey layun mebmezesen is kedtuu ta taman te timpu keuzemà he edtulusen ki te Megbevayà.

1 Pedro 2:25

Iring kiw zengan te menge ayam he kerehidu he nengetazin, iyan, guntaan impeulì kiw en diyà te Megbevayà he iyan bekidu he metau he ebantey kenitew.

1 Juan 4:19

Umba utew en mahal sikandin dini te g̵ehinawa tew su nehuna kiw zin he mibmahal ziyà te kandin he g̵ehinawa.

1 Juan 5:1

Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì. Ne emun ebmahalen din diyà te g̵ehinawa zin is Amey tew he Megbevayà ebmahalen din daan is menge zuma zin he anak te Megbevayà.

Impezayag 2:23

Ne is menge sumusundan din, edhimetayan ku. Is menge tumutuu ziyan te langun he menge inged, egketuenan dan he iyan a nesayud ke hengkey is diyà te isip wey g̵ehinawa te etew. Ibeg̵ey ku ziyà te kada sevaha is engayan he igkeveg̵ey kandin sumalà te menge ulaula zin.