Juan 18:20 - Manobo Western Bukidnon

²⁰ Ne midtavak si Jesus te, “Wazà mekeeles is menge penurù ku ziyà te menge etew su ziyà a mebpenurù te menge simbahan wey ziyà daan te Valey te Megbevayà he egketig̵uman te tivuuk he kehudiyuwan. Wazè ku ieles is minsan hengkey he lalag ku.

Juan 18:20 Cross References

Mateo 24:26

Ne emun duen egkag̵i te, ‘Ahaa niw, su is hadì he mibpilì te Megbevayà, diyè en sikandin te tanà he wazà duen ed-ubpà he etew,’ ne haazà is etew he egkag̵i, kenè niw pemineg̵a. Ne emun duen daan egkag̵i te, ‘Kayi sikandin med-eles,’ haazà is egkag̵i, kenè niw zaan tuuwi.

Mateo 26:55

Ne zutun migkeg̵iyan ni Jesus haazà is menge etew te, “Tulisan e ve? Su maan is neg̵umeenan kew te menge ubpit wey menge lagkut is edakep kedì? Kada andew ne egkeahà a keniyu is ebpenurù te menge etew ziyà te Valey te Megbevayà, ne maan is wazà a keniyu zutun dà dekepa?

Mateo 26:65

Ne haazà is lavew he memumuhat, mibpemindas din is kumbalè din he tuus te utew sikandin nepauk dutun te migkag̵i ni Jesus, ne ke sikandin te, “Uvag en kun Anak te Megbevayà! Nekesupak en heini te Megbevayà! Wazè en kinahanglan he zuen pa tistig̵us su sikiyu is langun, nezineg niw en heini is menge lalag din he utew supak te Megbevayà!

Mateo 4:23

Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru.

Mateo 9:35

Ne neeneb ni Jesus is langun he menge inged dutun wey menge unayan. Mibpenurù din is menge etew zutun diyà te seled te menge simbahan dan wey impesavut din diyà te kandan is Meupiya he Tudtulanen te keag̵i te kedhadì te Megbevayà. Nengeulian din is menge etew te minsan hengkey he zaru wey ebpenggezamen dan.

Marcos 8:32

Ne mibpurungan din seysaya is egkeulaula zin. Ne hein nezineg ni Pedro haazà, ne insivey zin si Jesus ne migkeg̵iyan din te kenà haazà egkehimu is egkeulaula ni Jesus.

Lucas 21:37

Ne kada andew zutun ne ebpenurù si Jesus diyà te simbahan he Valey te Megbevayà. Ne te kada mezukilem ne edhendiyà sikandin te vuvungan he egngezanan te Ulivuwan su zutun sikandin edhizeg̵à.

Lucas 4:15

Ne nenurù sikandin diyà te menge simbahan te menge Hudiyu zutun te menge inged ne nemekezalig kandin is langun he menge etew.

Juan 18:21

Maan is iyan a ed-insaan nu? Insai niw is nemekezineg kedì su netuenan dan is migkag̵i ku kandan.”

Juan 6:59

Iyan heini impenurù ni Jesus dutun te simbahan te menge Hudiyu ziyà te inged he Kepirnaum.

Juan 7:14

Ne zutun te egkeliwliwazè en is kebibuwan, midhendiyà si Jesus te simbahan he Valey te Megbevayà, ne mibpenurù din is menge etew zutun.

Juan 7:26

Ahaa niw man! Ebpenurù ded sikandin te mezakel he menge etew! Kela ke tutuu iyan he netuenan te menge punuan tew he iyan sikandin sikan is netagnà he mibpilì te Megbevayà he ibpahadì su maan is kenè dan edewayen sikandin!

Juan 7:28

Ne nezineg ni Jesus haazà, ne zutun te kebpenurù din diyà te simbahan he Valey te Megbevayà mibpekezag̵ing is egkag̵i te, “Kunaan niw ke netuenan niw ke hentei a wey ke hendei a ebpuun, iyan, wazà, su wazà a medhendini te kediey zà he egkesuatan su impehendini a te Megbevayà. Iyan sikandin sikan is tutuu he Megbevayà, iyan, wazè niw metueni ke hentei sikandin.

Juan 7:4

Su ke zuen etew he egkesuat he egkevantug, kenà egkehimu he id-eles din is menge vaal zin. Su emun egkehimu nu is menge egkein-inuwan, deyzey ke ibpeehè nu ziyà te langun.”

Juan 8:2

Ne hein nepawà dutun, midhendiyè en maan si Jesus te simbahan he Valey te Megbevayà, ne hein midtig̵um diyà te kandin is langun he menge etew, mibpinuu zutun ne mibpenurù din sikandan.

Juan 8:26

Mezakel pa pezem,” ke si Jesus, “is menge lalag ku keniyu mehitenged te menge ulaula niw wey niw mesavut he mezaat is menge vaal niw, iyan, iyan dà ibpesavut ku zè pa te menusiyà is nezineg ku ziyà te midsug̵ù kedì, ne egkeserig̵an is menge lalag din.”

Nengeulaula 26:26

Sikew, Hadì Egripa, kenà a egkelenew he egkag̵i kenikew su netuenan ku he netuenan nu he zaan is langun he egkeg̵iyen ku. Netuenan nu iyan su heini is nengeulaula, wazà mekeeles.