Juan 14:20 - Manobo Western Bukidnon

²⁰ Ne zutun te andew te kedlikui ku keniyu, egketuenan niw he siak, diyà a te Amey ku wey is Amey ku, dini zaan te kediey, ne sikiyu, dini kew te kediey ne ziyà a zaan te keniyu.

Juan 14:20 Cross References

Juan 10:38

Ne emun iyan ebeelan ku is ebeelan daan te Amey ku, minsan ke kenè kew edtuu te menge lalag ku, tuu kew te ibpesavut te menge vaal ku su wey niw metueni he sevaha key zà, siak wey is Amey ku, su zini sikandin te kedì ne ziyà a zaan te kandin.”

Juan 14:10

Wazè ke ves medtuu he zini te kedì is Amey ku, ne ziyà a zaan te kandin su sevaha key zà? Minsan is menge lalag ku keniyu, kenè ku egkeg̵iyen te kediey zà he isip su is Amey ku he zini ed-ubpà te kediey, kandin he vaal heini.

Juan 14:11

Tuu kew te egkeg̵iyen ku he ziyà a te Amey ku ne zini sikandin te kediey. Ne emun kenè kew ebpeketuu kayi tenged dà te migkag̵i ku, tuu kew tenged te menge vaal ku su is menge vaal ku, egkeehè niw zutun he tutuu is egkeg̵iyen ku keniyu.

Juan 16:23

Ne zutun he andew wazè en kinahanglan he zuen id-insè niw kediey. Utew venar is egkeg̵iyen ku keniyu he ke zuen minsan hengkey he ebuyuen niw ziyà te Amey ku, ibeg̵ey zin keniyu tenged te kedtuu niw kediey.

Juan 16:26

Ne zutun he andew tenged te kedtuu niw kediey, iyan kew en egkag̵i te ebuyuen niw ziyà te Amey ku, ne kenè en kinahanglan he iyan e pa egkag̵i te ebuyuen niw ziyà te Amey ku

Juan 17:11

Ne g̵untaan ed-ulì ad diyan te kenikew ne kenè e en ed-ubpà dini te kelibutan, iyan, heini is menge etew he g̵aked ta, dini zan pa te kelibutan. Wag̵as he Amey ku, pinaag̵i te g̵ehem te ngazan nu, ipata nu heini is menge imbeg̵ey nu kediey he etew su wey mesevaha sikandan iring te sevaha ki zà.

Juan 17:26

Impesavut ku kandan ke hentei ka ne ibpenigudu ku pa ibpesavut kandan heini su wey mehimu he ziyà a te kandan ne mahal ziyà te g̵ehinawa te uman sevaha kandan is minsan hentei kandan iring te mahal a zaan diyan te g̵ehinawa nu.”

Juan 17:7

Netuenan dan en human he is langun he egkehimu ku, ne ziyè dà ebpuun te kenikew

Juan 6:56

Is egkaan te lawa ku wey ed-inum te lengesa ku, kenà ed-awà dini te kediey ne siak, kenà a zaan ed-awà diyà te kandin.

Ruma 16:7

Ipengemusta a zaan ki Andruniku wey si Hunias. Menge zuma ku sikandan he Hudiyu he mibpirisu zuma kedì. Telehuzen sikandan te menge epustul, ne nehuna sikandan neketuu ki Kristu, ne human a.

Ruma 8:1

Ne sikita is nekidsevaha ki Jesu Kristu, kenè ki en egkehukuman te silut.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

2 Kurintu 12:2

Dengan, duen tumutuu he nekilala ku he mibpengelinteuwan he mekepenumbaley sikandin diyà te utew metikang he langit he ed-ubpaan te Megbevayà. Sepulù en wey heepat he tuig heini is kegkehitavù kayi. Wazè ku metueni ke nekehendiyè be is lawa zin wey ke impeehè dè be heini kandin te Megbevayà pinaag̵i te teg̵einep; iyan dà nesayud kayi is Megbevayà.

2 Kurintu 13:5

Susiya niw is gehinawa niw wey niw metueni ke tutuu ve is kedtuu niw ki Kristu. Wazè niw ve metueni he midlumunan kew ni Kristu? Ne emun wazà, ne tarù is kedtuu niw ne wazè kew mezawat ni Kristu.

2 Kurintu 5:17

Ne sikan is etew he nekidsevaha en ki Kristu, beg̵u en sikandin he linimbag. Nahanew en diyà te kandin is daan he netag̵ù te isip din ne mid-ilisan en heini te veg̵u.

2 Kurintu 5:19

Iyan ibpesavut dey is: pinaag̵i ki Kristu egkehimu he edhimuwen te Megbevayà is tivuuk he menusiyà he menge emig̵u zin. Ne id-awè din diyà te isip din is menge mezaat he ulaula zan. Ne sikami, insarig din kenami is kedtudtula he egkehimu en he ebpekid-emig̵u te Megbevayà is menusiyà.

Gelasya 2:20

Tenged te kedsarig ku ki Kristu, inransang a te krus duma kandin su elili ku sikandin. Minatey a, iyan, uuyag a g̵ihapun su zini ed-ubpà te kediey si Kristu ne heini is kebpengungubpaan ku zini te kelibutan, pinaag̵i zà te kedsarig ku kandin te Anak te Megbevayà. Mahal a ziyà te g̵ehinawa zin ne mibpehimatey sikandin he elili kediey su wey a melibri.

Ipisu 2:10

Su is kedlimbag̵a kenita he veg̵u, ne iyan baal te Megbevayà. Pinaag̵i te kebpekidsevaha ta ki Jesus midlimbag ki zin su wey ta meulaula is meupiya he midteg̵ana zin en he zaan wey ta meveeli.

Kulusas 1:19

Ne egkesuatan te Amey tew he Megbevayà he ke hengkey sikandin, iyan ded daan sikan is Anak din.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

Kulusas 2:9

Umba egkeg̵iyen ku heini su si Kristu, nehimu sikandin he etew. Duen din lawa, iyan, minsan pa kayi is minsan hengkey he ziyà te Megbevayà ne ziyà te kandin.

1 Juan 4:12

Wazè pa etew he nekeahà te Megbevayà, iyan, emun egig̵ineg̵awè kiw, ed-ubpà dini te kenitew is Megbevayà, ne egkeheg̵et is kebmahala ta te Megbevayà dini te g̵ehinawa ta.