Juan 13:34 - Manobo Western Bukidnon

³⁴ Beg̵u en he sug̵ù is ibpetuman ku keniyu. Iyan is: kinahanglan he mahala ziyà te g̵ehinawa te uman sevaha keniyu is minsan hentei keniyu. Iring te mahal kew zini te g̵ehinawa ku, kinahanglan he mahal ziyà te g̵ehinawa te uman sevaha keniyu is minsan hentei keniyu.

Juan 13:34 Cross References

Mateo 5:44

Ne iyan mulà kediey he penurù is: ebpurungan ta is menge kuntada ta wey ebpenubtuvazan ta te meupiya is ebpesipala kenita.

Juan 15:17

Iyan sug̵ù ku keniyu is: kinahanglan he mahal ziyà te g̵ehinawa te uman sevaha keniyu is minsan hentei keniyu.

Juan 17:21

Amà, idhangyù ku sikandan pudu wey mesevaha zà is isip dan iring te kegkesevaha ta. Dini ka te kedì ne ziyan a zaan te kenikew. Edhengyuen ku zaan he mesevaha sikandan dini te kenita su wey meketuu is menusiyà he midsug̵ù a kenikew.

Ruma 12:10

Sikitew is midsusuled pinaag̵i ki Kristu, ibpeehè tew he mahal zini te g̵ehinawa tew is kada sevaha kenitew, ne ibmeupiya te g̵ehinawa tew is kedtahud tew te menge zuma tew.

Ruma 13:10

Su emun ebmahalen ta is duma ta ne kenà egkehimu he ebpesipelahan ta sikandin, ne netuman te en heini is tivuuk he kesug̵uan.

Ruma 13:8

Kenè niw pekelug̵eyaza is kebeyazi niw te menge utang niw ziyà te minsan hentei, kekenà, iyan niw pekelug̵eyaza te wazè din en taman is kebmahala niw ziyà te g̵ehinawa niw te menge zuma niw, su is etew he ebmahalen din is menge zuma zin, ne netuman din en is menge sug̵ù te Megbevayà.

Gelasya 5:22

Egketuusan ta zaan is menge ulaula he egkehimu pinaag̵i te g̵ehem te Wag̵as he Mulin-ulin. Su emun ed-uwiten ki te Wag̵as he Mulin-ulin, mahal zini te g̵ehinawa ta is menge zuma ta, layun ki egkelipey, melinawen layun is gehinawa ta, mepelevayen ki, belig̵eg̵awen ki, metulanged ki, metinumanen ki,

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Gelasya 6:10

Ebpurungan ta layun is minsan hentei he etew, lavew en is menge zuma ta he tumutuu ki Kristu.

Gelasya 6:2

Layun kew mebpetebtevangà te uman sevaha keniyu su emun ed-ul-ulahan niw heini egketuman niw is insug̵ù kenitew ni Kristu.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Kulusas 1:4

su nezineg dey is tudtul he mezesen is kedtuu niw ki Jesu Kristu wey zekelà layun is gag̵ew niw te minsan hentei he etew he g̵aked te Megbevayà.

1 Tiselunika 3:12

Berekati te Nengazen he med-iseg is kebmahala niw ziyà te g̵ehinawa niw te uman sevaha keniyu wey is langun he etew, iring te utew mezesen is kebmahala zey keniyu.

2 Tiselunika 1:3

Menge suled, kinahanglan he layun dekelà is kebpeselemati zey te Megbevayà tenged keniyu. Ne hustu heini su layun dekelà is ked-uswag te kedtuu niw wey layun daan ed-iseg is kebmahala niw te uman sevaha he menge zuma niw ziyà te g̵ehinawa niw.

Hibriyuhanen 13:1

Kinahanglan he peniguduwi niw is kebmahala niw ziyà te g̵ehinawa niw te menge zuma niw he tumutuu.

Santiago 2:8

Utew meupiya is ed-ul-ulahan niw emun edtumanen niw is lavew he sug̵ù te Nengazen he egkevasa niw ziyà te insurat he lalag din he edhenduen te, “Kinahanglan he mahala nu is duma nu; isipa nu sikandin he iring te kenikew en he g̵ehinawa.”

1 Pedro 1:22

Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

2 Pedro 1:7

Ne haazà daan, edheg̵etan ta te kegig̵ineg̵awè tew ne is kegig̵ineg̵awè tew, edheg̵etan ta zaan te kebmahala ta te menge zuma ta.

1 Juan 3:11

Kinahanglan he ebmahalen tew te kada sevaha is menge zuma tew. Iyan heini impenurù kenitew hein aney kiw meketuu.

1 Juan 3:23

Ne iyan insug̵ù din kenitew is: kinahanglan he edtuuwan tew is Anak din he si Jesu Kristu wey ebmahalen tew te kada sevaha is menge zuma tew sumalà is insug̵ù daan dengan ni Jesus.

1 Juan 4:21

Su insug̵ù kenitew te Megbevayà he is minsan hentei he tutuu is kebmahala zin te Megbevayà, kinahanglan daan he ebmahalen din is duma zin.

2 Juan 1:5

Ne tenged dutun, Bayi, edhengyuen ku he egig̵ineg̵awè kiw. Kenà beg̵u heini he sug̵ù is idsurat ku kayi, su zaan heini zuen te aney tew en kedtuu.