Juan 10:4 - Manobo Western Bukidnon

⁴ Ne emun ibpeg̵awas en te ed-elima is kandin he menge kerehidu, iyan sikandin edhuna ne edsunud dan kandin su neleyaman dan is lag̵eng din.

Juan 10:4 Cross References

Mateo 16:24

Ne zutun migkag̵i si Jesus diyà te menge sumusundan din te, “Ke zuen egkesuat he edsundan kedì, kinahanglan he iawè din diyà te isip din is kandin he egkesuatan he menge ulaula, ne tianga zin is krus din, he ke và dà egkeg̵iya, kinahanglan he edtumanen din is menge sug̵ù ku minsan ke iyan ibpatey zin. Ne human ebpekesunud kedì.

Juan 10:16

Ne zuen pa menge kerehidu ku, he ke và dà egkeg̵iya, menge g̵aked ku he etew, he kenà kayi te seled te ginhedian te menge Hudiyu. Ed-uwiten ku zaan sikandan ne ebpemineg dan kedì. Ne zutun sebsevaha zà is tudil ne sebsevaha zà daan is ed-elima kandan su iyan e zà.

Juan 10:27

Su is menge g̵aked ku he etew, ebpemineg dan te menge lalag ku. Egkekilala ku sikandan ne edsundan dan kediey.

Juan 10:3

Emun edseled sikandin, ebpuwasan te ebantey zutun te g̵emawan. Ne is menge kerehidu zin he ziyà te seled, egkekilala zan is lag̵eng din ne ed-umawen din sikandan pinaag̵i te menge ngazan dan, ne ibpeg̵uwè din sikandan.

Juan 10:5

Kenè dan edsunud te selakew he etew, kekenà, ebpeleg̵uyan dan su wazè dan meleyami is lag̵eng dutun te selakew he etew.”

Juan 10:8

Duen menge ebpenurù he midhuna kediey zini, iyan, iring dan dà te menge tulisan wey tekawen; iyan, is menge kerehidu ku, he ke và dà egkeg̵iya, menge etew he g̵aked ku, wazè dan mebpemineg kandan.

Juan 12:26

Ke zuen etew he egkesuat he mehimu he sulug̵uen ku, kinahanglan he edsunuzen e zin, su ke hendei a ne zutun daan is sulug̵uen ku. Ne ke zuen edtuman te menge sug̵ù ku, edelig̵en sikandin te Amey ku he Megbevayà.

Juan 13:15

Umba mid-ulaula ku heini kayi te keniyu su wey niw meiringi. Kinahanglan he mebpevayàbayà is kada sevaha keniyu te zuma zin.

Juan 18:37

Ne migkag̵i si Pilatu te, “Hadì ke ves?” Ne midtavak si Jesus te, “Tutuu heeyan is nekag̵i nu su hadì a. Umba midhendini a te kelibutan. Umba neetew a zini te lumpad. Midhendini a su wey ku ikepesavut ke hengkey is tutuu he tuluuwen. Is langun he menge etew he egkesuatan dan he metueni zan is tutuu he tuluuwen, ebpemineg dan kediey.”

Juan 3:29

Penenglitan ke zuen mibpengesawa, ne naangken din en haazà is mid-esawa zin. Sikan is kumekag̵un dutun, utew meupiya is gehinawa zin emun egkezineg din haazà is mibpengesawa he ebpekidlalag en dutun te mid-esawa zin. Ne iring din ded daan su utew ibmeupiya te g̵ehinawa ku zaan ke mezakel is edsundan ki Jesus. Kinahanglan he ed-iseg is bentug̵an ni Jesus, iyan, is kedì, kinahanglan he egkeawà,” ke si Juan.

1 Kurintu 11:1

Ne tenged dutun, menge suled, iringi niw is ed-ul-ulahan ku, iring te ed-iringan ku zaan is mid-ulaula zengan ni Kristu.

Ipisu 5:1

Ne g̵eina te pinelanggè kew he menge anak te Megbevayà, kinahanglan he mekeiring kew kandin.

Hibriyuhanen 12:2

Edhemenan ta is kedsarig ta ki Jesus su iyan sikandin puunà te kedtuu ta ne pinaag̵i zaan kandin egkeheg̵et is kedtuu ta. Mid-antus din is kedrensanga kandin dutun te krus. Ne wazè din ikeeled haazà is kedhimetayi kandin, kekenà, mid-isip din he utew zin igkelipey is egkeulaula zin emun egkeipus haazà is ked-antus din. Ne g̵untaan mibpinuu en sikandin dutun te utew lavew he pinuuwà su ziyà te zapit te egkekewanan te Megbevayà.

1 Pedro 2:21

Nekeantus si Kristu te merasey wey ki melibri te silut. Ne nehimu sikandin he petug-iringan he kinahanglan he edsunuzen ta. Umba mibpetuu kenitew is Megbevayà su wey tew si Kristu meiringi.

1 Pedro 4:1

Ne netuenan ta he si Kristu, hein dini pa te kelibutan, nekeantus sikandin te merasey. Tenged dutun kinahanglan he andam kew zaan te ked-antus te merasey su is etew he ebpekeantus te merasey, egkeawè en diyà te kandin is suat din te ked-ulaula te mezaat.

1 Pedro 5:3

Kenè kew medhadìhadì kandan te insarig keniyu, kekenà, eg̵aka niw sikandan su wey iyan kew zan edsunuzen te menge meupiya he ulaula.