Juan 10:16 - Manobo Western Bukidnon

¹⁶ Ne zuen pa menge kerehidu ku, he ke và dà egkeg̵iya, menge g̵aked ku he etew, he kenà kayi te seled te ginhedian te menge Hudiyu. Ed-uwiten ku zaan sikandan ne ebpemineg dan kedì. Ne zutun sebsevaha zà is tudil ne sebsevaha zà daan is ed-elima kandan su iyan e zà.

Juan 10:16 Cross References

Mateo 17:5

Ne te kemulu pa heini is lalag ni Pedro, neselikuvungan sikandan te ebpenganlag he g̵apun. Ne ebpuun dutun te g̵apun nezineg dan is midtik-ew megkag̵i te, “Iyan heini sikan is Anak ku he utew ku minahal; ingkesuat ku utew sikandin. Pemineg̵a niw sikandin.”

Lucas 15:8

Ne zuen pa maan sempità he impezineg ni Jesus kandan. Ke sikandin te, “Duen sevaha he vahi he midtipig te sepulù he elad he selapì he mahal su pudu pelata. Hengkey is ed-ul-ulahan din ke egketezinan haazà te sengeelad? Iyan ed-ul-ulahan din is edhuna edtemtem te sulù. Ne ebpeyupasan din is baley zin, ne ebpurungan din te ebpen-ahà taman te egkeehè din.

Juan 10:11

Iyan a sikan is ed-elima te menge kerehidu he utew meelima. Ibelavag ku is untung ku wey kenà mekeizi is menge kerehidu ku.

Juan 10:2

Ne is etew he ziyà ebayà te g̵emawan, iyan sikan is ed-elima te kerehidu.

Juan 10:27

Su is menge g̵aked ku he etew, ebpemineg dan te menge lalag ku. Egkekilala ku sikandan ne edsundan dan kediey.

Juan 10:3

Emun edseled sikandin, ebpuwasan te ebantey zutun te g̵emawan. Ne is menge kerehidu zin he ziyà te seled, egkekilala zan is lag̵eng din ne ed-umawen din sikandan pinaag̵i te menge ngazan dan, ne ibpeg̵uwè din sikandan.

Juan 10:4

Ne emun ibpeg̵awas en te ed-elima is kandin he menge kerehidu, iyan sikandin edhuna ne edsunud dan kandin su neleyaman dan is lag̵eng din.

Juan 10:5

Kenè dan edsunud te selakew he etew, kekenà, ebpeleg̵uyan dan su wazè dan meleyami is lag̵eng dutun te selakew he etew.”

Juan 11:52

Ne kenà tenged te menge Hudiyu zà su netagnè din daan he pinaag̵i te kebpatey ni Jesus egkesevaha is langun he menge etew he egkehimu he menge anak te Megbevayà minsan hendei he inged.

Juan 17:20

Edhengyuan ku sikew kenà tenged dà kayi te menge g̵aked ta g̵untaan, kekenà, tenged daan te langun he edtuu kediey keuzemà pinaag̵i te kedwali zan.

Juan 6:37

Is langun he menge etew he ibeg̵ey kediey te Amey ku he Megbevayà, ebpekesundan dan kediey, ne is edsundan kediey, edewaten ku.

Nengeulaula 15:14

Is Megbevayà, migug̵ud en keniyu ni Simon Pedro is mid-ulaula zin hein aney zin en ipetuu is kenà menge Hudiyu su wey zuen menge etew zaan dutun he edsundan kandin.

Nengeulaula 18:10

su zuma a kenikew. Wazà minsan hentei he ebpekekaid kenikew. Mezakel pa is ebpeketuu kediey kayi he inged.”

Nengeulaula 22:14

Ne ke sikandin te, ‘Is Megbevayà te menge apù tew, mibpilì ke zin su wey nu maahà is sulug̵uen din he metazeng wey nu zaan mezineg is egkeg̵iyen kayi kenikew wey nu zaan metueni is egkesuatan din.

Ruma 11:25

Egkesuatan ku, menge suled, he mesavut niw is ed-ul-ulahan te Megbevayà he zengan wazà mesavut te menusiyà. Umba ibpesavut ku heini keniyu su wey kenè niw isipa he iyan kew lavew kenà is menge Hudiyu. Ne minsan pa te intug̵ut te Megbevayà te zuma he menge Hudiyu is kenè dan kedtuu, duen timpu keuzemà he ed-engkezan dan is kenè dan kedtuu te Megbevayà su taman dà heini zutun te timpu he egkeamin ebpeketuu is langun he kenà menge Hudiyu he imbanglis te Megbevayà kandan is kebpeketuu zan.

2 Tiselunika 2:13

Menge suled he minahal te Nengazen, kenà egkehimu he kenà dekelà layun is kebpeselemati zey te Megbevayà tenged keniyu. Su zengan hein midlimbag din is langun, mibpilì kew zin wey kew zin melibri te silut pinaag̵i te g̵ehem te Wag̵as he Mulin-ulin he iyan ingkehimu niw he menge g̵aked din, wey pinaag̵i te kedtuu niw te tutuu he tuluuwen.

Hibriyuhanen 13:20

Is Megbevayà, mibanhew zin is Nengazen tew he si Jesus. Midtig̵is is lengesa zin he iyan tuus te veg̵u wey wazà pidtemanan he paag̵i te kebpekidsevaha tew te Megbevayà. Ne tenged dutun nehimu si Jesus he mekeg̵eg̵ehem he ed-elima kenitew te menge kerehidu zin.

1 Pedro 2:10

Su zengan kenè kiw menge sakup te Megbevayà ne g̵untaan menge sakup kiw zin en. Dengan wazè tew hanew zutun te hizu te Megbevayà, iyan, guntaan impezayag din en kenitew.

1 Pedro 2:25

Iring kiw zengan te menge ayam he kerehidu he nengetazin, iyan, guntaan impeulì kiw en diyà te Megbevayà he iyan bekidu he metau he ebantey kenitew.

1 Pedro 5:4

Ne emun edlikù si Jesus, sikan is lavew he ed-elima te menge kerehidu te Megbevayà, duen idsuhul zin keniyu he iyan is kebpekeambit niw te utew zin kegkelavew he kenà egkehanew.

Impezayag 3:20

Pemineg kew su zini ad te g̵emawan niw is ebpenelehuzan. Ke zuen etew he ebpekezineg kediey ne ebpuwasan e zin, edseled a ne egkaan a zuma kandin, ne egkaan daan sikandin duma kediey.