Hudas 1:1 - Manobo Western Bukidnon

¹ Siak si Hudas is suled ni Santiago wey is sulug̵uen ni Jesu Kristu. Sikiyu is midhimu te Amey tew he Megbevayà he menge tumutuu he menge minahal zin he midlig-enan ni Jesu Kristu, iyan kew ebpesuratan ku.

Hudas 1:1 Cross References

Mateo 10:3

Ne zutun daan si Felipe, si Bartolomeo, si Tomas, si Mateo he iyan kes menunukut te vuhis wey si Santiago he anak ni Alpiyu. Duen daan si Tediyu,

Mateo 13:55

Anak dà sikandin te pandey. Ne si Maria is iney zin; ne menge hazi zin, ensi Santiago, si Jose, si Simon, wey si Hudas.

Lucas 6:16

ne elin daan si Hudas he anak te sevaha he etew he egngezanan daan ki Santiago wey is sevaha pa he egngezanan ki Hudas he tigKeriyuti. Heini he Hudas, iyan kes mid-akal ki Jesus.

Juan 12:26

Ke zuen etew he egkesuat he mehimu he sulug̵uen ku, kinahanglan he edsunuzen e zin, su ke hendei a ne zutun daan is sulug̵uen ku. Ne ke zuen edtuman te menge sug̵ù ku, edelig̵en sikandin te Amey ku he Megbevayà.

Juan 14:22

Ne zutun migkag̵i si Hudas (kenà sikan is Hudas he tigKeriyuti), ke sikandin diyà te ki Jesus te, “Maan is edhimuwen nu he metueni zey sikew ne kenè nu edhimuwen he metueni ka te menge etew he wazà medtuu kenikew?”

Juan 15:16

Kenè kew iyan nekepilì kediey, kekenà, iyan a nekepilì keniyu. Intezù ku sikiyu wey kew mekepemeg̵as te menge meupiya he ulaula ne wey kenà daan mahanew is beg̵as niw. Ne is minsan hengkey he ebuyuen niw ziyà te Amey ku he Megbevayà tenged te kedtuu niw kediey, ibeg̵ey zin keniyu.

Juan 17:15

Kenè ku iyan edhengyuen he iawè nu zini te kelibutan heini is menge g̵aked ta he etew, kekenà, iyan edhengyuen ku kenikew he ipata nu sikandan wey kenà sikandan mekeizi ni Setanas.

Juan 17:17

Heini is menge g̵aked ta he etew, pinaag̵i te tutuu he tuluuwen, himuwa nu sikandan he menge sulug̵uen nu. Is lalag nu, iyan tutuu he tuluuwen.

Juan 17:19

Ne tenged kandan ibpeveyveyaan ku kenikew is gehinawa ku su wey zan daan ikepurung ikepeveyveyai kenikew is gehinawa zan.

Juan 6:39

Ne is Amey ku he Megbevayà he midsug̵ù kediey, iyan din egkesuatan is: edlig-enan ku is langun he menge etew he imbeg̵ey zin kediey su wey wazà minsan sevaha kandan he kenà egkeveg̵ayan te untung. Ne ebenhawen ku sikandan keuzemà dutun te ketepusan he andew.

Nengeulaula 1:13

Ne hein nekeuma zan diyà te Hiruselim, mid-ulì dan diyà te rug̵u he zivavew ziyà te valey he dus endanas he ubpeey zan. Iyan heini ensi Pedro, si Juan, si Santiago, si Andres, si Felipe, si Tomas, si Bartolome, si Mateo, si Santiago he anak ni Alfeo, si Simon Siluti, wey si Hudas he anak ni Santiago.

Nengeulaula 20:32

Ne g̵untaan idsarig ku sikiyu ziyà te Megbevayà he iyan ebpeketavang keniyu. Ebpeketavang daan is impenurù ku keniyu he g̵ag̵ew zin kenitew. Is Megbevayà, iyan ebpekeveg̵ey kenitew te kezesen te kedtuu. Diyà te kandin egkekuwa ta zaan is kenita he vahin te menge tuvad he ibeg̵ey zin diyà te langun he menge tumutuu zin.

Nengeulaula 27:23

Geina te mezukilem, is Megbevayà he iyan ed-ezapen ku, mibpaahà kedì is belinsug̵uen din,

Ruma 1:1

Iyan a si Pablo is teg̵isurat kayi. Uripen a ni Jesu Kristu ne midhimu e zin daan he epustul. Impenaad dengan te Megbevayà pinaag̵i te impesurat din te menge ebpeneuven din he zuen timpu he zuen Meupiya he Tudtulanen he ibpesavut kenitew. Umba mibpilì a he epustul su wey a mekepenudtul kayi te Meupiya he Tudtulanen.

Ruma 1:6

Ne sikiyu is diyan te inged he Ruma, inragkes kew zaan kayi te menge etew su midhimu te Megbevayà is paag̵i wey kew meketuu ne wey kew mehimu he menge sakup ni Jesu Kristu.

Ruma 16:18

Su is menge etew he ed-ulaula te iring kayi, kenè dan edtumanen is sug̵ù te Nengazen tew he si Kristu, kekenà, iyan dan edtumanen is kandan he menge suat. Pinaag̵i te ketau zan te kegkag̵i wey pinaag̵i te mekempet he egkeg̵iyen dan, egkeekalan dan is isip te menge paglung he etew.

Ruma 6:22

Iyan, guntaan, nevelukasan ki en te Megbevayà, ne nelibri ki en te kebpekeulaula ta te mezaat. Ne tenged kayi menge sulug̵uen ki en te Megbevayà, ne utew zekelà is pulus kayi kenita su ebpeketuman ki en te egkesuatan din, ne iyan rimeg̵as kayi te mid-ulaula te Megbevayà is kegkeveg̵ayi kenita te untung he wazà pidtemanan.

Ruma 8:30

Ne zutun, sikitew is langun he mibpilì din wey mehimu he menge anak din, impetuu kiw zin daan. Ne kenà duen dà taman, su mid-isip kiw zin daan he metazeng he iring te wazè kiw mekesalà. Ne impenaad din daan he zuen timpu keuzemà he edtulusen kiw zin.

Ruma 9:24

Iyan ki impetuu zin, iyan, is menge etew he impetuu zin, ne kenà menge Hudiyu zà, kekenà, elin daan is menge etew he kenà menge Hudiyu.

1 Kurintu 6:11

Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

Ipisu 5:26

ne wey kiw mezawat te Megbevayà. Midhimu zin heini pinaag̵i te kedlumpiyuwi zin kenitew pinaag̵i te kebewtismu wey pinaag̵i te lalag din.

1 Tiselunika 2:12

Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

1 Tiselunika 5:23

Is Megbevayà, ne iyan ebeg̵ey te kelinew, berakat he purungi zin lumpiyuwi is ulaula niw. Lig-eni zin is tivuuk he g̵ehinawa niw, isip niw, wey lawa niw su para wazà igkesewayi keniyu keuzemà te kedlikù te Nengazen tew he si Jesus.

2 Timoteo 1:9

Is Megbevayà, ne iyan midlibri kenita te silut ne midhimu ki zin he g̵aked din. Umba mid-ulaula zin heini, kenà tenged te meupiya is menge ulaula ta, kekenà, tenged dà te iyan tuyù din wey tenged te utew zekelà is gag̵ew zin kenita. Dengan te wazè pa limbag̵a is minsan hengkey mid-isip din he ibpeehè din is gag̵ew zin kenita pinaag̵i te kebeg̵aya zin kenita ki Jesu Kristu.

2 Timoteo 4:18

Ne kenà dutun dà taman su edlibriyen e pa te Nengazen te minsan hengkey he ebpekekaid kedì ne edlig-enan e zin taman te ed-uwiten e zin dutun te g̵inhedian din diyà te langit. Berakat he zelig̵a sikandin te wazà pidtemanan.

Hibriyuhanen 3:1

Ne tenged kayi, menge suled ku te kedtuu, mid-umbita kew zaan te Megbevayà wey kew mekeubpà keuzemà diyà te langit. Purungi niw isipa si Jesus. Iyan sikandin kes midsug̵ù te Megbevayà dini te kelibutan wey sikandin mehimu he lavew he memumuhat he edtavang kenitew kayi te kebpesakup tew te Megbevayà.

Santiago 1:1

Iyan a si Santiago is teg̵isurat kayi. Sulug̵uen a te Megbevayà wey te Nengazen tew he si Jesu Kristu. Kemusta kew is langun he menge g̵aked te Megbevayà he nekedsusuwey zini te tungkup te kelibutan.

1 Pedro 1:2

Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.

1 Pedro 1:5

Kenitew en haazà is integ̵ana zin. Tenged te nekesarig kiw kandin, nelig-enan kiw te g̵ehem te Megbevayà te kemulu kiw pa edtag̵ad te kedtulusa zin kenitew keuzemà te ketepusan he timpu.

1 Pedro 2:9

Iyan, sikitew mulà, pinilì kiw zin. Menge memumuhat kiw te mibpilì he hadì he iyan si Kristu. Iyan kiw menge sakup din; iyan kiw menge g̵aked din he etew. Umba mibpilì kiw zin su wey tew mesangyew is tudtul te utew egkein-inuwan he menge vaal zin. Iyan sikandin nengelintau wey kiw meketuu wey kiw maawà dutun te kerusireman. Ne g̵untaan edteyawan kiw zin, he ke và dà egkeg̵iya, utew en meupiya is kedtuvazi zin kenitew.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

2 Pedro 1:1

Iyan a si Simon Pedro is teg̵isurat kayi. Sulug̵uen a ni Jesu Kristu wey epustul zin, he ke và dà egkeg̵iya, midsug̵ù e zin. Ebpesuratan ku sikiyu is langun he neketuu ki Jesu Kristu. Megbevayà he Menluluwas tew sikandin. Geina te wazè din ibpelavi he minsan hentei, midhimu kew zin he tumutuu kandin iring te midhimu key zin daan he tumutuu.

Hudas 1:21

Layun niw isipa is utew zekelà he g̵ag̵ew keniyu te Megbevayà dutun te kedteg̵azi niw te timpu keuzemà he zutun ibpaahà kenitew te Nengazen tew he si Jesu Kristu is dekelà he hizu zin su zutun kenè kiw zin edsuwayan te wazà pidtemanan.

Hudas 1:3

Minahal ku he menge suled, minsan pa te iyan aney he egkesuatan ku is ebaal a te surat he ibpeuwit ku ziyan wey ku ikeseysey ziyan te keniyu is kedlibriya kenitew te Megbevayà, iyan, utew en guntaan epiki he ebpesuratan ku sikiyu wey ku sikiyu mesembag̵i. Kinahanglan, menge suled, he pekezesen kew sukul te menge etew he edhelinen dan pezem is tutuu he tuluuwen he imbeg̵ey te Megbevayà. Haazà is tuluuwen, imbeg̵ey zin kenitew te menge g̵aked din ne kinahanglan he kenè en ed-umanan te minsan hentei.