1 Juan 2:22 - Manobo Western Bukidnon

²² Hentei man is teruen? Iyan sikan is egkag̵i he kenà iyan si Jesus mibpilì te Megbevayà he ibpahadì. Is egkag̵i kayi, ne iyan kuntada ni Kristu su egkeg̵iyen din he kenà tutuu he ed-ezapen is Amey tew he Megbevayà ne egkeg̵iyen din daan he kenà si Kristu Anak te tutuu he Megbevayà.

1 Juan 2:22 Cross References

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Mateo 24:5

Su mezakel is ebpenlepew he egamit te ngazan ku ne egkag̵i is kada sevaha zutun he iyan sikandin sikan is mibpilì te Megbevayà he ibpahadì! Ne mezakel is ebpeketuu te menge tarù dan.

Juan 8:44

Iyan amey niw si Setanas, ne is egkesuatan te amey niw, iyan daan egkesuatan niw he meveeli niw. Puun pa te puunà ne memumunù en si Setanas. Ne wazè din kelavet te tutuu he tuluuwen su wazà diyà te kandin is minsan hengkey he tutuu. Emun egkag̵i sikandin, ne tarù is lalag din su tarù dà is egkeisip din. Teruen man sikandin wey ziyà te kandin ebpuun is minsan hengkey he tarù.

1 Juan 1:6

Emun egkag̵i ki he nekid-upakat ki te Megbevayà, iyan, diyè ki pa te kerusireman, he ke và dà egkeg̵iya, mezaat pa is menge ulaula ta, teruen ki. Teruen ki pinaag̵i te menge lalag ta wey pinaag̵i te menge ulaula ta.

1 Juan 2:18

Menge anak ku, meg̵aan en egketapus heini is timpu. Nezineg niw en he keuzemà duen edlepew he egeraran te Kuntada ni Kristu. Guntaan duen en mezakel he menge kuntada ni Kristu ne tenged dutun netuenan ta he meg̵aan en iyan egketapus heini is timpu.

1 Juan 2:23

Ne ke zuen etew he kenè din edewaten is Anak te Megbevayà, kenè din daan edewaten is Amey tew he Megbevayà. Ne iring din ded daan ke zuen etew he midawat din en is Anak te Megbevayà, nezawat din en daan is Amey tew he Megbevayà.

1 Juan 2:4

Iyan, ke zuen egkag̵i te, “Emig̵u e en te Megbevayà,” ne haazà is egkag̵i, kenè din edtumanen is menge sug̵ù te Megbevayà, teruen sikandin. Kenà sikandin ebpezumazuma te tutuu he tuluuwen.

1 Juan 4:20

Ke zuen minsan hentei he egkag̵i he utew mahal ziyà te g̵ehinawa zin is Megbevayà, iyan, ebpekigkuntada sikandin te zuma zin, teruen sikandin. Su kenà egkehimu he ebmahalen din is Megbevayà he wazè din maahà ke kenè din daan ebmahalen is duma zin he neehè din en mulà.

1 Juan 4:3

Iyan, ke zuen mulin-ulin he egkag̵i he wazà mebpeetew si Jesus is mibpilì te Megbevayà, ne kenà ebpuun haazà is mulin-ulin diyà te Megbevayà, kekenà, diyà ebpuun te kuntada ni Kristu. Nezineg niw en he zuen edlepew he mulin-ulin he ebpuun te kuntada ni Kristu. Ne egkeg̵iyen ku keniyu he zini en guntaan haazà te kelibutan.

1 Juan 5:1

Anak en te Megbevayà is minsan hentei he edtuu he iyan si Jesus mibpilì te Megbevayà he ibpahadì. Ne emun ebmahalen din diyà te g̵ehinawa zin is Amey tew he Megbevayà ebmahalen din daan is menge zuma zin he anak te Megbevayà.

2 Juan 1:7

Mezakel is nemenlepew he ebpenurù te tarù dini te kelibutan. Egkeg̵iyen dan he si Jesus is mibpilì te Megbevayà he ibpahadì, wazà sikandin mehimu he etew. Is minsan hentei he iyan haazà egkeg̵iyen dan, teruen sikandin wey kuntada ni Kristu.

Hudas 1:4

Umba kinahanglan he egkeg̵iyen ku heini su zuen menge etew he nekeamur keniyu, iyan, id-eles dan he kenà hustu is edtuuwan dan. Wazè dan kedtahud te Megbevayà; edhelinen dan pezem is tutuu he tuluuwen su ibpenurù dan he egkehimu ke ed-ul-ulahan tew is meremerik su utew kun belig̵eg̵awen is Megbevayà ne ebpeseyluwen kiw zin gihapun. Kenè dan edtuu he si Jesu Kristu, iyan dà egalen tew wey Nengazen tew. Dengan dà isurat te menge ebpeneuven te Megbevayà ke hengkey is silut kandan.

Impezayag 3:9

Ne haazà is menge etew he egkag̵i he menge Hudiyu sikandan, tarù is egkeg̵iyen dan su menge sakup sikandan ni Setanas. Edhimuwen ku he mekeluhud sikandan diyan te etuvangan niw. Ne zutun egketuenan dan he iyan kew mahal zini te g̵ehinawa ku.