1 Juan 2:15 - Manobo Western Bukidnon

¹⁵ Kinahanglan he kenà iyan dekelà dini te g̵ehinawa ta is menge ulaula te menge etew zini te kelibutan he menge kuntada te Megbevayà, kinahanglan daan he wazà minsan hengkey zini te kelibutan he iyan dekelà dini te g̵ehinawa ta. Su ke zuen etew he iyan dekelà diyà te g̵ehinawa zin is iring dutun, kenà egkehimu he iyan mahal ziyà te g̵ehinawa zin is Amey tew he Megbevayà.

1 Juan 2:15 Cross References

Mateo 4:8

Ne zutun mid-uwit en maan si Jesus ni Setanas diyà te metmetikang he vuntud ne impeehè din ki Jesus is langun he menge g̵inhedian dini te kelibutan wey ke sengemenu is kezekelà wey ketig̵eyunan te kada sevaha zutun.

Mateo 6:24

Is uripen, kenà egkehimu he zezuwa is teg̵iuripen kandin. Su emun dezuwa is ebayàbayà kandin, edtehuzen din is sevaha ne egkepeukan din is sevaha. Ne emun kenà, ne egkeepesan din is sevaha, ne ebmahalen din is sevaha. Ne iring din ded daan emun iyan mahal ziyà te g̵ehinawa nu is ketig̵eyunan, su kenà egkehimu he mahal zaan diyà te g̵ehinawa nu is Megbevayà.

Lucas 16:13

Ne mid-uman megkag̵i si Jesus te, “Is uripen, kenà egkehimu he zezuwa is teg̵iuripen kandin. Su emun dezuwa is ebayàbayà kandin, edtehuzen din is sevaha ne egkepeukan din is sevaha. Ne emun kenà, ne egkeepesan din is sevaha, ne ebmahalen din is sevaha. Ne iring din ded daan emun iyan mahal ziyà te g̵ehinawa nu is ketig̵eyunan, su kenà egkehimu he mahal zaan diyà te g̵ehinawa nu is Megbevayà.”

Juan 15:19

Emun duma kew te menge kuntada te Megbevayà ebmahalen kew zan, iyan, geina te kenè kew zan duma ne egkuntedahan kew zan su mibpilì ku sikiyu wey kew mekesuwey ziyà te kandan.

Ruma 12:2

Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

Gelasya 1:10

Kunaan niw vuwa ke iyan netag̵ù te g̵ehinawa ku is: egkesuat a he zelig̵a a te menge etew. Iyan, kenà iyan heini netag̵ù te g̵ehinawa ku, kekenà, iyan is kebpenunuata ku te Megbevayà. Kunaan niw vuwa zaan ke egkesuatan ku he ibmeupiya te g̵ehinawa te menge etew is menge ulaula ku, iyan, kenà daan iyan egkesuatan ku su emun iyan egkesuatan ku, kenà egkehimu he sulug̵uen a ni Kristu.

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

1 Timoteo 6:10

Su ke zuen etew he susuaten te selapì ne egkehimu he egkeulaula kandin is minsan hengkey he mezaat. Pinaag̵i kayi neiniyug̵an te zuma is tuluuwen tew ne tenged kayi nehimu he utew mezakel is menge keseengan dan.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.

Santiago 4:4

Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

1 Juan 3:17

Ke zuen minsan hentei kenitew he egkehimu he edtevangan din is duma zin he edlised, iyan, kenè din edtevangan, kenà egkehimu he mahal ziyà te g̵ehinawa zin is Megbevayà.

1 Juan 4:5

Haazà is menge etew he mid-ulinan te teruen he menge mulin-ulin, kuntada man sikandan te Megbevayà wey supak te Megbevayà is ibpenurù dan. Ne tenged dutun ebpemineg̵en sikandan te menge etew zini te kelibutan he kuntada zaan te Megbevayà.

1 Juan 5:10

Is minsan hentei he edtuu he Anak te Megbevayà si Jesus, nevenaran sikandin te kebpenistig̵us te Megbevayà. Is minsan hentei he kenà edtuu te kebpenistig̵us te Megbevayà, ed-isipen din he teruen is Megbevayà su wazè din tuuwi is kebpenistig̵us te Megbevayà mehitenged te Anak din he si Jesus.