RYUREITUHPAZY 13:6 - Mara Bible RV (BSI)

⁶ Chanô cha a vy ta, a vahpa hnohta, “Khazohpa chyhsa pakha ei hnohta a vy ta, â lânazie cha Khazohpa vâlyuhchâpa a lâzie lyu ta, chi â chhih ngaita. Khataih lâ chyhsa ma a châ tahpa hiahri leipa na ta, ano ta a moh na chho hra vei.

RYUREITUHPAZY 13:6 Cross References

ÂTHAONA 18:2

Mohmia pasaih ta, ano kiapâh liata chyhsa pathôh â duahpa hmô ta. A hmôpa nahta, âmo dy awpa ta poh o chhikao tawhta a kei râ ta, alei lâ a bôhpa ta âmo cha a naoh ta,

ÂTHAONA 32:29

Zakaw ta, “Ngiachhiepa ta na moh na chho teh,” tah ta. Ano ta, “Khazia ei moh eina hiahri chi?” tah ta. Cha liata byhnâ awpa ta.

1 ABEIZY 17:18

O hneituhnô ta Elaizâh hnohta, “Hy nâ Khazohpa chyhsa y, ei chô liata palôh châ leina khâpa ma na hnei tly? Ei moleina na pahnosa ta, ei sawchapawpa na thiepa awpa ta a vaw tlôpa na vaw châ he!” tah ta.

1 ABEIZY 17:24

Chanô ta Elaizâh hnohta, “Tahmâ la Khazohpa chyhsa châ chi ta, na pakah liata Abeipa bie cha biehmeiseihpa a châ tahpa ei pahno haw,” tah ta.

2 ABEIZY 4:16

Elaisâh ta, “Hâhkô tahmâ daihti liana heta sawcha­paw nâ pyh aw,” tah ta. Chanô ta, “Châ vei, ei zibeipa, Hy Khazohpa chyhsa y, châ chakaotuhnô he dôvei khah y,” tah ta.

2 ABEIZY 4:9

Chanô ta a vahpa hnohta, “Pachâ teh, he chyhsa, khâ miah a chapia tyhpa he Khazohpa chyhsa pathaihpa a châ tahpa ei pahno.

PUASAINA 3:2

Abeipa vâlyuhchâpa ta meipaleih ta a hnohta a vaw luah ta, meipaleih cha thobuh hry tawhta kaw pua ta, kei moh ta, thobuh liata meipaleih ia ta, a thobuh deikua cha kâ leipa ta.

PUASAINA 3:6

Khazohpa ta, “Kei he, châ pathlatuhpazy Khazohpa ei châ, Abarahâ Khazohpa, Aisika Khazohpa nata Zakaw Khazohpa ei châ,” tah ta. Khazohpa cha a moh ngâh leipa vâta, Mawsi cha a hmia nyu ta.

DÂNIAH 10:11

Ano ta ei hnohta, “Hy Dâniah, chyhsa pasâhsa a chhih ngaitapa y, na hnohta bie ei rei awpazy he pakhâta ta pachâ mah y; a kaw duah teh, na hnohta tuapa ei châ hih,” tah ta. He bie he ei hnohta a reih khai nahta, a chalyuna chôta a kaw duah na ta.

DÂNIAH 10:5

Avâ kaw ua na ta, kaw moh na ta, pala rih dipa chysia ta a tobi ta, Upha râh ngôh suapa chaisaihna ta a chai â saihpa chyhsa pakha hmô na ta.

DÂNIAH 8:17

Chatanachata Kabriel cha ei duana kiapâh lâ a vy ta. Â vy nahta, chi ngaita na ta, ei hmia alei lâ a khupa ta pao na ta. Ano ta ei hnohta, “Hy chyhsa sawchapawpa y, aluahna he daihti chhâna kyh a châ tahpa pahno mah y,” tah ta.

LUKA 1:19

Vâlyuhchâpa ta a chhy ta, “Kei he Kabriel ei châ. Khazohpa hmiakô liata a duah tyhpa châ na ta, bie cha chho ta, he thâtih lychhihpa he cha vaw tlôkhei awpa ta tuapa ei châ.

LUKA 9:29

Thlah a chhâ hai nota, a hmiaphaozie a vaw nano ta, a chysiazy vaw dieh khai hapa ta, a thlarawsie ngâ kaw ta.

HMOTAOPAZY 6:15

Ryureina liata a tyuhpa zydua ta Stiphana cha moh ei ta, a hmia cha vâlyuhchâpa hmia hawhta hmô ei ta.

RYHPACHANEINA 33:1

He byhnâ awnazy he Khazohpa chyhsa Mawsi ta a thi hlâta Izarei sawzy châta byhnâ a awna a châ.

1 TIMAWTHY 6:11

Nâ, Khazohpa chyhsa y, cha hmozy cha a râsai la, siana, Khazohpa pachâna, ngiapâna, kyhpachâna, daotheina nata nônaina zy a chadai lymâ mah y.

ZAWSUA 14:6

Zudâh pathlazy ta Kilkal liata Zawsua lâ a vy ei ta. Keniza chyhsa Zephune sawchapawpa Kâlebâ ta Zawsua hnohta, “Abeipa ta Kâdesbânia liata Khazohpa chyhsa Mawsi hnohta nâma nata keima kyh liata a reipa kha na pahno.

BIEPHUAH 1:17

Ano cha ei hmô nahta, athihpa hawhta a phei thaby liata pao na ta. Châhrasala ano ta a ku chachâh lâ ei chô liata vaw pahnieh ta, ei hnohta, “Chi khah y, kei he âthaona nata achhâna châ na ta,

RYUREITUHPAZY 13:10

Chanô cha thlai a râ ta, a vahpa kei chho ta, a hnohta, “Moh tua, zâkhano ta ei hnohta a vypa kha ei hnohta â vaw luah heih,” tah ta.

RYUREITUHPAZY 13:22

Manôah ta a lapinô hnohta, “Khazohpa hmô ha pi ta, eima thi tlai aw,” tah ta.

RYUREITUHPAZY 13:3

Abeipa vâlyuhchâpa cha chanô hnohta a vaw luah ta, a hnohta, “Moh teh, choh ha chi ta, saw rai phaoh thei va chi, châhrasala saw phaoh aw chi ta, sawchapaw na sa aw.

RYUREITUHPAZY 13:7

Châhrasala ei hnohta, ‘Saw phaoh aw chi ta, sawchapaw na sa aw. Hawti cha chhi liata a y no tawhta a thina taihta Khazohpa châta Nâzarai a châ awpa vâta, kresawhti tlyma, sahma patapa tlyma, na do awpa châ leipa ta, hmo pathaih leipa rai na nie awpa châ vei,’ eina tah,” tah ta.

RYUREITUHPAZY 13:8

Chatawhcha Manôah cha Abeipa lâ thlahchhâ ta, a hnohta, “Hy Abeipa y, ngiachhiepa ta Khazohpa chyhsa na vaw tuapa kha, keimo lâ a vy heih sala, hawti a vaw pih awpa cha kheihta ma eima mohôh aw tahpa miah vaw pachu mawh sy,” tah ta.

RYUREITUHPAZY 6:11

Chatawhcha Abeipa vâlyuhchâpa a vy ta, Ôpharâ khih liata ôkâ tho ry liata a tyuh ta. Cha ôkâ tho cha Abieze chi Zôasâ eih a châ. A sawchapawpa Kidia cha Midia mo ta ama hmô lei nawpa ta, kre saohna khaoh liata arulâta sâh tly ta.

1 SAMUELA 2:27

Khazohpa chyhsa pakha Eli lâ a vy ta, a hnohta, “Abeipa ta hetana heta a tah: Châ pathlatuhpa chizy Izi râh liata Phiraoh sei ta ama y no kha, ama hnohta a siapa ta a phualuah ha va na mâ?

1 SAMUELA 9:6

Châhrasala chakaotuhpa ta a hnohta, “Pachâ tua, he khih liana he Khazohpa chyhsa pakha y ta, chyhsa zachhih ngaitapa a châ, a reipa maih a tlô lymâ tyh. Cha lâ cha vawh tua ei si, eima sie nawpa lâpi miah a chho thei ngyu aw,” tah ta.