HLAZY 32:8 - Mara Bible RV (BSI)

⁸ “Na sie nawpa lâpi chhopa ta cha pachu aw na ta, Ei mo ta cha tawpâpa ta ryh ei cha raopa aw.

HLAZY 32:8 Cross References

ÂTHAONA 24:48

Ei luh a bôh na ta, Abeipa a chhy na ta, ei zibeipa Abarahâ Khazohpa, a sawchapawpa châta ei zibeipa chiheih sawchanô hiapa awpa ta lâpi dopa liata nâ chhituhpa Abeipa cha reithai na ta.

2 SAMUELA 22:33

Khazohpa cha ei thokhy a ipa châ ta, Ei lâpi a patlâsatuhpa a châ.

1 ABEIZY 8:36

vârâh tawhta vaw nathlie la, châ chakaotuhpa na phopi Izarei sawzy moleina cha a ngiahthai mah y. Lâpi dopa a chhih awpa ta âmo cha pachu la, ryuto châta na phopi na piepa râh liana he avâ pasuasa heih tyh mah y.

HLAZY 143:8

Nâ ei cha ngâpa vâta, Na kyhpachâna tleih beih leipa kyh cha, My ta na patheisa tyh mah y. Nâ lâta ei thlahpa a chaluahpa ei châpa vâta, Ei sie nawpa lâpi na pahnosa tyh mah y.

HLAZY 25:12

Abeipa a chipa chyhsa cha ahy ma a châ? Cha chyhsa cha lâpi â chhih awpa a pahmô aw.

HLAZY 33:18

Moh teh u, Abeipa mo cha ano a chituhpazy chô liata khaih ta, A kyhpachâna tleih beih leipa hnabeiseihtuhpazy chô liata a khaih tyh.

HLAZY 34:11

Sawzy saih u, a vy u la, na nathlie teh u, Abeipa china kyh ei cha pachu aw ei.

BIESOZY 3:1

Ei sawchapawpa y, ei pachuna my leipa la, Na palôh ta ei biepiepazy a vao thlâh ha mah y.

ISAI 48:17

Abeipa ta hetana heta reih ta, Nâmo châ Chatlaituhpa, Izarei Mo Pathaihpa ta hetana heta a tah: “Kei he Abeipa na Khazohpa châ na ta, Na pha nawpa ta cha pachu na ta, Na sie nawpa lâpi liata châ chhihthatuhpa ei châ.

ISAI 49:10

Ama nodi leipa aw ta, Ama dâh phi aw vei; Thlih lalôhpa ta âmo cha pathli thlu leipa aw ta, Noh lopa ta âmo vawh aw vei. Âmo ngiachhietuhpa ta chhihtha aw ei ta, Tihnawh kiapâh liata â chhi laih aw ei.

MALUHREINA 9:22

Achhyna byureih chô liata meihdo cha noh no tlyma, thla kha tlyma, kô kha tlyma rai y sala, cha liata â chhoh ngâ thlâh ha khiahta cha, Izarei sawzy cha riehmo liata y thlâh ha ei ta, sie veih ei. Meihdo â pasâh nahta ama sie tyh.

MATHAI 11:29

Ei raopaky a ky u la, kei tawhta a chu teh u. Kei cha areisipa nata palôh nônaipa ei châ. Nama thlahpazy châta apahâna nama hmô aw.