HLAZY 27:4 - Mara Bible RV (BSI)

⁴ Abeipa liata hmo miakha hiah na ta, Cha hmo cha khâ ei tlua aw; Cha cha ei hro chhôh noh zydua liata Abeipa o liata pahrâ ta, Abeipa angianazie sai ta, Achhyna o liata thlahchhâ awpa a châ.

HLAZY 27:4 Cross References

2 SAMUELA 21:1

Dâvi ryureina daihti liata, â zaopa ta kô thôh chakâhna tlô ta. Dâvi ta Abeipa hmia pado ta. Abeipa ta, “Sawla ta Kibiô mo a thiepa vâta, ano nata a chhôhkha chô liata thisaih maoh a y,” tah ta.

HLAZY 23:6

Ei hro chhôh noh zydua ta, Phana nata zawngiahna ta eina zi lymâ tlai aw; Chatanachata Abeipa o liata tlyzaw ta ei pahrâ thlâh ha aw.

HLAZY 26:6

Ei kuzy he seina hnei lei awpa ta a sipa ta, Hy Abeipa, na maisâh chahlô aw na ta;

HLAZY 26:8

Hy Abeipa, na yna o tlaichhai kaw na ta, Na rônahna pahrâna su ei tlaichhai ngaita.

HLAZY 27:8

“Ei hmia na tlua muh vy,” tah chi ta, “Hy Abeipa, na hmia tlai cha ei tlua,” tahpa ta, Ei palôh ta a cha chho.

HLAZY 50:2

Khazohpa cha Zaio tawhta vaw khaih ta, Khihpi ngia chaipa tawhta a vaw khaih.

HLAZY 65:4

Na dôhpachhôh tlyhmia liata pahrâ awpa ta, A tlyh chi ta, na kiapâh lâ nâ chhipazy cha, Ama nohlao kaw dia! Na o phana vâta lôhrâtlôpa ta y aw pi ta, Nâma Achhyna o pathaihpa vâta lôhrâtlôpa ta eima y aw.

HLAZY 84:10

Na dôhpachhôh tlyhmia liata noh kha ypa cha, Su hropa liata noh sâh kha ypa hlâta a pha via. Moleipa poh o liata pahrâpa hlâta cha, Ei Khazohpa o chhikao vaituhpa châ awpa ei khoh via.

HLAZY 84:4

Na o liata a pahrâpazy cha ama nohlao na, Chhâzaw ta ama cha reithai aw. Selah

HLAZY 90:17

Abeipa eima Khazohpa khokheina eima chô liata y sala, Eima ku raihria eima chô liata pa-i mawh sy. A châ na, eima ku raihria pa-i mah y.

ZEREMIAH 29:13

Na tlua aw ei chi ta, nama pathipalôh zydua ta eina tlua ti ei chi ta cha, eina hmô aw ei chi.

DÂNIAH 9:3

Chavâta Zehôvâh Khazohpa lâ a heih na ta, kâhvileipa ta, latho poh a bupa ta buchâhzy a miapa ta, thlahchhâna nata hiana zy ta ano cha tlua na ta.

ZEKARIA 9:9

Hy Zaio sawchanô, thapha ngaitapa ta y la, Hy Zerusale sawchanô, thata awh teh! Moh tua, na bei cha nâ lâta â vy hai; Mosiapa nata pachhatuhpa a châ; Areisipa ta alâ vaw kiah ta, Alâtaw, alâ panô taw tlai vaw kiah ta â vy.

MATHAI 6:33

Khazohpa khinarâh nata a siana tlua tua u la, cha hmo zydua cha baichhapa nama châ aw.

LUKA 10:42

Hmo miakha deita a byuh. Mâri ta tovyuh phapa a tlyh ta, cha cha lapa awpa châ vei,” tah ta.

LUKA 13:24

“Chhikao buahpa liata a ngia a chhuah lylia teh u. Ei cha chho ei, chyhsa hluhpi ta a ngia a chhuah aw ei ta, a ngia thei aw veih ei.

LUKA 18:1

Zisu ta a pachupazy cha hnabeidy leipa ta, khâ thlahchhâ awpa a châzie pakhona bie chho ta.

LUKA 2:37

nôhmei châpa ta kô sycharie nata kô palih chhôh a ypa a châ. Achhyna o puasai leipa ta, chhô nah zâ ta kâhvileipa ta thlahchhâpa ta Khazohpa â chhy tyh.

2 KAWRINI 3:18

Chatanachata keimo hmia khu leipa ta a ypa zydua pi heta Abeipa rônahna cha palâsa pi ta, rônahna tawhta rônah via rilipa ta, Abeipa rônahna lyuna lâta pananopa ta eima y lymâ. Cha cha Abeipa tawhta eima hmôpa châ ta, Abeipa cha Thlahpa a châ.

2 KAWRINI 4:6

“Zohna tawhta khaihna vaw khaih mawh sy,” a tahtuhpa Khazohpa ta, Khazohpa rônahna pahnona khaihna cha miah pie awpa ta, Zisu Krista hmia liata eima palôh a pakhaihsa haw.

PHILIPI 3:13

Unawh saih u, chazy cha a patu hapa hawhta a pachâ va na. Châhrasala hmo miakha taopa ei hnei: Hnôhlâ hmozy mypa ta, hmialâ hmozy pazapa ta,

1 TIMAWTHY 5:5

Nôhmei hmeiseihpa, ano dei ta a ypa cha, Khazohpa chô liata hnabeiseihna a sohpa châ ta, chhô nah zâ ta hiapa nata thlahchhâpa ta a y tyh.

HEBRAI 11:6

Ngiapâna leipa ta cha Khazohpa palysa thei rimâ awpa châ vei. Khazohpa a pangaipa maihta, Khazohpa a y tahpa amâ ngiapâ awpa châ ta, ano a tluatuhpa cha Khazohpa ta lymâ a pie tyh tahpa amâ ngiapâ awpa a châ.

1 SAMUELA 1:11

Abeipa lâta bietai miakha tao ta, a hnohta, “Hy Pheisaihzy Abeipa, na sei­chanô taopasazie he hmôpa ta, na seichanô he my leipa la, nâ theipa ta, na seichanô he sawchapaw eina pie khiah chi ta la, a hro chhôh zydua ta Abeipa pie lilaw aw na ta, a luh ngyupa châ aw vei,” tah ta.

1 SAMUELA 22:10

Ano châta Ahimele ta Abeipa a saohiahpa ta, niedozy pie ta, Philistinâ chyhsa Kôliathâ zaozi kha a pie,” tah ta.

1 SAMUELA 30:8

Dâvi ta Abeipa a saohiah ta, “Pheisaihzy cha ei chadai aw ei ma? Ei pha aw ei ma?” tah ta. Abeipa ta a chhy ta, “A chadai teh, âmo cha pha cheingei aw chi ta, na chyhsazy na pachha khai heih aw ei,” tah ta.