Dokʉ̈ Körɛ̂nte 2:10 - Mbëtï Ndjapä: TÄFO MADƗ̈

¹⁰ Bëte Ndjapä nyïsə̂ arə lâme sə̈ azə̂ lə̂ köbosə̂ Yingö ndə̂ yê. Bëte Yingö pü dju apö gbɛ̂, ndjë la arə ndə̂ Ndjapä nyîkrə rə̂ bhâlə̂ su yê ndə̂ gbô rə̂ wâ lə̂ küwû nə̈.

Dokʉ̈ Körɛ̂nte 2:10 Cross References

Jâan 14:26

Praâbalë earə̂ kə̂ za könô sə̈ nyê, ndə̂ tche də̂ Kpɨ̂ki Yingö ndə̂ Bha wan-adje tchë la rə̈ mê, tchê nyiadje sə̂ arə gbɛ̂ sə̈ nyê, ânyë kə̂ mboadje rə̂ pä arə gbɛ̂ ndə̂ më nyîsə̂ nə̈ alême sə̈ nyê sə̂nə̈ te lə̂ nyê.

Ëfêze 3:5

Rə ndə̂ âwâ lə̂ küwû nə̈ lâme, Ndjapä nyîâbo sə̂nə̈ alême sə̈ azü ndə̂ tchô dokʉ̈tchê lâme-a, batə̂ rə̂ ndə̂ tche nyîsə̂ nə̈ angaâtə sə̈ abadjângele ndə̂ yê la a-earə̂ ndə̂ma Ndjapä ndə̂ tche kʉ̂ andjê ngbî bëte tchë lə̂ köbosə̂ Yingö.

Lûke 10:21

Posə̂nə̈ lâme, Kpɨ̂ki Yingö sɨ̂ Jezü la mômô, tche tô rə̂ päkëdə̂: «Bha mê, Gbölö Gbïɛ̈ ndə̂ tchêlafô la tchêbêche, më zä ayîabâ sə̈ mö, bëte mo vüsə̂ rə lâme tə̂ azü ndə̂ küma andjê wâ lanə̈ la a-earə̂ kə̂ wunsə̂ rə, ânyë kə̈ nyîsə̂ nə̈ sə̈ akpîɛ̂kpîɛ̂ azü. Tə̂ lëge nə̈, mo mbö tâ käko bëte momö kä ndə̂ ânyîndə̂ nə̈.

Ëfêze 3:3

Ndjapä nyïsə̂ rə ndə̂ gbô rə̂ wâ lə̂ küwû nə̈ sə̈ mê ndə̂kə̂ pa më wunsə̂ nə̈. Ârə̂ kä ndə̂ më mbô ngâ kpîɛ̂kpîɛ̂ mbëtï pânə̈ dəndə̂ küma nə̈ lâme.

Gälâte 1:12

Âdə̂âbo ngâ akrə kä ndə̂ âmû pö nə̈ âdəndjë ndə̂kə̂ nyisə̂ nə̈ sə̈ mê-a. Praâbalë Jezü Krîsiti la tə̂ yê kä ndə̂ âmbô rə̂ pä më wunsə̂ nə̈.

Matiyə̈ 16:17

Jezü tô rə̂ ndə̂nə̈ sə̈ tchë päkëdə̂: «Mômô kä tə̂ zə̈ Chemön, modô ndə̂ Jönâse! Bëte pö ndə̂ mo tô rə̂ lâme âtôâbo bhândə̂ azü-a, praâbalë ätö bhândə̂ Bha ndə̂ tche sə̂ bhâ lafô.

Matiyə̈ 13:11

Tche tô rə̂ ndə̂nə̈ sə̈ andjê päkëdə̂: «Andə̂ nye nə̈, Ndjapä zä rə̂ sə̈ nyê ndə̂kə̂ wunsə̂ alëge pö ndə̂ Gbölö gö-gbïɛ̈ ndə̂ tchêlafô ndə̂ âwâ wü. Andə̂ andjë nə̈, Ndjapä zâbo rə̂ sə̈ andjê ndə̂kə̂ wunsə̂ nə̈-a.

Jâan 16:13

Âdə Yingö ndə̂ lëge pö nə̈ âwutu, tchê nyiadje sə̂ alëge pö gbɛ̂ sə̈ nyê. Bëte tchê nyiabô sə̂ pö ngbâ su yê tee-a, praâbalë tche ânyisə̂ apö gbɛ̂ ndə̂ tche djê rə̂, kə̂ toadje ndjë pö ndə̂ arə gbɛ̂ ndə̂ âwâ ndə̂kə̂ wutu sə̈ nyê.

Dokʉ̈ Pîêre 1:12

Ndjapä nyïsə̂ nə̈ sə̈ andjê pä, pö nə̈ wâbo bëte andjê la tə̂ andjê-a, praâbalë äwä bëte nyê. Pö nə̈ kä ndə̂ a-earə̂ kə̂ mu Tchôtchô Pö sə lakə̂ to rə̂ sə̈ nyê angaâtə, lə̂ köbosə̂ Kpɨ̂ki Yingö bhâ lafô ndə̂ a wân tchë. Pö nə̈ lâme, aânje wä la gʉ ndə̂kə̂ wunsə̂ nə̈.

Dokʉ̈ Jâan 2:27

Âdə andə̂ nye nə̈, Kpɨ̂ki Yingö ndə̂ Krîsiti zâ rə̂ sə̈ nyê lâme kä lə̂ su nyê. Äkä wâbo ndə̂kə̂ pa ngâ akrə kä ndə̂ ânyisə̂ rə sə̈ nyê-a, praâbalë Kpɨ̂ki Yingö ndə̂ yê lâme kä ndə̂ ânyisə̂ arə gbɛ̂ sə̈ nyê. Tche nyîâbo sə̂ yepa-a, praâbalë tche nyïsə̂ lëge pö. Bëte rə̂ kä ndə̂, äwäpä nyë wa balë la Krîsiti batə̂ rə̂ ndə̂ Kpɨ̂ki Yingö nyîsə̂ nə̈ sə̈ nyê.

Dokʉ̈ Körɛ̂nte 2:11

Tchabâ lə̂ gûtə̂ azü pâ cho âtə kä ndə̂ âwûnsə̂ apö ndə̂ akrə ndə̂ âwâ lə̂ küwû nə̈? Kütû yingö ndə̂ akrə ndə̂ âwâ lə̂ yê kä ndə̂ âwûnsə̂ nə̈. Käko ndjë, rə ndə̂ âwâ bhâlə̂ su Ndjapä, ngâ akrə balë wûn-âbo sə̂nə̈-a, kütû Kpɨ̂ki Yingö.

Dokʉ̈ Jâan 2:20

Âdə andə̂ nye nə̈, nyë gbô Kpɨ̂ki Yingö ndə̂ Krîsiti zâ tchë sə̈ nyê nə̂, ânyë nyënyê gbɛ̂, nyë wûnsə̂ lëge pö nə̂.

Dokʉ̈ Körɛ̂nte 14:30

Âdə ngâ akrə ngbî âgbo ngâ pö dəndə̂ Ndjapä, äwäpä akrə ndə̂ tche sə̂ lakə̂ to pö lâme ngbo ma yê ëtâ.

Lûke 2:26

Kpɨ̂ki Yingö tö rə̂ sə̈ tchë päkëdə̂, tchê tchuabô tee-a, zoo kə̂ wun Krîsiti ndə̂ Gbölö Gbïɛ̈ wan tchë.

Apökälîbïchi 1:1

Mbëtï âtə tö pö ndə̂ arə ndə̂ âwâ lə̂ küwû nə̈, ânyë Ndjapä zâ rə̂ sə̈ Jezü Krîsiti ndə̂kə̂ nyîsə̂ nə̈ kraâ sə̈ a-earə̂ kua ndə̂ yê. Ndjapä zä rə̂ sə̈ Jezü ndə̂kə̂ nyisə̂ nə̈ sə̈ andjê, arə ndə̂ âwâ ndə̂kə̂ wutu angaâtə. Jezü nyïsə̂ nə̈ lə̂ köbosə̂ ânje ndə̂ yê, ndə̂ tche wân tchë ndə̂kə̂ nyisə̂ nə̈ sə̈ earə̂ kua ndə̂ yê Jâan.

Dokʉ̈ Timotë 4:1

Kpɨ̂ki Yingö tö rə̂ kraâ päkëdə̂: Lə̂ adɨ̂ alö âtə, angâ azü âgboadje tə̂ köbo su andjê ndə̂ andjë zâ rə̂ sə̈ Krîsiti, kə̂ zadje tə̂ andjê sə̈ ayingö ndə̂ âbolo azü, lakə̂ nyisə̂ rə ndə̂ âtô bhândə̂ angbongbo atchozö.

Apökälîbïchi 2:24

«Praâbalë më tö rə̂ sə̈ nyê, nyënyê adɨ̂ azü gö ndə̂ Tïyätîre, ndə̂ nyë kôsə̂ kə̂ za tchêngbâ andjê la ngbongbo pö ndə̂ andjë nyisə̂ nə̈ lâme, ânyë kə̈ zâbô su nyê zâ pâ rə ndə̂ andjë e rə̂ tâ päkëdə̂: ‹Kə̂ nyisə̂ rə ndə̂ Satäa ndə̂ gbô rə̂ wâ lə̂ küwû nə̈›, më zâbo ngâ kʉ̂ngbô ngbî ëpâ nyê-a.