Dokʉ̈ Jâan 3:20 - Mbëtï Ndjapä: TÄFO MADƗ̈

²⁰ Bëte âdə su azə̂ âwa ngbanga lə̂ küma azə̂, Ndjapä wä gbölö kə̈ rô su azə̂, tche wünsə̂ rə gbɛ̂.

Dokʉ̈ Jâan 3:20 Cross References

Aheborö 4:13

Ngâ rə balë ndə̂ Ndjapä mbô rə̂ ndə̂ âwâ wü tchâtchu yê wâbo-a. Lə̂ la Ndjapä arə gbɛ̂ wä kpändëwä, tche wün tchô pâ arə gbɛ̂, azəzə̂ kä ndə̂ âtosə̂ tchêngbâ arə ndə̂ azə̈ mbô rə̂ sə̈ tchë.

Dokʉ̈ Körɛ̂nte 4:4

Më mbôâbo ngâ ngbongbo rə ndə̂ su mê sə̂ lakə̂ hro la mê tə̂ pö ndə̂nə̈-a, praâbalë ânyîâbo ndə̂kə̂ to rə̂ pä më wâ djîrə̂ lə̂ la Ndjapä nə̂-a. Gbölö Gbïɛ̈ kä ndə̂ âwa ngbanga ndə̂ mê.

Dokʉ̈ Jâan 4:4

Nyënyê ndə̂ abechë ndə̂ mê, nyë wätə̂ azü ndə̂ Ndjapä. Nyë rô a-earə̂ ndə̂ma Ndjapä ndə̂ yepa lâme la gbôgbô nə̂. Bëte tchanə̈ ndə̂ tche wâ lə̂ nyê lâme, tche wä gbölö kə̈ rô tchanə̈ ndə̂ tche wâ pâ cho âtə.

Jâan 21:17

Jezü kâ tô rə̂ sə̈ tchë tə̂ vötaâ nə̈ päkëdə̂: «Chemön, modô ndə̂ Jâan, mo nyîndə̂ mê nə̂?» Pîêre wâ la nyonyo bëte rə̂ ndə̂ Jezü kâ tô rə̂ sə̈ tchë tə̂ vötaâ nə̈ päkëdə̂: «Mo nyîndə̂ mê nə̂?» Tche tô rə̂ sə̈ Jezü päkëdə̂: «Gbölö Gbïɛ̈, mo wünsə̂ rə gbɛ̂, mo wûnsə̂ nə̈ nə̂ pä më nyïndə̂ zə̈!» Jezü tô rə̂ sə̈ tchë päkëdə̂: «Amö bata aɛ̈bro-ngbaga ndə̂ mê.

Apökälîbïchi 2:23

Pâ arə lâme gbɛ̂ më âkä won abechë ndə̂ yê. Käko a-Egilîze gbɛ̂ wun-adje sə̂nə̈ pä më də̈ akrə ndə̂ mê wunsə̂ apö ndə̂ âwâ lə̂ su akrə, la gʉ tə̂ su azü. Mê kʉadje rə sə̈ akrə balë balë lə̂ gûtə̂ nyê gundə̂sə̂ arə ndə̂ tche mbô rə̂.

Tîte 3:11

Mo wûnsə̂ nə̈ nə̂ pä akrə käko lâme, tche tchâ köbo nə̂. Ndə̂ gbô tchë ndə̂po lakə̂ mbo ngbongbo rə lâme, dëkë tche wâ ngbanga lə̂ küma yê la tə̂ yê nə̂.

Jâan 8:9

Ndə̂ andjë djê pö nə̈ käko, andjë sə̂ lakə̂ gbo balë balë, ätö tə̂ akpôkpô azü. Jezü sə̂ la kütû yê la ɛ̈chë nə̈ ndə̂ tche krʉ̂ tchâtchu yê.

Aheborö 6:13

Ndə̂ Ndjapä zâ bâlâ tə̂ Abrahâmo, tche mbö rə̂ lakə̂ deba la rə̈ yê la tə̂ yê, bëte ngâ akrə ndə̂ tche wâ gbölö kə̈ rô tchë ndə̂kə̂ mbo rə̂ wâbo-a.

Abadjângele 5:33

Ndə̂ a-earə̂ kə̂ wa ngbanga nə̈ âsə̈ dje apö lâme, su andjê kʉ̂ andjê tə̂ gbölösə̂nə̈, ânyë andjë nyîndə̂ kə̂ won abadjângele nə̈.

Rômo 8:34

Tchabâ kä ndə̂ âwâ ndə̂kə̂ wa ngbanga lə̂ küma andjê? Akrə balë sə̂âbo-a, bëte rə̂ ndə̂ Jezü Krîsiti tchû ânyë kə̈ jô lə̂ kuzü. Tche sə̈ ndrotə̂ Ndjapä də ndôkö könô yê ânyë kə̂ to pö sə̈ Ndjapä bëte azə̂.

Dokʉ̈ Jâan 3:19

Käko kä ndə̂ azə̈ wun-adje sə̂nə̈ pä azə̈ də̈ azü ndə̂ lëge pö, ânyë su azə̂ wadje gii tchâtchu Ndjapä.

Dokʉ̈ Jâan 3:21

Arə̂mâ ndə̂ mê ndə̂ më nyîndə̂ nyê tə̂ gbölösə̂nə̈, âdə su azə̂ âwabô ngbanga wâ lə̂ küma azə̂, su azə̂ kä gii pâ Ndjapä.