2 Tamuwen 9:7 - Ala Wone Peenok Peebi Mbanak

⁷ Yoge mbareegi, at Ndawut nen at yoge logonet, “Kat kogoba Yonatan nimbirak niniki kunik wonagagirak paga kabuwa nen obeelom eeppagakit nduk, wiigigirak me, kagabiti mbarugun o. Obeelom eeppagage logonet, kombo Tawun anggween nogo abok waganogo kat wokkege logominggirik, kat nimbirak yime mondok logonet, ninom mbi nonggo logogun o,” yoreegerak.

2 Tamuwen 9:7 Cross References

Wakkagagerak 43:18

Yutup ame wogoren piya nagagerak ti paga inagabiti ambik a'nuk, iniki mbako logonet, “Nit wu mbato onggo wogorogoorak kwe, pelaarogo ninegaruna yonggoppegaarak nogo paga aret wo'niren o yime pinani wagaarak me, nit yime ugun wonogwe niigak, pippinanogo logomenggaarik, ayeloman aret eerogo pinanogo logonet, ninaanggumi keledai it aret kolaagun kogo o,” mbareegwaarak.

Wakkagagerak 43:23

Yogo mbareegwa, at Yutup ayeloman nogo nen it yorage, “Kit kiniki piirik logonet, kinagabiti mbarugup o. Kinawu ti, an muk aret waganggirak kwe, kinogoba Ala inom, kit kinogoba ogoba Ala inom, nogo nen kinegaruna yonggoppinagit nagaarak kagi o,” yorage nagagerik, at Timeyon nogo wonok wogora wundi wagagerak.

2 Tamuwen 12:8

at ogoba Tawun awi o nggwok abe wurik nogo wogoge, at ogoba Tawun akuwi at ogome logowak nduk wogoge, ndi, it aakumi Yekura mendek inom, Iterali mendek inom, inowe endagembogut logonet, inarum logowak nduk mippege, eereegirak kwe, ti meek mba'nuk, Ambinom wo'niruwak, mbake kenok ti, wogoriyak aret kwe,

2 Tamuwen 19:28

Ndi, an nogobamini inom, nowe-nawot inom, it abok aret eereegwaarak paga kat nowe kendagembogut nen inoorogo piige logonet kwe, an kayeloman nalik aret it kinom mbi nonggo menggaarak nogo, ninom mbi nengge logokit nduk koonogo paneegindak me, an nowe kendagembogut ambinom koonogo panenok nduk, yokkirigin lek o.”

2 Tamuwen 19:29

Yoge mbareegi, aap endagembogut nen at yoge logonet, “Kat wone ari abu yelok keegirak me, ambinom yugun o. Ata, nggween nogo Tiba kimbirak mogonggolaamunggup nduk, wone nggaruk togon yokkiragi o.”

2 Tamuwen 19:33

aap endagembogut nen at Mbaritilayi yoge logonet, “An nen keebe unde wokkake logokit nduk, nimbirak o Yerutalem nawok o.”

2 Tamuwen 21:7

Yorage nagagerik, Tawun aput Yonatan nogo Ndawut imbirak Aliku ALA endage paga, “Yogop eeko logowok o,” yinuk, kumbuk mbanogo pereegwaarak me, aap endagembogut nen Yonatan aput Mepibotet abuwa nen wogoroolik.

2 Tamuwen 9:1

Ne ambi paga at Ndawut nen ari logonet, “Yonatan nimbirak kunik wonogogurak me, at eeppukwak Tawun apuri mendek ineenik ambi wonogwe kenok, abuwa nen obeelom eeppikit nduk, yinip o.”

2 Tamuwen 9:10

kat inom, kapuri inom, kayeloman mini inom, kogoba Tawun ombooluk Mepibotet ake yabu eeppiigo logonet, amendek ambi lek kenok kolage logowak nen, anggen yugu nogo wonok iri wogo logomunggup o. Ndi, kogoba ombooluk Mepibotet nogo, mbi nengge logorak perak, an nimbirak mondok-mondok nonggo logogun o,” yinuk, yoreegerak. At Tiba nogo apuri ineebe 15, ndi, ayeloman mini ineebe 20, wonogogwaarak.

2 Tamuwen 9:11

At Ndawut nen wone nogo Tiba yoge mbareegi, at Tiba nen aap endagembogut yoge logonet, “Ai, nogoba. Kat nen an kayeloman yo'nege keenok, abok aret an kayeloman ndak-ndak aret eeke logokit o,” yoreegerak. Ti yoge mbareegi, aap Mepibotet nogo, aap endagembogut Ndawut apuluk negen aret imbirak mbi nonggo nogogwaarak.

2 Tamuwen 9:13

Togop aret me, at Mepibotet nogo iyok peenok-peenok maluk aret me, o Yerutalem time logonet, aap endagembogut mbi nengge menggim time inom mondok-mondok mbi nengge nagagerak.

2 Tamuwen 9:3

Yoge mabreegi, at endagembogut nen at yoge logonet, “At Ala aakumi inabuwa nen obeelom eeppiige menggi kwak, an Tawun apuri wiganak mendek ambi wonogwe iyo, inabuwa nen obeelom eeppiyaakit nduk, yo'niru o.” Yoge mbareegi, at Tiba nen aap endagembogut nogo yoge logonet, “Yonatan aput iyok maluk agagerak nogo perak, wonage o.”

1 Endagembogut 2:7

Togop eeppege logonet kwe, aap Nggileyat mendek Mbaritilayi apuri iinok perak, kat koweeluk Abatalom nen nooriyak nduk eerit nage kenok, an kole mbagangge mbareegi, it nen wo'nabeegwaarak me, it kat kinom mbi nunggwi nogo inom nonggo logowak nduk koonogo piige, inabuwa nen obeelom eeppiige, eeke logonu o.

2 Endagembogut 25:29

Eeke mbareegi, at Yoyakin nogo keele maarak logonet, ayum yirik wonagagerak nogo mbo punuk, abe mendek yikko'nok, aap endagembogut inom mbi nonggo menggam nogome, inom nengge kagak, kambuurak kuli aret ari nagagerak.

Ndawi 41:9

An nore niniki kunik abet aret mbake, Nimbirak mbi nengge, Eeke minggirak nogo nen kunduk, Nimbirak logorak, “Neebi o,” yinuk, mbo panegerak o.

Yeremiya 52:33

Eeke mbareegi, at Yoyakin nogo keele maarak logonet, ayum yirik wonagagerak nogo mbo punuk, abe mendek yikko'nok, aap endagembogut inom mbi nonggo menggam nogome, inom nengge kagak, kambuurak kuli aret ari nagagerak.

Takariya 7:9

Yo'nereegerak nogo it aakumi yorage logonet, “At Omaawi Lombok Menggerak Aliku ALA nen yegerak nogo yi aret. Eekaatak a'me nggelok mban eeppiigwi, it mban-mban nabuwa-kabuwa eekko'net nogwe, eeko logowak o.

Matiyut 6:11

Yogondak ninambi noorak ndak-ndak wo'niret o.

Lukat 22:30

kit an nabu'me piige minggim mbi nunggwi, yi nunggwi, ndi, aakumi wone lengganinako menggam logonet, aakumi Iterali inanebunu 12 nogo inowak loonggwi, eeko logobagip nduk, unde eeppinagagi o,” yinuk, yoragagerak.

Wayu 3:20

An tunggambe paga mi'ndak logonet, tu puk-puk eeke nogo liippanuwak o. Aap ambi an tu puk-puk eeke nogo, aruk konembunuk, tu paa'neege kenok, an ka unggwage logominggirik, nimbirak niniki ambit lambunik nore-kore logonet, mbi nonggo logogun o.

1 Tamuwen 12:24

kit nen Aliku ALA kinagabiti mbako logonet, kiniki-kineebe abok aret Aliku ALA wogo'nuk, at mban kulinik-kalinik liirogon mugurok nogwe, ndi, at nen yi eekak ndi eekak kit kinake iya tit eeppinagage nagagerak nogo abekwi, eeko logonip o.

1 Tamuwen 20:15

an napuri wigannaremenggaarak nogo mbo piiga'lek mondok-mondok inabuwa mbake, ndi, at Aliku ALA nen o nggween paga yime kinom wim mbanak menggendak nogo lek eerogo piige kenok kunduk, an abe'nake, eeke logomunggun o,” yinuk, yoreegerak.

1 Tamuwen 22:23

Togop aret me, aap kat kooriyak ari ti, an kunduk nooriyak aret ari me, nimbirak logonet, kagap ndarak logomunggun me, kagabiti mbarugun o,” yinuk, yoreegerak.