2 Tamuwen 8:14 - Ala Wone Peenok Peebi Mbanak

¹⁴ At Ndawut nogo, it Erom mendek tebembiinok logowak nduk, at awuri ineegin warak nogo, o Erom nogome nappiinet nage mbareegi, it aakumi Erom mendek abok aret Ndawut abu'me tebenak aret wonogogwaarak. Ndi, at Ndawut nogo, yi o ndi o wim eerit nege kagak, at Aliku ALA nen Ndawut eegin tiyappege nagagerak.

2 Tamuwen 8:14 Cross References

Wakkagagerak 25:23

Nggino yoge mbareegi, at Aliku ALA nen wone onggo yoge logonet, “Aakumi inanebunu mbere aret kinikime wonage o. Inanebunu mbere nda'nogo logomenggaarik, Imbirak ogoorak logonet, anebunu ambi omaawi ambik. Ndi, ambi omaawi lek logonet, awuluk nogo nen oweeluk nogo ayeloman eeppunuk, logogin o,” yoreegerak.

Wakkagagerak 27:29

Ndi, yi aakumi ndi aakumi inanebunu lombok abok aret kayeloman ogwe, Yi aap ndi aap nen kat kabu'me mban tebe yinuk, kayuk wukwi, Kowe-kawot inenggela'me inowe aret mi'nage, Ndi, kagalo iriwi nen kat kabu'me mban tebe yogwe, Eekwi iigak, It aakumi nen kat pulunogo pagagwi iinok, it kunduk pulunik aret ogwe, Ndi, it aakumi nen inale'nggen koba pagagwi iinok, it togon inale'nggen inoba aret wonogwe, Eeke logogin o,” yinuk, yoreegerak.

2 Tamuwen 7:9

Pege nagagirik, at nggeeme noorak iniki koombunuk nage kenok, an nimbirak aret nage, an naa'nduk a'nuk awim mendek inoorogo piige, eeke nagagirik, yogondak it aakumi nggween paga inendage warak mengga kwak, at endage warak togop aret eerogo pigin o.

2 Tamuwen 8:15

At Ndawut nogo it Iterali mendek abok aret inowe endagembogut a'nuk, wone lengganogo yorage logonet, apuri Iterali inake abe mban koongge, li'lak mban eeppiige, eeke nagagerak.

2 Tamuwen 8:6

Inoorogo piinok, at Ndawut awuri ineegin warak nogo, it aakumi Aram mendek tebembiinok logowak nduk, inawi kota Ndamitik nogome piya nagagerak. Piya nage mbareegi, it Aram mendek nogo, Ndawut abu'me tebenak logonet, inarum wonage onggo wogori wogo nogogwaarak. Ndi, at Ndawut nogo, yi o ndi o wim eerit nege kagak, Aliku ALA nen Ndawut eegin tiyappege nagagerak.

1 Endagembogut 11:15

Inikime eeppereegerak nogo ti, maan aa'nduk Ndawut nen aakumi Erom mendek inom wim nambuke wonage me, awuri ineegin warak inowe Yowap nogo nen inoorak nogo nggween taambiyaakit nduk, nage nagagerik, aap Erom mendek ineegin warak abok aret inoorogo piinok, at aakumi Iterali abok aret inom nen eegu yumbuninik nogo, aap kero ambi teppiiga'lek abok aret inoorit nogwe iigak, tut 6 peneneegerak.

1 Endagembogut 22:47

At ogoba Ata it Yekura inowe endagembogut a'nuk wone lengganogo yorage eyom paga aap mban-mban wut-wut yogo logonet, inagugi eeko nogogwaarak lek eerogo piyareegerak ando nogo, at aput Yotapat nen aret lek eerogo piyareegerak.

1 Endagembogut 22:48

Ndi, o Erom nogome inowe endagembogut ambi logolik aret me, aap wone koongga inowe ambi nen inowe endagembogut negen a'nuk, inarum wonagagerak.

2 Endagembogut 14:7

Ti'nuk, ne ambi paga at Amatiya nogo, aap ineegin warak Erom mendek inom wim eeke logonet, o Mayu Ogop Menggim kobappaga time aap sepuluh ribu inoorogo piinok, o Tela tebenggolage nagagerik, endage Yoketen toonogo pereegerak o yogondak yogwe wonogwe aret o.

2 Endagembogut 18:7

Eeke kagak, at Aliku ALA imbirak wonage me, at eeriyak iniki koonggetak nogo, a'me nggelok mban age nagagerak. At nogo nen, “It Atiyut mendek inowe endagembogut nen wone lengganogo yo'nirage logorak, neebi o,” yinuk,

1 Mbinineegwaarak 18:13

Inoorogo piige nagagerik, it Erom mendek tebembiinok logowak nduk, at awuri ineegin warak nogo, o Erom nogome nappiinet nage mbareegi, it aakumi Erom mendek abok aret Ndawut abu'me tebenak aret wonogogwaarak. Ndi, at Ndawut nogo, yi o ndi o wim eerit nege kagak, at Aliku ALA nen Ndawut eegin tiyappege nagagerak.

Ndawi 60:1

Ala wae. Keebi ninomba'nuk mbo pinanege, Ninobak wurik ndengganogo pege, Kanini ninoba pinanege, Eekendak kwe, Aa'nduk obeelom wonogogu kwak Yogondak togop aret eeppinanu o.