2 Tamuwen 7:10 - Ala Wone Peenok Peebi Mbanak

^10-11 It an napuri Iterali aa'nduk tebembiinok wonogwe, ti'nuk, Iterali inowak loonggo logowak nduk, inoweewi mippiige nagagirak kuli nen nok, yogondak kuli, it aap maluk mendek nen tebenogo piigwi, eeko nogogwa kwak ambinom eeppiigo logokwak, inawim abok aret tebenogo piinok, o abolok lek obeelom aret wonage kagak, iname lombok logonet, inagabolo nirik-kirik yaga'lek iniki ugun tayenak logowak nduk, an napuri Iterali inanggween wogorage logominggirik, time kwippiyaminggirak wonogwe iigak, Naliku an ALA nen aret inapuri-inombowologwe ambik wiganogo piyaagin o, yinuk, Naliku ALA nen aret yagi o.

2 Tamuwen 7:10 Cross References

1 Mbinineegwaarak 17:9

It an napuri Iterali aa'nduk tebembiinok wonogwe, ti'nuk, Iterali inowak loonggo logowak nduk, inoweewi mippiige nagagirak kuli nen nok, yogondak kuli, it aap maluk mendek nen tebenogo piigwi, eeko nogogwa kwak ambinom eeppiigo logokwak, inawim abok aret tebenogo piinok, o abolok lek obeelom aret wonage kagak, iname lombok logonet, inagabolo nirik-kirik yaga'lek iniki ugun tayenak logowak nduk, an napuri Iterali inanggween wogorage logominggirik, time kwippiyaminggirak wonogwe iigak, Naliku an ALA nen aret inapuri-inombowologwe ambik wiganogo piyaagin o.

Ndawi 44:2

Kat keenggi omaawi lombok paga Aakumi inanebunu abok aret mugogo wumbiinok, It ninombomini inakom kwippiige, It aakumi inanebunu lombok aan lebenogo piinok, Ninombomini wiganggo logowak nduk eerogo piige, Eereegindak nogo o.

Ndawi 44:4

Kat nogoba Ala kendagembogut aret o. Yakup ombowologwe ineegin tiyak yuwak nduk, Wone lengganogo yorage nagagindak o.

Ndawi 80:8

Eyo anggur awi o Metit nen wonok wage nagagindik, It yi aakumi ndi aakumi kat nen mugogo wumbiinok, Eyo awi ti yarogo pege,

Ndawi 80:9

Nggween amok mbanogo punuk yareegindak me, Eyo awi ti, omanggen kiiniki paga aret wurake, Eno'mbak o yi paga ndak warogo pege,

Wundeegwaarak 1:22

It Iterali mendek togop aret wigannarit nogo mbareegwa, at Pirawun nen at apuri aakumi Metit mendek apit aret yorage logonet, “Kumi Iberani mendek nen aap ndaganakwi iinok, yi nggwok Nin inikime mbo piya nogwe, ndi, kumi nda'nogwe iinok, ineenik teppiigwi, eeko logonu o,” yinuk, wone lengganogo yoragagerak.

Wundeegwaarak 15:17

Kat keyate kwak, kabuut leenogo pake, Kaliku ALA kat logowam ogobakkigirogo pake, Ndi, Kaliku ALA kendage alut eeko logowam Kat keenggi paga wukkolage, Eereeginom nogome aret, It kapuri Iterali mendek yi, Mondok-mondok inakom awi yarak logowak nduk, piya namunggun o.

Yetaya 5:2

Yarikit nduk nggween kabungge, yugum nggiginogo nappege, Anggur awi obeelom mendek mban leenogo yake, Arum logorak oolo time eyo ndoonogo pi lagangge, Anggur anggen aambiranggo logowam yugum nenaarogo pege, Eerogo punuk, Anggen abe yuwak nduk tokkage nagagerak kwe, anggen abe mendek yuulik ale mendek mban yereegerak o.

Yetaya 5:7

At Omaawi Lombok Menggerak Aliku ALA eyabu anggur yarak nogo ti, kit Iterali mendek aret. Ndi, kit aap Yekura mendek ti, anggur awi yarak at inikilom mbake kwak aret me, “Eekaatak a'me nggelok eeppiigwi iyaamun ilik?” yinuk, tokkiige nagagerak kwe, kit mban-mban kinamiya wun-wun yogwe, “Obeelom mban eerit nugwi iyaamun ilik?” yinuk, tokkiige nagagerak kwe, at ambi nen at ambi maluk eeppegak eerit nogo logonet, leenggu maakwi, Eekwi kiige nagaarak o.

Yetaya 60:18

Aap iniki worokot nen aakumi maluk eeppiinet nugu agaarik o, yinuk, at wonage me time nen yogwe, O maluk eerogo pugwi, o yigirik-noonom eerogo pugwi, eekaarak o, yinuk, anggween paga time nen yogwe, Eekwi nogo ambinom konenggo logogun lek o. At nen, Nayugum pak wurik ti, Nagap Ndaka o, ari, Ndi, Narunggambe ti, Nalut Eeka o, ari, Eeke logogin o.

Yetaya 60:21

Ti ari nage kenok, aagalogwe abok aret iniki abe koonak ogwe, Ndi, nggween ti nogo, unde eeppatinuk mondok-mondok wonogwe, Eeko logogun o. An abu tiyanak, Wi! nugwi nogo aakumi inigen neego logowak nduk, neenggi lombok paga nen agarip ambi luurogo yareegirak it aret me,

Yeremiya 18:9

Ndi, ne ambi eyom paga it aakumi ambi mendek ilik, it aap inabu'me piigo menggam ambi a, o wukwi kwak wurogo piige, awi yakwi kwak yarogo piige, eerigin o, yoraminggirak kwe,

Yeremiya 24:6

It ineebe ti, obeelom aret logowak nduk, nenegen wogoren nege logominggirik, ti'nuk, it iniyokan wogoren o yime piya woraagin o. Piya wa'nuk, o minggwi kwak eerogo piyaagin lek nu'lek wurogo piige, ndi, awi yarak kinggulik kwak yarogo piige, eerigin o.

Yetikiyen 28:24

Alok ngguurik kwak, yilooli alok kwak, it aakumi Iterali inaagan-ambokan wonogwe nogo nen Iterali maluk eerogo piyoorak mban mbakwi nogo ambinom mbako logogun lek o. Mbako logogun lek ti paga Naliku Nitok Minggirak ALA an aret ineenu arugun o,” yinuk, yegerak.

Oteya 2:18

Ne ti eyom paga ndiimbu-nggwiya o karume nugu menggaarak inom, Yi towe ndi towe wiga agan nugu menggaarak inom, Yi mendek ndi mendek inaanogum nggween mbaanggagak nugu menggaarak inom, nen At ineyak mbanggwi iyo, it ninom wone mbanigin o. Yigin inom, wooluwak inom, wim eekak inom, o time nen abok aret lek eerogo pigin me, It abok aret iniki ugun tayenak logonet nogo yogo logogun o.

Amot 9:15

It Iterali ti, awi yako mengga kwak, inanggween lombok paga inakom kwippiyaminggirak me, Inanggween wogoragagim time nen it aakumi ambi nen nggiginogo wumbiyaagun mondok lek aret o, yinuk, at Aliku kinogoba Ala nen wone yi abok aret yegerak me, yokkiragi o,” yinuk, yoragagirak.

Wayu 21:4

Mbogut-nggween aa'nduk ogobakkigirik nogo paga logonet, iniki aaninggin kogo nogogwaarak nogo, lek agaarak me, ngget ogobakkigirik nogo paga inogoba Ala inom logonet, inale amburu mbanogo piyamenggerak me, kanggwi, tabun ndoombunuk le yogwe, iniki wakkologwe, andi kogwe, eeko logogun abu lek o,” yinuk, ari naruk konenggirak.

Owak Loongga 4:3

Ndi, at aap Yabin nogo nggweendo wim eeka kuda nen nikkenok nage menggerak sembilan ratus mbuti paga ogobakkigirik unde wonagagerak me, it Iterali mendek abu'me tebembiirogo logonet, aaninggin-paaninggin alik negen inoba piige kagak, tahun 20 age mbareegi, it Iterali nogo inoone nggwok paga nen, “Yeenggwa niret o,” yinuk, Aliku ALA yogo nogogwaarak.

1 Tamuwen 13:17

Wuppatinuk wonogwe ti eyom paga it aap Pilitin mendek abera'lek me aakumi inamendek ndingga ineebe kenagan aago inawooliyana nen wundi woraanuk, ambi aago o Tiyuwan yaga'lelo Opara pa'nggwe wogwe,