2 Tamuwen 3:3 - Ala Wone Peenok Peebi Mbanak

³ Ambokan ndarak ti, aap Naban awi Karemen mendek kwe togwe pereegerak waganeegerak Abigayin aagaluk aap endage Kileyap. Ambokan ndarak ti, aakumi Nggetut inowe endagembogut Talamayi apuluk kwe Maaka aagaluk aap endage Abatalom aret.

2 Tamuwen 3:3 Cross References

2 Tamuwen 13:1

Ti'nuk peebi, ne ambi paga at Ndawut aput Abatalom awuluk kolaga abu kigirikwe endage Tamat aret me, Ndawut aput Amonon nogo nen kolaga Tamat nogo iniki nengge nagagerak.

2 Tamuwen 14:23

Yo'nuk, at Yowap nogo o Nggetut nage nagagerik, Abatalom nogo wonok o Yerutalem wagagerak.

2 Tamuwen 14:24

Wonok wage mbareegi, aap endagembogut Ndawut nen ari logonet, “Abatalom ti, an nenggaawak paga ya'i unggwi woraagurik o. Ame nugwa aret nayok o.” Yoge mbareegi, aap endagembogut wonage me ungguulik nugwa ame aret nagagerak.

2 Tamuwen 14:32

Yoge mbareegi, at Abatalom nen Yowap yoge, “An wone yokkege me, karuk logot. An o Nggetut time op aret wonage me, yime nano eeriyak nduk, wo'neren wagandak? Aap endagembogut yori nanok nduk, Woraayok o, yinuk, eerogo nappigirak kwe, kat nonggop nduk woroolik? An nen aap endagembogut Ndawut pekka naakit o. Pekka nage neenok, an maluk ambi eekirak paga nooriyak mbake kenok, nooriyak op aret o,” yinuk, yoreegerak.

2 Tamuwen 15:7

Ndi, tahun 4 eeppunuk, at Abatalom nogo aap endagembogut yoge logonet, “An kayeloman o Aram kota Nggetut paga time logonet, at Aliku ALA yoge, Kaliku ALA nen wo'neren niyokan o Yerutalem pani nage keenok, an o Keboron time Kaliku ALA kalut eeri nagin o, yinuk, wone kumbuk mbanogo yoreegirak me, yoreegirak nogo a'me lik yuwak nduk, o Keboron naakit nen, E, yo'niru o,” yoreegerak.

2 Tamuwen 18:33

Wone ti ari nogo, aap endagembogut aruk konengge nagagerik, ogut na'nuk, iniki puru agan tu unggwogo menggam o wurik irimbaga ko ambi ogoorak me, lagi nanuk, “Ai, napuluk Abatalom o! Abatalom o! Napuluk a! Napuluk a! Kat napuluk Abatalom kobaane'me an kogoba aret kambikit lak, naput a! Naput a!” yinuk, le ari nagagerak.

2 Tamuwen 2:2

Yoge mbareegi, at Ndawut nogo akwe ambi kwe Yiteren mendek Akinowam inom, akwe ambi aap Naban awi Karemen mendek kwe togwe pereegerak waganeegerak Abigayin inom, akuwi mbere ti, inom aret o Keboron woraawok nduk eeko mbareegwa,

1 Endagembogut 2:15

Yoge mbareegi, at Aroniya nen kwe Mbatiyeba yoge, “Nogoba Ndawut obaane'me an aret Iterali inowe nendagembogut logorak keenu aret o. It aakumi Iterali mendek abok nen inowe nendagembogut logorak nombakaarak kwe, ena laganogo nawuluk Talomo aret nogoba obaane'me endagembogut agaarak ti, Aliku ALA iniki koonggerak paga agaarak o.

1 Mbinineegwaarak 3:1

Ndawut o Keboron logonet, apuri aap ambo'me-ambo'me ndaganabeegerak nogo inendage yi o. Apuluk manggu ndarak ti, kwe Yiteren mendek endage Akinowam aagaluk aap Amonon aret. Ambokan ndarak ti, kwe Karemen mendek Abigayin aagaluk aap Ndaniyen aret.

1 Mbinineegwaarak 3:2

Ambokan ndarak ti, aakumi Nggetut mendek inowe endagembogut Talamayi apuluk kwe Maaka aagaluk aap endage Abatalom aret.

Pelaareegerak 3:14

Manate aput Yayit nogo o Arogop nenaarak kolage logonet, nok aakumi Nggetut mendek inom, Mayaka mendek inom, inanggween ti kuli abok aret kolage nagagerik, at endage toonak ndak-ndak aret o Mbatan nogo ti endage Kawot-Yayit aret toonogo pereegerak me, o yogondak endage ti aret yogwe wonogwe o.

Yotuwa 13:13

Togop aret kwe, it Iterali nen it aakumi Nggetut mendek inom, it Maaka mendek inom, mugogo wumbiyoolik me, it ti, Iterali inom o yogondak wonogwe aret o.

1 Tamuwen 25:42

Yorage nagagerik, mbet-mbet amendek kolage nagagerik, keledai amborowak paga kwi'nage mbareegi, ayeloman mini komologwe ineebe 5 at ndegenit wogwe iigak, at Ndawut nen yonggo nappiyareegerak nogo, inom aret wogo mbareegwa, kwe nogo Ndawut aret kolagagerak.

1 Tamuwen 27:8

It aakumi Nggetut mendek inom, Nggiriti mendek inom, Amalek mendek inom, it aap inanebunu ti mendek ti, maan o Tiyut kuli nen nok-nok, o Metit kuli inawi nenaarogo wuppatinuk wonogwe nogo, at Ndawut awuri inom inawi paga kwi'nari unggunuk, ineebe inoorogo piinet nogo nagaatik, inamendek ndinggologo nogogwaarak.